ខេត្តស្ទឹងត្រែង៖ បុរសម្នាក់មានចិត្តជាសត្វតិរច្ឆាន បានបណ្ដែតបណ្ដោយឲ្យតណ្ហាដឹកច្រមុះ រហូតទុកឲ្យវារោលរាលឡើងយ៉ាងខ្លាំង ក៏ចាប់រំលោភកូនស្រីបង្កើតរបស់ខ្លួនបានសម្រេចជាបន្តបន្ទាប់ ទើបសមត្ថកិច្ចចុះទៅឃាត់ខ្លួន កាលពីល្ងាច ថ្ងៃទី២៥ ខែកុម្ភៈ នៅក្នុងភូមិវាលព្រីង សង្កាត់សាមគ្គី ក្រុងស្ទឹងត្រែង។
មន្ត្រីនគរបាលក្រុងស្ទឹងត្រែង បានឲ្យដឹងថា បុរសល្មោភកាមជាប់ពាក់ព័ន្ធនឹងករណីចាប់រំលោភកូនស្រីបង្កើតរបស់ខ្លួន ហើយត្រូវសមត្ថកិច្ចឃាត់ខ្លួន ឈ្មោះ ឆាយ សុភ័ណ្ឌ អាយុ៤០ឆ្នាំ មានលំនៅក្នុងភូមិវាលព្រីង សង្កាត់សាមគ្គី ក្រុងស្ទឹងត្រែង។ រីឯក្មេងរងគ្រោះ ឈ្មោះ ល ស អាយុ១២ឆ្នាំ រស់នៅជាមួយនឹងជនសង្ស័យ។
បើតាមសម្ដីរបស់ក្មេងស្រីរងគ្រោះ បានឲ្យដឹងថា នៅពេលមិនមានបងប្អូនណាម្នាក់ នៅផ្ទះឪពុករបស់នាងតែងតែចាប់នាងរំលោភសេពសន្ថវៈ រហូតបានសម្រេចជាបន្តបន្ទាប់។ ជួនកាលឪពុករបស់នាងបានបីនាងចូលទៅក្នុងព្រៃ ចាប់រំលោភនាងក៏មានដែរ។ នាងពិតជាមានការឈឺចាប់ខ្លាំងណាស់ នៅពេលឪពុកនាងចាប់រំលោភម្ដងៗ។ នាងដឹងគ្រប់យ៉ាង ក្នុងពេលឪពុកធ្វើសកម្មភាពចាប់នាងរំលោភ ប៉ុន្តែនាងមិនអាចធ្វើអ្វីកើត ដោយសារឪពុករបស់នាងតែងតែគំរាមកំហែង វាយធ្វើបាបរូបនាងជារៀងរហូត រាល់ពេលគាត់រំលោភម្ដងៗ។
ក្មេងស្រីរងគ្រោះ បានបន្តថា ជួនកាលឪពុកបង្កើតរបស់នាងបានគំរាមសម្លាប់ថា ប្រសិនបើនាងមិនឲ្យគាត់រំលោភ និងយករឿងអាស្រូវនេះទៅប្រាប់អ្នកដទៃឲ្យដឹង ឬឲ្យបែកការរឿងហ្នឹង គាត់នឹងសម្លាប់នាងចោល។ ប៉ុន្តែដោយសារនាងរងនូវការឈឺចាប់ខ្លាំងពេកទើបនាងទម្លាយរឿងអាស្រូវនេះឲ្យគេដឹង ហើយប្ដឹងទៅសមត្ថកិច្ចឃាត់ខ្លួនឪពុករបស់នាង។
ក្រោយពេលបែកការពីករណីរំលោភកូនស្រីបង្កើតនោះមក សមត្ថកិច្ចបានចុះទៅឃាត់ខ្លួនជនសង្ស័យ នាំមកកាន់អធិការដ្ឋាននគរបាល ដើម្បីសាកសួរ និងចាត់ការតាមផ្លូវច្បាប់៕