សៀមរាប៖ កាលពីថ្ងៃទី១១ មេសា ២០១៨ វេលាម៉ោងប្រហែល៤រសៀល មានហេតុការណ៍ដ៏រន្ធត់មួយ បង្កដោយប្តីចិត្តតិរច្ឆានម្នាក់ ស្រវឹងស្រាជោគជាំ បានទាស់សម្តីជាមួយមួយប្រាវ ស្រាប់តែប្តីចិត្តខ្លាំង យកចំបើងមួយបាច់ មកដុតប្រពន្ធទាំងរស់ ពេលកំពុងដេកលក់ នៅលើអង្រឹងក្រោមផ្ទះ បង្កឱ្យមានការភ្ញាក់ផ្អើលដល់សមត្ថកិច្ច ចុះឃាត់ខ្លួនជនល្មើសជាប្តី បានភ្លាមៗមកកាន់ការិយាល័យជំនាញ។
ហេតុការណ៍នេះ បានកើតឡើងនៅក្នុងភូមិគោកដូង ឃុំត្រីញ័រ ស្រុកពួក ខេត្តសៀមរាប ។ យោងតាមសម្តីលោកឧត្តមសេនីយ៍ត្រី ភឹង ចិន្តារ៉េត ស្នងការរងនគរបាលខេត្ត បានប្រាប់ឲ្យដឹងថា ជនល្មើសជាប្តីដែលបានដុតប្រពន្ធខ្លួនឯង សម្លាប់នោះមានឈ្មោះ ឡិញ ឡាយ អាយុ៥៨ឆ្នាំ ប្រកបមុខរបរជាកសិករ រស់នៅក្នុងភូមិកើតហេតុខាងលើ ចំណែកប្រពន្ធដែលរងគ្រោះ ត្រូវប្តីដុតទាំងរស់នោះ ឈ្មោះ រឿន ហេម អាយុ៥៣ឆ្នាំ។
បើតាមសម្តីរបស់អ្នកជិតខាង ដែលរស់នៅក្បែរនោះ បានរៀបរាប់ថា មុនពេលកើតហេតុ វេលាម៉ោងប្រមាណ៤រសៀល ប្តីប្រពន្ធខាងលើ បានឈ្លោះប្រកែកគ្នា ដោយកើតមានអំពើហិង្សាដាក់គ្នាផងដែរ នៅខាងក្រោមផ្ទះរបស់ជនល្មើសជាប្តី ហើយប្តីប្រពន្ធទាំង២នាក់នោះ ស្រវឹងស្រាជោគដូចគ្នា ក្រោយមកប្រពន្ធក៏បានដេកលក់ នៅលើអង្រឹងក្រណាត់សំណាញ នៅខាងក្រោមផ្ទះកើតហេតុ ។
មួយសន្ទុះក្រោយមក ស្រាប់តែគេបានឃើញបុរសជាប្តី យកចំបើង១បាច់ មករាយលើប្រពន្ធដែលកំពុងតែដេកលក់ រួចក៏យកភ្លើងមកដុតពីលើប្រពន្ធតែម្តង ធ្វើឲ្យភ្លើងបានឆាបឆេះឡើង បណ្តាលឲ្យរលាកជើងនិងដៃធ្ងន់ធ្ងរ ហើយត្រូវបានអ្នកជិតខាងប្តឹងប៉ូលិសភ្លាមៗ និងបញ្ជូនប្រពន្ធរងគ្រោះ ទៅព្យាបាលនៅមន្ទីរពេទ្យបង្អែកខេត្ត ។
បន្ទាប់ពីសមត្ថកិច្ចចុះទៅដល់ផ្ទះកើតហេតុ ក៏បានចាប់ខ្លួនបុរសជាប្តី យកទៅឃុំខ្លួននៅការិយាល័យជំនាញខេត្ត ដើម្បីកសាងសំណុំរឿងបញ្ជូនទៅតុលាការ ចាត់ការតាមផ្លូវច្បាប់ ៕
