ខេត្តមណ្ឌលគិរី៖ បុរសមួយក្រុមបាននាំគ្នាកែច្នែគ្រាប់បែកទៅបោក ស្រាប់តែភ្លាត់ស្នៀតផ្ទុះជះអម្បែងខ្ទាតមកត្រូវ បណ្ដាលឲ្យរងរបួសធ្ងន់២នាក់ កាលពីវេលាម៉ោង១០ និង៣០នាទីព្រឹក ថ្ងៃទី២២ ខែកុម្ភៈ នៅក្នងចំណុចអូរអញ្ជ័រ ស្ថិតក្នុងភូមិអន្ត្រេះ ឃុំអរបួន ស្រុកកោះញែក។
លោក ខ្លូត សុឃា អធិការស្រុកកោះញែក បានឲ្យដឹងថា ជនរងគ្រោះទាំង២នាក់ខាងលើ ទី១-ឈ្មោះ ផុន ញ៉ អាយុ៥៤ឆ្នាំ និងទី២-ឈ្មោះ ខាន់ ណា អាយុ២៤ឆ្នាំ ហើយពួកគេទាំងពីរស្នាក់នៅភូមិឃុំខាងលើ ដោយខ្នាក់រងរបួសដាច់ដៃ និងម្នាក់ទៀតបែកគ្រាប់ភ្នែក ព្រមទាំងមានស្នាមរបួសពេញខ្លួន។
ប្រភពព័ត៌មានពីអ្នកភូមិអន្ត្រេះ បានឲ្យដឹងថា មុនពេលកើតហេតុ ពួកគេទាំង២នាក់បានយករំសេវមកដល់នៅក្នុងកំប៉ុងទឹកដោះគោ រួចហើយដាក់គ្រាប់គីប និងបង្ហាប់ឲ្យណែ ដើម្បីច្នៃជាគ្រាប់បែកកយកទៅបោកត្រី។ បន្ទាប់ពីកែច្នៃរួចហើយ ពួកគេក៏យកទៅបោកត្រី ប៉ុុន្តែដោយសារពួកគេកែច្នៃខុសលក្ខណៈបច្ចេកទេស ក៏ផ្ទុះបណ្ដាលឲ្យរងរបួសធ្ងន់ទាំង២នាក់។ ភ្លាមៗនោះ សមត្ថកិច្ចបានចុះទៅដល់កន្លែងកើតហេតុ និងដឹកពួកគេបញ្ជូនទៅកាន់មន្ទីរពេទ្យបង្អែកស្រុក ដើម្បីសង្គ្រោះ ប៉ុន្តែដោយសារតែមុខរបួសរបស់ពួកគេធ្ងន់ខ្លាំងពេក ទើបក្រុមគ្រួសារបានបញ្ជូនទៅសង្គ្រោះនៅមន្ទីរពេទ្យខេត្តមណ្ឌលគិរី ។
លោក ទុយ ស្រស់ ប្រធានស្តីទីមន្ទីរពេទ្យបង្អែកខេត្ត បានឲ្យដឹងថា ជនរងគ្រោះម្នាក់រងរបួសធ្ងន់ ត្រូវបញ្ជូនទៅសង្គ្រោះ នៅក្នុងមន្ទីរពេទ្យ ឯភ្នំពេញ និងម្នាក់ទៀតបញ្ជូនទៅសង្គ្រោះដូចគ្នា ប៉ុន្តែបញ្ជូនទៅពេលក្រោយ។ ជនរងគ្រោះទាំង២នាក់ខាងលើ ម្នាក់រងរបួសដាច់ដៃ ទាំងសងខាង និងម្នាក់ទៀតបានរងរបួសឆេះរោលរាលរបួសពេញខ្លួន និងបែកគ្រាប់ភ្នែក ៕
