ខេត្តពោធិ៍សាត់៖ បុរសមានចិត្តឃោរឃៅម្នាក់បានបាញ់សម្លាប់ប្រពន្ធរបស់ខ្លួន ហើយរត់គេចខ្លួនចេញពីខេត្តកោះកុង ទៅសំងំលាក់ខ្ួលបានរយៈពេល១០ថ្ងៃ ក៏អស់លាក់ត្រូវមត្ថកិច្ចឃាត់ខ្លួន កាលពីវេលាម៉ោង៧ និង៣០នាទីយប់ ថ្ងៃទី២៣ ខែកុម្ភៈ ឆ្នាំ២០១៨ នៅក្នុងភូមិឆាយលូក ឃុំអូរសោម ស្រុកវាលវែង។
លោកវរសេនីយ៍ទោ ធាង ឡេង អធិការស្រុកវាលវែងបានឱ្យដឹងថា ជនសង្ស័យជាប់ពាក់ព័ន្ធនឹងករណីឃាតកម្មបាញ់សម្លាប់ប្រពន្ធរបស់ខ្លួន ហើយត្រូវសមត្ថកិច្ចប៉ុស្ដិ៍នគរបាលរដ្ឋបាលឃុំអូរសោមឃាត់ខ្លួននោះ ឈ្មោះ សេង វិបុល ភេទប្រុសអាយុ៥០ឆ្នាំ រស់នៅភូមិស្មាច់មានជ័យ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
លោកអធិការនគរបាលស្រុកវាលវែង បន្តថា កាលពីវេលាម៉ោង៨ និង៣០នាទីយប់ ថ្ងៃទី១៣ ខែកុម្ភៈ ឆ្នាំ២០១៨កន្លងទៅនេះ មានករណីបាញ់សម្លាប់ស្រ្ដីម្នាក់ នៅក្នុងភូមិស្មាច់មានជ័យ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ហើយករណីនេះបានបង្កឡើង ដោយបុរសជាប្ដី។ បន្ទាប់ពីបាញ់សម្លាប់ប្រពន្ធរួចហើយ ជនសង័្សយក៏បានរត់គេចចេញពីភូមិឋានរបស់គេរស់នៅ ហើយនៅសំងំលាក់ខ្លួន នៅក្នុងភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់។
លោកអធិការនគរបាលដដែល បានបន្តថា ក្រោយមក សមត្ថកិច្ចខេត្តកោះកុងបានទាក់ទងមកលោកឧត្តមសេនីយ៍ទោ សារុន ចាន់ធី ស្នងការនគរបាលខេត្តពោធិ៍សាត់ និងនគរបាលស្រុកវាលវែង ចុះស្រាវជ្រាវ ក៏ដឹងពីកន្លែងលាក់ខ្លួនរបស់ជនសង្ស័យ ទើបចុះទៅចាប់ខ្លួនតែម្តង។
ក្រោយពេលចាប់ខ្លួន សមត្ថកិច្ចនគរបាលស្រុកវាលវែងបានធ្វើកំណត់ហេតុប្រគល់ជនសង័្សយទៅឱ្យសមត្ថកិច្ចនគរបាលខេត្តកោះកុងនៅថ្ងៃទី២៤ ខែកុម្ភៈនេះ ដើម្បីនាំទៅចាត់ការតាមច្បាប់៕
