ខេត្តកណ្ដាល៖ បន្ទាប់ពីមានអ្នកទោសស្លាប់នៅក្នុងពន្ធនាគារខេត្តកណ្ដាលនោះមក ហើយប្រធានពន្ធនាគារចេញមុខអះអាងថា អ្នកទោសធ្វើអត្តឃាត ប៉ុន្តែនៅពេលនេះ តុលាការបានរកឃើញថា អ្នកទោសស្លាប់ដោយសារអំពើហិង្សាវាយតប់គ្នា នៅក្នុងពន្ធនាគារ។
ប្រភពព័ត៌មានពីមន្ត្រីតុលាការ បានឲ្យដឹងថា នៅពេលនេះ តុលាការបានរកឃើញពីមូលហេតុ នៃការស្លាប់របស់អ្នកទោស នៅក្នុងពន្ធនាគារខេត្តកណ្ដាល កាលពីចុងខែធ្នូ ឆ្នាំ២០១៧ហើយ ក្រោយពេលស៊ើបអង្កេតជាបន្តបន្ទាប់ តាមរយៈការសាកសួរព័ត៌មាននានា និងប្រមូលភស្តុតាងសព្វគ្រប់។ លទ្ធផល នៃការស៊ើបអង្កេតនោះ បានបង្ហាញថា ការស្លាប់របស់អ្នកទោស ក្នុងពន្ធនាគារខេត្តកណ្ដាលនេះ គឺ «ពុំមែនជាការលោតចេញពីស៊ីទែនទឹក ដើម្បីសម្លាប់ខ្លួន ដូចរបាយការណ៍របស់ប្រធានពន្ធនាគារនោះឡើយ។ ករណីនេះ គឺកើតឡើងដោយសារការវាយតប់គ្នា រវាងអ្នកទោស និងអ្នកទោស ទើបបណ្ដាលឱ្យអ្នកទោសម្នាក់ស្លាប់បែបនេះ»។
ប្រភពព័ត៌មានដដែល បានបន្តទៀតថា ទោះជាយ៉ាងណា លោក ចាត ស៊ីនាង ប្រធានពន្ធនាគារខេត្តកណ្ដាល មិនត្រូវបានព្រះរាជអាជ្ញារង នៃអយ្យការអមសាលាដំបូងខេត្តកណ្ដាល ចោទប្រកាន់នោះទេ ដោយសារករណីនេះ ពុំជាប់ពាក់ព័ន្ធនឹងរូបលោក។ ដោយឡែក អ្នកទោស១២នាក់ ជាប់ពាក់ព័ន្ធនឹងករណីនេះ ត្រូវសមត្ថកិច្ចបញ្ជូនសំណុំរឿងទៅជូនចៅក្រមស៊ើបសួរ នៃសាលាដំបូងខេត្តកណ្ដាល ចាត់ការបន្តតាមនីតិវិធី។
ប្រភពព័ត៌មានដដែល បានបន្តថា អ្នកទោសទាំង១២នាក់នេះ ត្រូវបានលោក ឯក ស៊ុនរស្មី ព្រះរាជអាជ្ញារង នៃអយ្យការអមសាលាដំបូងខេត្តកណ្ដាល ចោទប្រកាន់ពីបទ «ផ្តើមគំនិត» «សមគំនិត» «បទហិង្សាដោយចេតនា» និង «បទហិង្សាដោយចេតនាមានស្ថានទម្ងន់ទោស» ដោយសារមរណភាព នៃជនរងគ្រោះ តាមមាត្រា២៨ មាត្រា២៩ មាត្រា២១៧ និងមាត្រា២២៤ នៃក្រមព្រហ្មទណ្ឌ។
ប្រភពព័ត៌មានពីមន្ត្រីពន្ធនាគារខេត្តកណ្ដាល បានឲ្យដឹងថា ជនត្រូវចោទ ឈ្មោះ មុត លីណាន ភេទប្រុស អាយុ៣១ឆ្នាំ(អ្នកស្លាប់ក្នុងគុក) ត្រូវបានតុលាការចោទប្រកាន់ពីបទ «ធ្វើឱ្យខូចខាតដោយចេតនា» ដែលបានប្រព្រឹត្តនៅភូមិទេពអរជូន ឃុំកោះខែល ស្រុកស្អាង កាលពីថ្ងៃទី១២ ខែធ្នូ ឆ្នាំ២០១៧ តាមមាត្រា៤១០ នៃក្រមព្រហ្មទណ្ឌ។ បន្ទាប់មក ជនត្រូវចោទ ឈ្មោះ មុត លីណាន ត្រូវបានលោក គឹម ម៉េង ចៅក្រមស៊ើបសួរ នៃសាលាដំបូងខេត្តកណ្តាល សម្រេចឃុំខ្លួន កាលពីថ្ងៃទី១៣ ខែធ្នូ ឆ្នាំ២០១៧ ។ លុះមកដល់ចុងខែធ្នូ ឆ្នាំ២០១៧ ក៏ឮព័ត៌មានមកថា ជនត្រូវចោទ ឈ្មោះ មុត លីណាន បានលោតសម្លាប់ខ្លួន នៅក្នុងស៊ីទែនផ្ទុកទឹកដ៏ធំ នៅក្នុងពន្ធនាគារ។
ប្រភពព័ត៌មានដដែល បានបន្តថា បន្ទាប់ពីមានការភ្ញាក់ផ្អើលពីករណីនេះរួចមក ទើបមានការស៊ើបអង្កេត ហើយអ្នកដឹងរឿងរ៉ាវនេះ ក៏បានអះអាងថា «មិនមែនជាករណីលោតសម្លាប់ខ្លួននោះទេ គឺជាករណីវាយតប់គ្នា នៅក្នុងពន្ធនាគារ»។
លោក ណុស បូផល មេធាវីតំណាងឲ្យម្ដាយរបស់ជនរងគ្រោះ បានថ្លែងថា កាលដែលម្តាយរបស់ជនរងគ្រោះប្តឹងទៅតុលាការ គឺចង់ឱ្យតុលាការស្វែងការពិត ក្នុងករណីនេះ។ ម្តាយរបស់ជនរងគ្រោះ បានអះអាងថា «នៅលើសាកសពកូនប្រុសរបស់គាត់ មានស្លាកស្នាមជាច្រើន នេះបញ្ជាក់ថា កូូនរបស់គាត់មិនបានលោតសម្លាប់ខ្លួនពីស៊ីទែនទឹក នៅក្នុងពន្ធនាគារនោះទេ»។
ទោះជាយ៉ាងណា ក្រោយពេលមានអ្នកទោសស្លាប់នៅក្នុងពន្ធនាគារនោះមក លោក ចាត ស៊ីនាង ប្រធានពន្ធនាគាខេត្តកណ្តាល បានអះអាងថា អ្នកទោសដែលស្លាប់នោះ គឺគេបានលោតសម្លាប់ខ្លួន មិនមែនជាការវាយតប់គ្នានោះឡើយ។
ក្រោយពីមានអ្នកទោសវាយតប់គ្នា នៅក្នុងពន្ធនាគារ បណ្ដាលឲ្យមានអ្នកស្លាប់បែបនេះ ធ្វើឲ្យមជ្ឈដ្ឋានទូទៅ រិះគន់យ៉ាងខ្លាំងដល់មន្ត្រីពន្ធនាគារ ជាពិសេស គឺប្រធានពន្ធនាគារតែម្ដង ដែលគ្រប់គ្រងមិនបានល្អ។ រីឯពន្ធនាគារមួយចំនួនទៀត មានទាំងការជួយដូរថ្នាំញៀនទៀតផង ដូច្នេះសូមក្រសួងមហាផ្ទៃ ក៏ដូចជាស្ថាប័ន្ធពាក់ព័ន្ធ មេត្តាចាត់វិធានការលើករណីនេះផង៕