ភ្នំពេញ៖ បុរសបរទេស២នាក់មានសញ្ញាតិផ្សេងៗគ្នា បានចូលមកក្នុងប្រទេសកម្ពុជា ដោយគ្មានលិខិតឆ្លងដែន ក៏ត្រូវសមត្ថកិច្ចឃាត់ខ្លួន កាលពីវេលាម៉ោង៥ល្ងាច ថ្ងៃពុធ ៤កើត ខែពិសាខ ឆ្នាំចរ សំរឹទ្ធិស័ក ព.ស២៥៦២ ត្រូវនឹងថ្ងៃទី១៨ ខែមេសា ឆ្នាំ២០១៨ នៅក្នុងសង្កាត់បឹងរាំង ខណ្ឌដូនពេញ។
លោកវរសេនីយ៍ឯក ជា ចិត្រា នាយការិយាល័យស៊ើបអង្កេត និងអនុវត្តនីតិវិធី បានឱ្យដឹងថា ជនបរទេសទាំង២នាក់ដែលសមត្ថកិច្ចឃាត់ខ្លួន ទី១-ឈ្មោះ HUGO ARNOLD DYKSTRA ភេទប្រុស អាយុ៦៨ ជនជាតិហូឡង់ និងទី២-ឈ្មោះ KIM JOHNS ភេទប្រុស អាយុ៥៨ ជនជាតិកូរ៉េ សញ្ជាតិអាមេរិក។ ពួកគេទាំង២នាក់ គឺគ្មានលិខិតឆ្លងដែន គ្មានមុខរបរ និងមានទីកន្លែងស្នាក់នៅមិនពិតប្រាកដ។
នាយការិយាល័យស៊ើបអង្កេត និងអនុវត្តនីតិវិធី បានបន្តថា បន្ទាប់ពីឃាត់ខ្លួនរួចហើយ សមត្ថកិច្ចបានបញ្ជូនពួកគេទៅកាន់ការិយាល័យស៊ើបអង្កេតនិងអនុវត្តនីតិវិធី ដែលមានទីតាំងស្ថិតនៅផ្ទះលេខ៣ ផ្លូវលេខ១៥៨ សង្កាត់បឹងរាំង ខណ្ឌដូនពេញ ដើម្បីសាកសួរ រួចហើយបញ្ជូនទៅកាន់អគ្គនាយកដ្ឋានអន្តោប្រវេសន៍ ដើម្បីអនុវត្តតាមនីតិវិធីបន្ត៕