ភ្នំពេញ៖ បន្ទាប់ពីលេចលឺរឿងអាស្រូវបង្ហោះរូបភាពវីដេអូ អាក្រាតកាយ មួយកំណាត់លើរបស់បុគ្គលិកខារ៉ាអូខេ និងរាំស្រើបស្រាលជាមួយភ្ញៀវនៅក្នុងបន្ទប់រ៉ាអូខេ កូឡូសូ (COLOSO) ស្ថិតនៅផ្ទះលេខ ៥២ ផ្លូវ៣៥០ សង្កាត់បឹងកេងកង៣ ខណ្ឌចំការមន កម្លាំងគណៈបញ្ជារឯកភាពខណ្ឌចំការមន ដឹកដោយលោក ព្រុំ សំខាន អភិបាលនៃគណៈអភិបាលខណ្ឌចំការមន ដោយមានការចូលរួម ពីលោកស្រី គឹម វណ្ណា ប្រធានមន្ទីទេសចរណ៍ រាជាធានីភ្នំពេញ និងលោកស្រី កែវ សុគន្ធា ព្រះរាជអាជ្ញារង អមសាលាដំបូង រាជធានីភ្នំពេញ ព្រមទាំងមានការ សហការ ជាមួយនិងកម្លាំងកងរាជអាវុធហត្ថ និង សមត្ថកិច្ចខណ្ឌចំការមន ចុះបិទទីតាំងខារ៉ាអូខេខាងលើជាបណ្តោះអាសន្ន កាលពីវេលាម៉ោង៨យប់ ថ្ងៃទី២៣ ថ្ងៃទីកុម្ភះ ឆ្នាំ២០១៨ ។
តាមប្រសាសន៍លោក ព្រុំ សំខាន់ អភិបាលនៃគណៈអភិបាលខណ្ឌចំការមន បានឱ្យដឹងថា មុនពេលកម្លាំងបានចុះបិទទីតាំង ខារ៉ាអូខេ ខាងលើនេះ បន្ទាប់ពីមានការបង្ហោះរូបភាព អាក្រាតកាយមួយកំណាត់លើ របស់នារីបំរើការក្នុងខារ៉ាអូខេជាមួយភ្ញៀវ នៅក្នុងបន្ទប់ ខារ៉ាអូខេ ដែលធ្វើឱ្យប៉ះពាល់ដល់ កិត្តិយសនារីខ្មែរ និង ភាពមានអសីលធម៌ ក្នុងសង្គម ទើបលោកបានចាត់កម្លាំង តាមដាន និង ស៊ើបអង្កេត ទទួលដំណឹងថា ទីតាំងខាងលើ គឺពិតជាមានបុគ្គលិករាំជាមួយភ្ញៀវ បែបនេះពិតប្រាកដមែន ។
លោកអភិបាលខណ្ឌចំការមនបានឱ្យដឹងទៀតថា បន្ទាប់ពីស្រាវជ្រាវដឹងពិតប្រាកដថា ពិតជាមានទង្វើធ្វើឱ្យប៉ះពាល់ដល់កិតិ្តយសស្រ្តីខ្មែរ និងសង្គមហើយ លោកបានសុំគោលការណ៍ ពីព្រះរាជ្ញា និង មានការចូលរួមពីលោកស្រី គឹម វណ្ណា ប្រធានមន្ទីរទេសចរណ៍ បានចុះបិទ និងផ្អាកអាជីវកម្ម ខារ៉ាអូខេ ចំនួន៣៤ បន្ទប់ខាងលើ ចាប់ម៉ោង១១យប់ ថ្ងៃទី២៣កុម្ភះ ឆ្នាំ២០១៨នេះ តទៅ រហូតដល់មានបញ្ជាជាថ្មី ទើបអាចដំណើរការបានធម្មតាវិញ ៕
