ភ្នំពេញ៖ បន្ទាប់ពីក្រុមហ៊ុនមួយចំនួន បាននាំឱសថបំប៉នផ្លូវភេទបុរស ” GOOD MAN ” នោះមក ក្រសួងសុខាភិបាល នៃព្រះរាជាណាចក្រកម្ពុជា កលាពីថ្ងៃអង្គារ ទី២០ ខែកុម្ភៈ ឆ្នាំ២០១៨កន្លងទៅថ្មីៗនេះ បានចេញនូវសេចក្ដីជូនដំណឹងរបស់ខ្លួន ព្រមានថា នឹងចាត់វិធានការ តាមច្បាប់ ចំពោះក្រុមហ៊ុន ឬឱសថស្ថានទាំងឡាយណាដែលនាំចូល និងចែកចាយនូវឱសថបំប៉នផ្លូវភេទបុរស ដោយពុំបានចុះបញ្ជិកា និងត្រួតពិនិត្យគុណភាពត្រឹមត្រូវ ពីមន្ត្រីជំនាញរបស់កម្ពុជា។
យោងតាមសេចក្ដីជូនដំណឹងរបស់ក្រសួងសុខាភិបាល នៃព្រះរាជាណាចក្រកម្ពុជា បានឲ្យដឹងថា កាលពីពេលថ្មីៗនេះ ក្រសួងសុខាភិបាល
បានពិនិត្យឃើញថា មានការផ្សព្វផ្សាយនូវផលិតផលឱសថបំប៉នផ្លូវភេទបុរស «GOOD MAN» តាមប្រព័ន្ធ facebook ដោយមិនបានចុះបញ្ជិកា និងត្រួតពិនិត្យពីគុណភាពត្រឹមត្រូវពីមន្ត្រីជំនាញរបស់កម្ពុជា។ នៅក្នុងនោះដែរ ក្រសួងបានស្រាវជ្រាវរកឃើញថា មានក្រុមហ៊ុនមួយឈ្មោះ Wining International Trade Co; Ltd ដែលមានមូលដ្ឋាននៅក្នុងទីក្រុងហុងកុង ប្រទេសចិន បានផ្សព្វផ្សាយនូវផលិតផលឱសថខាងលើនេះ ដោយអួតអាងហួសពីការពិតថា ឱសថបំប៉នផ្លុវភេទបុរសនោះ (GOOD MAN) នឹងជួយបុរសដែលអសមត្ថភាពផ្លូវភេទ មានឱកាសផ្ដល់ភាពសុខស្រួលដល់ដៃគូរួមភេទរបស់ខ្លួនបានដោយងាយបំផុត ពីព្រោះឱសថនេះមានសមត្ថភាពខ្ពស់ នៅក្នុងការព្យាបាលជំងឺ «ក្រលៀន តម្រង់នោម ក្រពេញប្រ៉ូស្តាត អ័រម៉ូន ជាពិសេស បង្កើនតណ្ហាផ្លូវភេទបុរសឲ្យបានខ្លាំង និងរឹងបានយូរ» ហើយឱសថនេះក្នុងមួយកំប៉ុងមាន៦០គ្រាប់ ផលិតនៅក្នុងប្រទេសអាមេរិក។
សេចក្ដីជូនដំណឹងដដែលនោះ បានបន្តថា ដោយសារតែមានការអួតអាងហួសពីការពិតបែបនេះ ទើបក្រសួងចុះពិនិត្យ និងបានចាត់ទុកការផ្សព្វផ្សាយនូវឱសថបំប៉នផ្លូវភេទបុរស Good Man របស់ក្រុមហ៊ុនខាងលើថាជាការឃោសនាភូតកុហក បោកប្រាស់លុយកាក់ពីពលរដ្ឋ និងមានចេតនាបំផ្លិចបំផ្លាញសុខុមាលភាពរបស់ពលរដ្ឋ។ ក្រសួងសូមបញ្ជាក់ថា៖ «ឱសថសម្រាប់បំប៉នផ្លូវភេទបុរសខាងលើនេះ គ្មានចុះបញ្ជិកា គ្មានការត្រួតពិនិត្យ គ្មានការអនុញ្ញាតឲ្យនាំចូល និងគ្មានការអនុញ្ញាតឲ្យផ្សព្វផ្សាយពីក្រសួងសុខាភិបាលឡើយ»។
ដោយសារតែគិតគូរដល់បញ្ហាសុខភាពរបស់ប្រជាពលរដ្ឋ និងជីវភាពរបស់ប្រជាពលរដ្ឋជាចម្បងនោះ ក្រសួងសុខាភិបាលសូមអំពាវនាវដល់សាធារណជន ក៏ដូចជាក្រុមហ៊ុនដែលបាន និងកំពុងផ្សព្វផ្សាយ ព្រមទាំងចែកចាយឱសថខាងលើ នាពេលកន្លងមកនេះ ត្រូវបញ្ឈប់នូវសកម្មភាពរបស់ខ្លួនជាបន្ទាន់។ «បើមិនដូច្នោះទេ ក្រសួងនឹងមានចំណាត់ការតាមផ្លូវច្បាប់ ក្នុងករណីក្រសួងពិនិត្យ និងរកឃើញថា ក្រុមហ៊ុន ឬឱសថស្ថាន និងជនណាមួយនៅបន្តការផ្សព្វផ្សាយនូុវឃោសនាភូតកុហក បោកប្រាស់ពលរដ្ឋ និងកំពុងជួញដូរ ហើយប្រើប្រាស់នូវឱសថខាងលើនេះបន្តទៀត»៕