ខេត្តកណ្តាល៖ ព្រះសង្ឃមួយអង្គ មានតួនាទីជាព្រះគ្រូសូត្រស្តាំ និងជាសមណនិស្សិត នៃសាលាភូមិមន្ទរដ្ឋបាល និងត្រូវជាក្មួយបង្កើតរបស់ព្រះគ្រូចៅអធិការវត្តស្វាយជ្រំ និងជាអនុគណស្រុកខ្សាច់កណ្តាល បានរងនូវការចោទប្រកាន់ពីនារីវ័យក្មេងម្នាក់ថា ព្រះអង្គជាព្រះសង្ឃបារាជិក បានលួងលោមនាងនាំទៅសេពមេថុនធម្ម (រួមភេទ) ហើយមិនទទួលខុសត្រូវ ទើបនឹងប្ដឹងទៅកាន់សាលាដំបូង ដើម្បីសុំឲ្យតុលាការ ជួយរកយុត្តិធម៌ឲ្យនាង។
ប្រភពព័ត៌មានពីមន្ត្រីនគរបាលស្រុកខ្សាច់កណ្ដាល បានឲ្យដឹងថា ព្រះសង្ឃមួយអង្គ ដែលរងនូវការចោទប្រកាន់ថា បារាជិកចាប់នារីរងគ្រោះសេពមេថុនធម្ម (រួមភេទពាក្យសម្រាប់ព្រះសង្ឃ)នោះ មានព្រះនាម លន់ សុវណ្ណដា មានតួនាទីជាគ្រូសូត្រស្ដាំ និងជាសមណនិស្សិត នៃសាលាភូមិន្ទរដ្ឋបាល ហើយសព្វថ្ងៃគង់នៅវត្តស្វាយជ្រំ ស្ថិតក្នុងភូមិស្វាយជ្រំ ឃុំស្វាយជ្រំ ស្រុកខ្សាច់កណ្តាល ខេត្តកណ្តាល។ រីឯនារីដែលអះអាងថាជាជនរងគ្រោះ និងជាដើមបណ្តឹងនោះ ឈ្មោះ ប រ អាយុ១៩ឆ្នាំ មានលំនៅស្រុកខ្សាច់កណ្ដាល។
បើតាមសម្ដីរបស់នារីរងគ្រោះ បានឲ្យដឹងថា កាលពីអំឡុងឆ្នាំ២០១៣ ខណៈនាងទើបនឹងមានអាយុ១៣ឆ្នាំ រៀនថ្នាក់ទី៧ នៃអនុវិទ្យាល័យស្វាយជ្រំ ត្រូវបានព្រះគ្រូសូត្រស្តាំព្រះនាម លន់ សុវណ្ណដា បានប្រើនាងឲ្យទៅទិញបបរមកព្រះគេនព្រះអង្គឆាន់។ បន្ទាប់ពីឆាន់បបររួច សង្ឃកំហួចអង្គនោះ បានបិទទ្វារបន្ទប់កុដិរបស់ព្រះអង្គជិត ហើយបានលួងលោម និងចាប់នាងសេពមេថុនធម្ម រហូតបានសម្រេច នៅក្នុងកុដិនោះ។ បន្ទាប់មកព្រះសង្ឃបារាជិកអង្គនោះ ក៏បានលួងលោមដោយប្រើសម្ដីដ៏ផ្អែមល្ហែមដាក់នាង កុំឲ្យនាងយករឿងអាស្រូវទាំងនោះប្រាប់គេឯង ដោយព្រះអង្គសន្យាថា នៅពេលលាចាកសិក្ខាបទ (សឹក) ព្រះអង្គនឹងចូលស្តីដណ្តឹងនាងរៀបការ តាមប្រពៃណីយកគ្នាធ្វើជាប្ដីប្រពន្ធ។
នារីរងគ្រោះ បានបន្តថា ដោយសារសម្ដីដ៏ផ្អែមល្ហែមបែបនេះ បានធ្វើឲ្យនាងទន់ចិត្ត និងបានប្រកាន់ទោសអូសដំណើរ ដោយនឹកនៅក្នុងចិត្តថា បើអង្ករក្លាយជាបាយទៅហើយ ហើយព្រះអង្គទទួលខុសត្រូវរឿងហ្នឹង ទើបនាងសុខចិត្តសំងំនៅស្ងៀម។ ចាប់តាំងពីពេលនោះ ទំនាក់ទំនងស្នេហា រវាងនាង និងសង្ឃទ្រុស្ដសីលអង្គនោះ បានក៏ចេះតែបន្ដសេពមេថុនធម្មនឹងគ្នារហូតមក ដោយអូសបន្លាយរយៈពេល៥ឆ្នាំ។ លុះមកដល់អំឡុងឆ្នាំ២០១៥ នាងក៏មានផ្ទៃពោះ ហើយត្រូវកំពូលស្នេហ៍របស់នាងបានឲ្យនាងមករំលូតកូនចេញ នៅក្នុងរាជធានីភ្នំពេញ។
នារីរងគ្រោះ បានបន្តថា បើទោះជាយ៉ាងនេះក្ដី ក៏ទំនាក់ទំនងស្នេហា រវាងនាង និងព្រះគ្រួសូត្រស្តាំអង្គនោះ នៅតែមានភាពស្អិតល្មួតនឹងគ្នា ហើយរាល់ពេលយប់ថ្ងៃ នាង និងព្រះគ្រូសូត្រស្ដាំអង្គនេះ បានឆាតហ្វេសប៊ុកជាមួយគ្នាទៅវិញទៅមក ធ្វើឲ្យនាងដកខ្លួនមិនរួច ហើយចេះតែណាត់ជួប និងដេកនៅជាមួយគ្នាជាបន្តបន្ទាប់រហូតរាប់រយដង។
នារីរងគ្រោះដដែលបានបន្តថា ដោយសារតែលង់នឹងសម្ដី និងបានខ្លួនប្រាណនាងរាប់រយដង ធ្វើឲ្យនាងចេះតែទន្ទឹងរង់ចាំឲ្យព្រះអង្គសិឹក ប៉ុន្តែព្រះគ្រូសូត្រស្តាំអង្គនោះ នៅតែមិនព្រមសឹកចូលស្តីដណ្ដឹងនាងឡើយ។ លុះចូលមកដល់ក្នុងអំឡុងឆ្នាំ២០១៧-២០១៨ ស្នេហាលួចលាក់ រវាងនាង និងព្រះគ្រូសូត្រស្តាំអង្គនោះ ចេះតែមានរឿងរកាំរកូសរហូត ដោយសារព្រះសង្ឃអង្គនោះ ចេះតែភូតរហូត ដោយឲ្យនាងទន្ទឹងរង់ចាំពីមួយឆ្នាំទៅមួយឆ្នាំថា ចូលដណ្តឹងនាង។
នារីរងគ្រោះដដែល បានបន្តថា បន្ទាប់ពីរង់ចាំអស់រយៈពេល៥ឆ្នាំរួចមក ខ្លួនប្រាណរបស់នាងក៏បានប្រគល់ឲ្យសព្វបែបយ៉ាងទៅព្រះគ្រូសូត្រស្ដាំអង្គនោះអស់ហើយ ស្រាប់តែមួយរយៈពេលចុងក្រោយនេះ បែរជានាងចុចទូរស័ព្ទចូល ក៏លែងលើកលេខនាង ដោយបម្រុងដោះដៃមិនទទួលខុសត្រូវ។ ដោយសារតែបញ្ហានេះបានធ្វើឲ្យនាងឈឺចាប់ រហូតទ្រាំលែងបាន ក៏សម្រេចចិត្តទម្លាយរឿងនេះ ប្រាប់អ្នកសារព័ត៏មាន និងដាក់ពាក្យប្ដឹងទៅតុលាការខេត្តកណ្តាល ឲ្យជួយរកយុត្តិធម៌ជូននាង និងដើម្បីកុំឲ្យព្រះសង្ឃបារាជិកអង្គនេះ ធ្វើបាបនារីផ្សេងបន្តទៀតដូចជារូបនាង។
ទោះជាយ៉ាងណាេ ទាក់ទិននឹងការលើកឡើងខាងលើនេះ KBN មិនអាចទាក់ទងសុំការបំភ្លឺពីព្រះគ្រូសូត្រស្ដាំ លន់ សុវណ្ណដា បានទេ នាល្ងាចថ្ងៃទី២៣ ខែកុម្ភៈ ឆ្នាំ២០១៨នេះ។ ដោយឡែក ព្រះគ្រូចៅអធិការវត្តស្វាយជ្រំ ព្រះនាម លន់ សុគន្ធា និងជាអនុគណស្រុកខ្សាច់កណ្តាល បានមានថេរដីកាថា រឿងនេះមិនពិតទេ ពីព្រោះខាងស្រីចង់បានលុយ និងបង្ខូចកិត្តិយកឈ្មោះព្រះសង្ឃ៕