ខេត្តរតនគិរី៖ បុរសម្នាក់កំពុងតែបើកគោយន្តកែច្នៃ១គ្រឿង ស្រាប់តែងងុយដេក ហើយងោកមួយភាំង ធ្វើឲ្យគោយន្តរេចង្កូតខុសផ្លូវ ក្រឡាប់ផ្ងារជើង កាលពីវេលាម៉ោង១ និង៣០នាទីរសៀល ថ្ងៃទី២២ ខែមេសា ឆ្នាំ២០១៨ នៅតាមផ្លូវជាតិលេខ៧៨ ត្រង់ចំណុចក្បែរសាលារៀនបុរីកម្មករមួយ ស្ថិតក្នុងភូមិ១ សង្កាត់កាចាញ ក្រុងបានលុង។
បើតាមសម្ដីរបស់លោក វី សា អាយុ៣៦ឆ្នាំ ជនជាតិខ្មែរ មុខរបរកសិករ ស្នាក់នៅក្នុងក្រុងបានលុង ខេត្តរតនគិរី បានឲ្យដឹងថា មុនពេលកើតមាននូវគ្រោះថ្នាក់ចរាចរណ៍នោះ គាត់បានបើកគោយន្តកែច្នៃ ចេញពីស្រុកលំផាត់ ឆ្ពោះទៅក្នុងក្រុងបានលុង។ ប៉ុន្តែនៅពេលកើតបើកមកដល់ចំណុចកើតហេតុ ស្រាប់តែងងុយដេក ហើយងោកមួយភាំង ធ្វើឲ្យគោយន្តរបស់គាត់រេចង្កូុតខុសផ្លូវ ក្រឡាប់ផ្ងារជើង បណ្ដាលឲ្យគាត់រងរបួសគួរសម។
ក្រោយពេលកើតហេតុ មន្ត្រីនគរបាលប៉ុស្តិ៍កាចាញ បានចុះទៅពិនិត្យមើល ប៉ុន្តែដោយសារករណីនេះ មិនបានបង្កឲ្យមានគ្រោះថ្នាក់ដល់អ្នកដទៃ ទើបសមត្ថកិច្ចទុកឲ្យម្ចាស់គោយន្ត រកមធ្យោបាយមកស្ទូចគោយន្តរបស់ខ្លួនទៅជួសជុលដោយខ្លួនឯង៕