ភ្នំពេញ៖ បុរសជាឪពុក សុំកូនស្រីទៅច្រៀងខារ៉ាអូខេ អោយបានសប្បាយចិត្ត តាំងពីក្មេងរហូតមកដល់ វ័យពាក់កណ្ដាលជីវិតទៅហើយ មិនដែលចូលច្រៀងខារ៉ាអូខេទេ ទីបំផុតបែរជាដាច់ចិត្ត ទៅចងកសម្លាប់ខ្លួន នៅកាំជណ្តើរឡើងផ្ទះជាន់ទី៣ បង្កការភ្ញាក់ផ្អើល ប្រជាពលរដ្ឋចោមរោមមើល និងសមត្ថកិច្ចព័ទ្ធកន្លែងកើតហេតុ កាលពីវេលាម៉ោង ១២និង៣០នាទីរំលងអាធ្រាត ឈានចូលថ្ងៃទី១៩ ខែ មករា ឆ្នាំ២០១៨ នៅចំណុចច្រកជណ្តើរផ្ទះលេខ១៧ តាមផ្លូវ៣១០ ស្ថិតនៅភូមិ១ សង្កាត់ទួលស្វាយព្រៃទី១ ខណ្ឌចំការមន ។
បុរសចងកសម្លាប់ខ្លួន មានឈ្មោះ វន សូយទ្រី អាយុ៤៩ឆ្នាំ ស្នាក់នៅផ្ទះលេខ៦E1 ផ្លូវ២៩៨ ភូមិ១ សង្កាត់ទួលស្វាយព្រៃទី១ ខណ្ឌចំការមន មានស្រុកកំណើតនៅភូមិ៤ ឃុំស្វាយឃ្លាំង ស្រុកក្រូចឆ្មា ខេត្តត្បូងឃ្មុំ ។
តាមសម្តីរបស់កូនស្រីបង្កើត មានឈ្មោះ តាំង ហ្គិចហួង អាយុ២៦ឆ្នាំ មុខរបរលក់ដូរ ស្នាក់នៅផ្ទះលេខ៦E1 ផ្លូវ២៩៨ ស្ថិតនៅភូមិ១ សង្កាត់ទួលស្វាយព្រៃទី១ ខណ្ឌចំការមន បានរៀបរាប់ប្រាប់សមត្ថកិច្ច ទាំងទឹកភ្នែកនិងហួសចិត្តថា លោកឱពុកគាត់ មិនគួរណាធ្វើបែបនេះទេ យប់មិញនៅវេលាម៉ោង ១០និង៣០នាទីយប់ ថ្ងៃទី១៨ ខែមករា ឪពុកបានប្រាប់ថា ថ្ងៃនេះសុំទៅច្រៀងខារ៉ាអូខេ ជាមួយមិត្តភ័ក្រ្ត អោយបានសប្បាយចិត្តម្ដង ធ្វើឲ្យរូបគាត់ជាកូន គិតថាប្លែក កន្លងមកមិនដែលឃើញឪពុក ទៅច្រៀងខារ៉ាអូខេទេ គ្រាន់តែនឹកក្នុងចិត្តឆ្ងល់ដែរ តែបើឪពុកប្រាប់អញ្ចឹងហើយ ក៏អោយប្ដីដែលត្រូវជាកូនប្រសារ អោយបើករថយន្តជូនគាត់ ទៅកន្លែងណា ដែលឪពុកចង់ទៅ បែរជាឱពុកប្រាប់ថា មិនបាច់ទេគាត់មានអ្នកមកយក ចាំតែបន្តិចមកដល់ហើយ ទើបមិនបានឲ្យកូនប្រសាជូនទៅទេ គឺតាមចិត្តគាត់ចង់សប្បាយ ព្រោះមិនដែលងាយ ឃើញលោកឱពុកស្លៀកពាក់ ខោអាវស្អាតបាទទេ ។
កូនស្រីបន្តទៀតថា ក្រោយពីលោកឱពុក ទៅបានកន្លះម៉ោង ទូរស័ព្ទសួរគាត់ម្ដង គាត់លើកនិយាយធម្មតា ក៏សួរថា ប៉ាច្រៀងចប់ពេលណា ប្រាប់កូនមក កូននឹងទៅយកប៉ាទៅហាងវិញ។ រហូតលុះដល់ម៉ោង ១១និង៣០នាទីយប់ បាត់យូរពេក ទូរស័ព្ទអត់ចូលទៀត ធ្វើឲ្យមានការព្រួយបារម្ភ បានអោយប្ដីជូនទៅ តាមរកគ្រប់កន្លែង ដោយទៅមើលនៅស្ពានច្បារអំពៅ និងសួរនាំអ្នករត់ម៉ូតូឌុប និងផ្ដាំផ្ញើរ បើសិនមានរូបរាងនិងភិនភាគ ដូចឪពុករបស់គេ ជួយផ្ដល់ព័ត៌មានអោយរូបគាត់ផងហើយ ។
បន្ទាប់ពីដើររកឪពុក គ្រប់ច្រកល្ហកហើយ ចុងក្រោយក៏ត្រលប់មកផ្ទះវិញ ដេកក៏មិនលក់ រហូតដល់ម៉ោង៥ទៀបភ្លឺ មានប្រជាពលរដ្ឋឆោឡោថា មានបុរសម្នាក់ចងកសម្លាប់ខ្លួន នៅក្បែរផ្ទះគាត់មួយផ្លូវ ក៏នាំគ្រួសារទៅមើល ទើបឃើញបុរសចងក សម្លាប់ខ្លួនជាឱពុកបង្កើត ពិតប្រាកដមែន ដោយចងកសម្លាប់ខ្លួន នៅកាំជណ្តើរឡើងទៅលើផ្ទះជាន់ទី៣ ។
កូនស្រីបានបន្តទៀតថា មូលហេតុដែលឪពុកចងក សម្លាប់ខ្លួនសង្ស័យ មកពីគាត់តូចចិត្ត បន្ទាប់ពីគាត់ទៅប្រទេសថៃ វះកាត់ដុំសាច់គីស នៅថ្ពាល់ខាងឆ្វេង តែគ្រូពេទ្យនៅប្រទេសថៃ បានប្រាប់ថា អាចព្យាបាលបាន មិនទាន់ដល់កំរិតមហារីកនោះទេ ក្រោយពីត្រលប់មកដល់ផ្ទះវិញ បានរយៈពេល២ខែមកហើយ ឪពុកតែងតែប្រាប់ថា កន្លែងវះដុំសាច់គីសគាត់ មានអារម្មណ៍ឈឺ ហើយដេកមិនលក់ដែរ តែគាត់ប្រាប់ឪពុកថា បើមិនស្រួលចាំកូន ជូនទៅប្រទេសថៃម្ដងទៀត តែមិនទាន់បានទៅផង គាត់ដាច់ចិត្តសម្លាប់ខ្លួនឯង ចោលប្រពន្ធកូនទៅហើយ ហើយក្រុមគ្រួសារមិនប្ដឹងផ្ដល់អ្វីទេ ដោយសារឪពុកបានថតវីដេអូឃ្លីប នៅក្នុងទូរស័ព្ទរបស់គាត់ ដោយនិយាយថា គាត់នឹងស្លាប់ ដោយសារជំងឺគាត់ មើលមិនជាទេ មានតែស្លាប់បញ្ចប់ជីវិត ពេលដែលគាត់ចងកសម្លាប់ខ្លួន ទើបឆែកមើលទូរស័ព្ទឃើញ មានរូបថតដែលគាត់ថត នៅក្នុងទូរស័ព្ទទុកផ្ដាំផ្ញើរ អោយកូនចៅ ។
ទោះបីជាយ៉ាងណា កូនបានឲ្យសមត្ថកិច្ចចុះមកត្រួតពិនិត្យសព ឱពុកគាត់ឃើញមុខរបួស មានស្នាមរយះបំពង់កធំ ដោយសារតែយកខ្សែគោរឹតកខ្លាំងពេក បណ្ដាលអោយមានស្នាមរលាត់ ហើយខ្សែរិតយូរៗទៅទើប មានស្នាមរយះធំបែបនេះណា ។ ក្រោយពីនិត្យសពរួច ប្រគល់ឲ្យប្រពន្ធកូនយកទៅធ្វើបុណ្យ តាមប្រពៃណីនៅស្រុកកំណើត នៅភូមិ៤ ឃុំស្វាយឃ្លាំង ស្រុកក្រូចឆ្មា ខេត្តត្បូងឃ្មុំ ៕
