ខេត្តស្វាយរៀង៖ ជនជាតិវៀតណាមម្នាក់ បានដើរទិញគោក្របីរបស់ប្រជាពលរដ្ឋខែ្មរ បែរជាឲ្យលុយដុល្លារសែនខ្មោច ទើបម្ចាស់ប្ដឹងទៅសមត្ថកិច្ចឲ្យឃាត់ខ្លួន កាលពីវេលាម៉ោង៩ និង២៥នាទីព្រឹក ថ្ងៃទី១៩ មេសា ស្ថិតក្នុងភូមិវាល សង្កាត់ច្រកម្ទេស ក្រុងបាវិត។
បើតាមសម្ដីរបស់ជនរងគ្រោះ បានឲ្យដឹងថា មុនពេលឃាត់ខ្លួន ជនសង្ស័យបានរកដើរទិញគោ និងក្របីរបស់ពួកគាត់ ហើយព្រមព្រៀងគ្នា ក្នុងតម្លៃ២៣០០ដុល្លាសហរដ្ឋអាមេរិក។ លុះមកដល់ថ្ងៃទី១៩ ខែមេសា ២០១៨ ពួកគាត់បានយកលុយដុល្លារនោះទៅរកទិញអីវ៉ាន់ ទើបដឹងថា គឺសុទ្ធតែលុយដុល្លារក្លែងក្លាយទាំងអស់ ហើយក៏បាននាំគ្នាមកដាក់ពាក្យបណ្តឹងតែម្តង។
មន្ត្រីនគរបាលមូលដ្ឋាន បានឲ្យដឹងថា ជនសង្ស័យដែលសមត្ថកិច្ចឃាត់ខ្លួន ឈ្មោះ លី ង្វៀងខាង ភេទប្រុស អាយុ៥២ឆ្នាំ ជនជាតិវៀតណាម មានលំនៅក្នុងភូមិឡុងហ៊ឹង ឃុំឡុងធឹង ស្រុកប៊េនកូវ ខេត្តតៃនិញ ប្រទេសវៀតណាម។ រីឯជនរងគ្រោះ រួមមាន ទី១-ឈ្មោះ ស្រី ស៊ន់ ភេទប្រុស អាយុ៥២ឆ្នាំ (ម្ចាស់គោ) ទី២-ឈ្មោះ ស្រី វៀន ភេទប្រុស អាយុ៦៥ឆ្នាំ (ម្ចាស់ក្របី) និងទី៣-ឈ្មោះ ចាន់ សារឿន ភេទស្រី អាយុ៦៣ឆ្នាំ (ម្ចាស់ក្របី)។ ជនរងគ្រោះទាំង៣មានលំនៅក្នុងភូមិវាល សង្កាត់ច្រកម្ទេស ក្រុងបាវិត ខេត្តស្វាយរៀង។
មន្ត្រីនគរបាលដដែល បានបន្តថា ក្រោយពេលពាក្យបណ្ដឹងបែបនេះ សមត្ថកិច្ចបានចុះទៅដល់កន្លែងកើតហេតុ ដើម្បីស្រាវជ្រាវ ហើយពិនិត្យឃើញថា ប្រាក់ចំនួន២០០០ដុល្លារ គឺសុទ្ធជាប្រាក់ក្លែងក្លាយទាំងអស់។ ក្រោយមក ម្ចាស់ក្របីក៏បានទូរសព្ឌ័ទាក់ទងទៅជនសង្ស័យឱ្យឡើងមកយកក្របីមួយក្បាលទៀត។ នៅពេលនោះ ជនសង្ស័យក៏ឡើងមកតាមការណាត់តាមទូរស័ព្ទ ទើបសមត្ថកិច្ចឃាត់ខ្លួននាំទៅសាកសួ នៅក្នុងប៉ុស្តិ៍នគរបាលរដ្ឋបាលសង្កាត់ច្រកម្ទេស ហើយកសាងសំណុំរឿងបញ្ជូនទៅកាន់អធិការដ្ឋាន ដើម្បីចាត់ការបន្តតាមនីតិវិធី៕