ខេត្តបន្ទាយមានជ័យ៖ រថយន្តក្រុងក្រុមហ៊ុនប្លូបឹសមួយគ្រឿង បានដឹកប្រហិតសាច់មាន់ជិត២តោន និងធុងពណ៌ជាតិគ្លុយកូស្ស៊ីរ៉ូ ១៥០ធុងដុត ក៏ត្រូវសមត្ថកិច្ចស្ទាក់ចាប់បាន ហើយយកទៅកម្ទេចចោល កាលពីល្ងាចថ្ងៃទី២២ ខែមករា ឆ្នាំ២០១៨ នៅទីលានចាក់សំរាម ក្រុងសិរីសោភ័ណ។
មន្ត្រីការិយាល័យនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានឲ្យដឹងថា កាលពីយប់ ថ្ងៃទី២១ ខែមករា ឆ្នាំ២០១៨ មន្ត្រីនគរបាលជំនាញបានស្ទាក់ចាប់រថយន្តក្រុងមួយគ្រឿង ពាក់ស្លាក់លេខ ភ្នំពេញ 3C-8811 នៅតាមផ្លូវជាតិលេខ៥ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ដោយឆែកឆេររកឃើញប្រហិតសាច់មាន់ជិត២តោន និងធុងពណ៌ជាតិគ្លុយកូស្ស៊ីរ៉ូ ១៥០។
មន្ត្រីនគរបាលដដែល បានបន្តថា បន្ទាប់ពីឆែកឆេរឃើញវត្ថុតាងខុសច្បាប់ សមត្ថកិច្ចក៏ដកហូតយកមករក្សាទុក។ លុះមកដល់ព្រឹក ថ្ងៃទី២២ ខែមករា ឆ្នាំ២០១៨ មន្ត្រីចម្រុះបានត្រួតពិនិត្យ រកឃើញមានប្រហិតសាច់មាន់ដែលវេចខ្ចប់ខុសបច្ចេកទេសចំនួន៥៥ការុង មានទម្ងន់ ១៧៦០គីឡូក្រាម និងធុងពណ៌ជាតិគ្លុយកូស្ស៊ីរ៉ូ១៥០ធុង និងទំនិញគ្មានពន្ធជាច្រើនទៀត។
មន្ត្រីការិយាល័យនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានបញ្ជាក់ថា ចំពោះប្រហិតសាច់មាន់ដែលវេចខ្ចប់ខុសបច្ចេកទេស និងធុងពណ៌ជាតិគ្លុយកូស្ស៊ីរ៉ូ ត្រូវបានកម្លាំងនគរបាលប្រឆាំងបទល្មើសខេត្តប្រគល់ជូនមន្ត្រីកាំកុងត្រូលខេត្ត ដើម្បីយកទៅដុតកម្ទេចចោល នៅទីលានចាក់សំរាម ក្រុងសិរីសោភ័ណ នាល្ងាចថ្ងៃដដែលនោះ។ រីឯទំនិញមួយចំនួនទៀតដែលគ្មានច្បាប់ និងពន្ធ ត្រូវប្រគល់ជូនមន្ត្រីគយ និងរដ្ឋាករខេត្ត ដើម្បីចាត់ការតាមច្បាប់៕
