ខេត្តឧត្តរមានជ័យ៖ នារីវ័យក្មេងម្នាក់បានប្រឡងធ្លាក់មុខវិជ្ជាគណិតវិទ្យា ធ្វើឲ្យនាងតូចចិត្តមានគំនិតគិតខ្លី សរសេរពាក្យបណ្ដាំទុកឲ្យជីតាមើល ហើយយកក្រមាមកចងកសម្លាប់ខ្លួន បង្កឲ្យភ្ញាក់ផ្អើលឡើង កាលពីវេលាម៉ោង៦ និង២០នាទីល្ងាច ថ្ងៃទី២១ ខែកុម្ភ: ឆ្នាំ២០១៨ នៅក្នុងភូមិថ្មី ឃុំថ្លាត ស្រុកអន្លង់វែង។
មន្ត្រីនគរបាលស្រុកអន្លង់វែង បានឲ្យដឹងថា នារីវ័យក្មេងដែលគិតខ្លីចងកសម្លាប់ខ្លួនោះ ឈ្មោះ មាស ស្រីដា អាយុ ១៨ឆ្នាំ មុខរបរជាសិស្សសិស្សថ្នាក់ទី១១ រស់នៅភូមិរំចេក ឃុំ-ស្រុកអន្លង់វែង ហើយបច្ចុប្បន្នស្នាក់នៅជាមួយជីដូនជីដូន នៅភូមិឃុំកើតហេតុខាងលើ។ នារីរងគ្រោះបានយកកន្សែងពោះគោចងកសម្លាប់ខ្លួននឹងដើមត្រសេក ដែលមានកម្ពស់១,៩០ម៉ែត្រ នៅក្នុងព្រៃបុស្សមានចម្ងាយ១០០ម៉ែត្រពីខាងជើងផ្ទះរបស់នាង
មន្ត្រីនគរបាលដដែល បានបន្តថា បន្ទាប់ពីបានទទួលនូវព័ត៌មានបែបនេះភ្លាម អធិការនគរបាលស្រុកបានចាត់តាំងកម្លាំងជំនាញ និងប៉ុស្តិ៍រដ្ឋបាល ចុះទៅពិនិត្យដល់កន្លែងកើតហេតុ ដោយរកឃើញលិខិតជាភាសាអង់គ្លេសមួយច្បាប់ដែលនារីរងគ្រោះសរសេរ ហើយទុកនៅក្នុងកាតាបរៀនរបស់នាង ដែលមានន័យថា៖ “សុំទោស! ខ្ញុំប្រឡងគណិតវិទ្យាធ្លាក់ ខ្ញុំខ្មាស់គេណាស់ ខ្ញុំជាសិស្សខ្សោយគណិតវិទ្យា ខ្ញុំចង់តែយំ និងចង់សម្លាប់ខ្លួនឯង”។
មន្ត្រីនគរបាលដដែល បានបន្តថា បន្ទាប់ពីពិនិត្យ និងធ្វើកោសល្យវិច័យរួចមក ដោយឃើញមិនមានស្លាក់ស្នាមអ្វីគួរឲ្យសង្ស័យ និងមានសំបុុត្រដែលនារីរងគ្រោះសរសេរទុកនៅក្នុងកាតាបរបស់នាងផង ទើបសមត្ថកិច្ចសន្និដ្ឋានថា ជនរងគ្រោះបានចងកសម្លាប់ខ្លួននេះ ក៏ដោយសារនាងខូចចិត្តនឹងការប្រឡងធ្លាក់នូវមុខវិជ្ជាគណិតវិទ្យា។
ជាមួយគ្នានេះ សមត្ថកិច្ចក៏បានក្រើនរំឭកដល់សិស្សានុសិស្សទាំងអស់ ក៏ដូចជាបងប្អូនប្រជាពលរដ្ឋ មិនត្រូវរឿងអ្វីបន្តិចបន្តួច បែរជាគិតខ្លីធ្វើអំពើបែបនេះទេ។ បើការងារណាមួយយើងធ្វើមិនទាន់សម្រេច យើងត្រូវតែខិតខំព្យាយាមធ្វើវារហូតបានសម្រេច ទើបវាប្រសើរ។ ប៉ុន្តែបើយើងសម្រេចចិត្តចងកសម្លាប់ខ្លួនបែបនេះ គឺជាទង្វើមួយដ៏គួរឲ្យខ្មាសអៀនទៅវិញទេ៕