ខេត្តបាត់ដំបង៖ ក្មេងស្ទាវមួយក្រុម បន្ទាប់ពីវាយប្រហារទៅលើជនរងគ្រោះ បណ្ដាលឲ្យស្លាប់ម្នាក់ ហើយរត់គេចខ្លួនបានរយៈពេល១០ថ្ងៃ ក៏ត្រូវសមត្ថកិច្ចស្រាវជ្រាវ រហូតឃាត់ខ្លួន កាលពីរសៀល ថ្ងៃទី១៩ ខែមករា ឆ្នាំ២០១៨។
មន្ត្រីកងរាជអាវុធហត្ថ បានឱ្យដឹងថា ជនសង្ស័យទាំង៣នាក់ជាប់ពាក់ព័ន្ធនឹងករណីឃាតកម្មខាងលើ ដែលសមត្ថកិច្ចឃាត់ខ្លួន ទី១-ឈ្មោះ ជីប ធឺន ហៅជៀប ធឿន ភេទប្រុស អាយុ២២ឆ្នាំ មុខរបរមិនពិតប្រាកដ រស់នៅភូមិគារ៣ ឃុំគារ ស្រុកមោងឫស្សី ខេត្តបាត់ដំបង ទី២-ឈ្មោះ សាយ សឹង្ហ ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅភូមិវត្តលៀប សង្កាត់ចំការសំរោង ខេត្តបាត់ដំបង និងទី៣-ឈ្មោះ វង្ស វី ភេទប្រុស អាយុ១៨ឆ្នាំ មុខរបរធ្វើស្រែ រស់នៅភូមិរាមគន់ ឃុំគារ ស្រុកមោងឫស្សី ខេត្តបាត់ដំបង។ រីឯជនរងគ្រោះ ទី១-ឈ្មោះ ណែម ធា ភេទប្រុស អាយុ២៧ឆ្នាំ មុខរបរជាពលករធ្វើការងារ នៅក្នុងប្រទេសថៃ (ស្លាប់) មានលំនៅក្នុងភូមិជ្រៃ២ ឃុំជ្រៃ ស្រុកមោងឫស្សី ទី២-ឈ្មោះ ទឿប ភន ភេទប្រុស អាយុ២៣ឆ្នាំ មុខរបរធ្វើស្រែ(រងរបួសធ្ងន់) មានលំនៅក្នុងភូមិជ្រៃ២ ឃុំជ្រៃ ស្រុកមោងឫស្សី និងទី៣-ឈ្មោះ មឿត រឿ ភេទប្រុស អាយុ២២ឆ្នាំ មុខរបរធ្វើស្រែ (រងរបួសធ្ងន់) រស់នៅភូមិពោធិ៍១ ឃុំគារ ស្រុកមោងឫស្សី ខេត្តបាត់ដំបង។
មន្ត្រីអាវុធហត្ថដដែល បានបន្តថា មុនពេលកើតហេតុ យុវជនម្នាក់ទើបនឹងត្រឡប់មកពីប្រទេសថៃ ហើយក៏បាននាំមិត្តភក្ដិ ២នាក់ទៀតទៅផឹកស៊ី និងជជែកគ្នាលែងយ៉ាងសប្បាយ រហូតដល់ស្រវឹងជោកជាំ។ លុះមកដល់វេលាម៉ោង៨ និង១៥នាទីយប់ ថ្ងៃទី៩ ខែមករា ឆ្នាំ២០១៧ ពួកគេក៏បានដើរត្រឡប់មកដល់ភូមិរាមគន់ ឃុំគារ ស្រុកមោងឫស្សី ក៏ជួបនឹងក្មេងស្ទាវមួយក្រុម មានគ្នា៤នាក់ជិះម៉ូតូ២គ្រឿង។ នៅពេលនោះ ពួកគេក៏មើលមុខគ្នាទៅវិញទៅមក បង្កឲ្យប៉ះទង្គិចពាក្យសម្តីគ្នាបន្តិចបន្តួច ទើបភាគីរងគ្រោះឈប់ម៉ូតូ។ ភ្លាមៗនោះ ស្រាប់តែជនបង្កបានស្ទុះទៅទាញទាញកាំបិត និងចបជីកដេញដេញវាយសំពង និងកាប់ប្រហារទៅលើយុវជនទាំង៣នាក់ បណ្តាលឲ្យស្លាប់យ៉ាងអណោចអធ័មម្នាក់ និង២នាក់ផ្សេងទៀតរងរបួសធ្ងន់ ហើយក្មេងទំនើងទាំងនោះ ក៏បានគេចខ្លួនបាត់អស់ ដោយបានបន្សល់ទុកតែម៉ូតូ ចបជីក និងកាំបិតនៅនឹងកន្លែង។
មន្ត្រីអាវុធហត្ថដដែល បានបន្តថា បន្ទាប់ពីកើតមាននូវអំពើឃាតកម្មបែបនេះ សមត្ថកិច្ចជំនាញក៏បានសហការគ្នាស្រាវជា រហូតឃាត់ខ្លួនជនសង្ស័យបាន ហើយនាំមកសាកសួរ។ នៅចំពោះមុខសមត្ថកិច្ច ជនសង្ស័យបានសារភាពថា មូលហេតុដែលពួកគេវាយ និងកាប់ទៅលើជនរងគ្រោះនោះ គឺដោយសារជនរងគ្រោះជិះម៉ូតូសម្លឹងមើលមុខបក្សពួកខ្លួន ហើយជនរងគ្រោះបានចុះមកវាយពួកខ្លួនមុន ទើបពួកខ្លួនវាយ និងកាប់ជនរងគ្រោះ បណ្ដាលឱ្យរបួស និងស្លាប់បែបនេះតែម្តង។
ក្រោយពេលឃាត់ខ្លួន សមត្ថកិច្ចបានបញ្ជូនជនសង្ស័យទាំង ៣នាក់ទៅកាន់ការិយាល័យព្រហ្មទណ្ឌរបស់កងរាជអាវុធហត្ថខេត្តបាត់ដំបង ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់៕