ប្រទេសថៃ៖ អតីតមេជនអន្ធពាលជប៉ុនម្នាក់ ជាប់ពាក់ព័ន្ធនឹងអំពើឃាតកម្ម បានរត់គេចខ្លួនពីប្រទេសកំណើតរបស់ខ្លួន មករៀបការជាមួយស្រ្ដីជនជាតិថៃ និងសំងំលាក់ខ្លួនអស់រយៈពេល១៤ឆ្នាំ នៅក្នុងប្រទេសថៃ ទើបសមត្ថកិច្ចឃាត់ខ្លួនបាន ខណៈកំពុងដើរទិញទំនិញ នៅក្នុងផ្សារ Lopburi នាភាគខាងជើង ទីក្រុងបាងកក។
ប្រភពព័ត៌មានពីសមត្ថកិច្ចថៃ បានឲ្យដឹងថា ជនសង័្សយដែលត្រូវសមត្ថកិច្ចថៃចាប់ខ្លួន ឈ្មោះ Shigeharu Shirai អាយុ៧៤ឆ្នាំ ជាអតីតចៅហ្វាយនាយរបស់ក្រុមអន្ធពាល Yakuza ។ ជននេះមានការជាប់ពាក់ព័ន្ធនឹងអំពើឃាតកម្ម ដែលបានប្រព្រឹត្ត នៅក្នុងប្រទេសជប៉ុន ហើយគាត់បានរត់គេចខ្លួនពីប្រទេសកំណើតរបស់គាត់ មកសំងំលាក់ខ្លួន នៅក្នុងប្រទេសថៃ និងយកប្រពន្ធជាជនជាតិថៃទៀតផង។ រីឯការឃាត់ខ្លួនេះ គឺសមត្ថកិច្ចថៃបានធ្វើឡើង បន្ទាប់ពីមានរូបថតសាក់ពេញគួរឲ្យចាប់អារម្មណ៍របស់គាត់ ត្រូវបានគេបង្ហោះនៅតាមប្រព័ន្ធអ៊ីនធឺរណេត ហើយដឹងដល់សមត្ថកិច្ចជប៉ុន ក៏បានទាក់ទងមកប៉ូលិសថៃចុះទៅចាប់ខ្លួនគាត់ កាលពីថ្ងៃពុធ កន្លងទៅថ្មីៗនេះ ខណៈគាត់ដើរទិញអីវ៉ាន់ នៅក្នុងឡៅបុរី នាភាគខាងជើងក្រុងបាងកក។
ប្រភពព័ត៌មានដដែល បានបន្តថា បន្ទាប់ពីគាត់បានចូលនិវត្តន៍ពីមេខ្លោងអន្ធពាល មកសំងំលាក់ខ្លួន នៅក្នុងប្រទេសថៃ អស់រយៈពេលជាង១០ឆ្នាំមក សហការីជាជនជាតិជប៉ុនរបស់គាត់តែងតែមកលេងប្រទេសថៃ និងជួបគាត់ ពីរទៅបីដង ក្នុងមួយឆ្នាំ ដោយនាំយកអំណោយមកជូនគាត់ ដើម្បីធ្វើឲ្យជីវិតរបស់គាត់រស់នៅ ដោយសុខស្រួល។
ប្រភពព័ត៌មានដដែល បានបន្តថា បន្ទាប់ពីមានការចែករំលែករូបសាក់នៅលើដងខ្លួនរបស់អតីតមេក្រុមអន្ធពាល Yakuza នោះមក ធ្វើឲ្យអ្នកលេងបណ្ដាញសង្គមមានការចាប់អារម្មណ៍យ៉ាងខ្លាំង ហើយចែករំលែកគ្នាពីមួយទៅមួយ ក៏ដឹងដល់ប៉ូលិសជប៉ុន ហើយទាក់ទងមកអាជ្ញាធរថៃ។
បើយោងសេចក្តីថ្លែងការណ៍របស់ប៉ូលិសថៃ បានឲ្យថា លោក Shirai នឹងត្រូវប្រឈមមុខនឹងច្បាប់ នៅក្នុងប្រទេសថៃ ពីព្រោះគាត់មិនមានទិដ្ឋាការចូលមកក្នុងប្រទេសថៃ ហើយប្រទេសទាំង២នឹងធ្វើបត្យាប័នបញ្ជូនជនសង័្សយត្រឡប់ទៅកាន់ប្រទេសជប៉ុនវិញ។ បើតាមសម្ដីរបស់ជនសង័្សយ បានសារភាពថា គាត់គឺជាមេក្រុមទំនើង Kodokai ជាបុត្រសម្ព័ន្ធរបស់ Yakuza នៅក្នុងប្រទេសជប៉ុន។
អ្នកនាំពាក្យប៉ូលិសថៃ លោកស្រីឧត្តមសេនីយ៍ Wirachai Songmetta បាននិយាយសំដៅទៅបុត្រសម្ព័ន្ធរបស់ក្រុមអន្ធពាល Yakuza ដ៏ ធំជាងគេរបស់ជប៉ុន។ លោកស្រីបានបន្ថែមទៀតថា «ទោះជាយ៉ាងណា ជនសង្ស័យមិនបានសារភាពចំពោះអំពើឃាតកម្មនោះទេ ប៉ុន្តែគាត់បានទទួលស្គាល់ថា គាត់គឺជាជនរងគ្រោះដែលត្រូវគេប្រើ ដើម្បីធ្វើបាបគាត់»។
ក្រុមអន្ធពាល Yakuza នេះបានបង្កនូវភាពវឹកវរ នៅក្នុងសង្គ្រាមជប៉ុន ហើយបានពង្រីកខ្លួនយ៉ាងឆាប់រហ័ស រហូតបង្កើតបានជាអង្គការចាត់តាំងមួយ ដោយមានលុយរាប់ពាន់លានដុល្លារ តាមរយៈការប្រព្រឹត្តនូវបទល្មើសនានា ដូចជា បើកបនល្បែង គ្រឿងញៀនពេស្យាចារ និងឧក្រិដ្ឋកម្ម។ ពួកគេត្រូវបានចាត់ទុកថា ជាក្រុមដ៏អាក្រក់បំផុតមួយ។ ក្រុមនេះមានមេធំៗចំនួន២២នាក់ ហើយពួកគេមានសមាជិកប្រហែលជាង២ម៉ឺននាក់។ ក្រៅពីការលក់គ្រឿងញៀន និងល្បែងខុសច្បាប់ ក្រុមអន្ធពាលនេះក៏រកប្រាក់ចំណូលបាន នៅក្នុងអាជីវកម្មផ្នែកសំណង់ ហិរញ្ញវត្ថុ និងសន្តិសុខទៀតផង៕