ភ្នំពេញ៖ គ្រោះថ្នាក់ចរាចរណ៍គួរឱ្យរន្ធត់ និងតក់ស្លុតមួយបង្កឡើងដោយរថយន្តកុងតឺន័រមួយគ្រឿង បើកគេចម៉ូតូមួយគ្រឿង ជ្រុលចង្កូតទៅបុកម៉ូតូមួយគ្រឿងទៀតជិះគ្នា ៤នាក់ពេញទំហឹង បណ្តាលឱ្យបុរសចំណាស់ម្នាក់ជាជីតា ប្តីប្រពន្ធ ស្លាប់រណូករណែល និងកូនប្រុសអាយុមួយខួបកន្លះរងបួសធ្ងន់ ដែលហេតុការណ៍ ដ៏រន្ធត់នេះបានកើតឡើងនៅវេលាម៉ោង ៦និង១០នាទីព្រលប់ ថ្ងៃទី១៨ ខែមករា ឆ្នាំ២០១៨ ជិតវត្តស្លែង ផ្លូវជាតិលេខ៣ ភូមិពងទឹក សង្កាត់ពងទឹក ខណ្ឌដង្កោ ។
សពជនរងគ្រោះ មានឈ្មោះ ១.ម៉ៅ មុត ភេទប្រុស អាយុ ៧៥ឆ្នាំ មុខរបរកសិករ ត្រូវជាជីតា ២.ឈ្មោះ មុត សុគា ភេទស្រី អាយុ២៥ឆ្នាំ មុខរបរកម្មកររោងចក្រ ត្រូវជាប្រពន្ធ ៣.ឈ្មោះ ចាន្ថា ភេទប្រុស អាយុ ២៥ឆ្នាំ មុខរបរជាងដាក់ស្លាកយីហោ និង ៤.ឈ្មោះ មុត ផានី ភេទប្រុស អាយុ ១ឆ្នាំកន្លះ ត្រូវជាកូនរងរបួសធ្ងន់ ។ ជនរងគ្រោះទាំងបួននាក់ស្នាក់នៅ ភូមិព្រៃប្រាសាទ ឃុំដើមឬស ស្រុកកណ្ដាលស្ទឹង ខេត្តកណ្តាល ។
តាមប្រភពព័ត៌មានពីកន្លែងកើតបានឱ្យដឹងថា មុនកើតហេតុ គេបានឃើញក្រុមគ្រួសារមួយ ដែលមានគ្នា ៤នាក់ បានជិះម៉ូតូម៉ាកហុងដាឌ្រីម សេរី ឆ្នាំ២០១៦ពណ៌ខ្មៅ ពាក់ស្លាកលេខ ភ្នំពេញ 1FY-8878 បានធ្វើដំណើរតាមផ្លូវជាតិលេខ៣ ក្នុងទិសដៅពីជើងទៅត្បូង ។
ខណៈមកដល់ចំនុចកើតហេតុ ស្រាប់តែមានរថយន្តសណ្តោងកុងតឺន័រ មួយគ្រឿងម៉ាក INTERNATIONAL ពណ៌ឈាមជ្រូក ពាក់ស្លាកលេខ ភ្នំពេញ 3A-9057 បានធ្វើដំណើរតាមផ្លូវ ជាតិលេខ៣ ក្នុងទិសដៅពីត្បូងទៅជើង ក្នុងល្បឿនលឿន ហើយមកដល់ចំនុចខាងលើ បានបួងចង្កូតគេចចេញពីម៉ូតូមួយគ្រឿងទៀត ដែលកំពុងតែដួលនៅពីមុខ ទើបធ្វើឱ្យរថយន្តជ្រុលចង្កូតទៅបុកនិងម៉ូតូ ដែលជិះជាលក្ខណៈគ្រួសារ មានជីតា ប្តីប្រពន្ធ និងកូនតូច ចំពីមុខពេញទំហឹង បណ្តាលឱ្យអ្នករួមដំណើរទាំង ៤នាក់ហោះខ្ទាតចេញក្រៅ ខ្លះចូលក្រោមរថយន្ត គាបជាប់នៅក្រោមរថយន្តស្លាប់ និងនៅក្រៅរថយន្តចំនួន ៣នាក់ គឺជីតា និងប្តីប្រពន្ធ ចំនែកកូនប្រុសតូចរងរបួសធ្ងន់ ត្រូវបានរថយន្តសង្គ្រោះ បានមកដឹកយកទៅសង្គ្រោះនៅ មន្ទីរពេទ្យគន្ធបុប្ផា ។
ដោយខាងរថយន្តបង្ក ភ្លាមៗនោះដែរ អ្នកបើកបរបានបើកទ្វារចុះពីលើរថយន្ត រត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុ ។
ប្រភពដដែលបានបន្តទៀតថា បន្តិចក្រោយមក ឃើញមានសាច់ញាតិបងប្អូន ជនរងគ្រោះ បានមកយំសោកឱប សពជនរងគ្រោះ ទាំងទឹកភ្នែកហូរ និងអារម្មណ៍សោកសៅបំផុត ។
ក្រោយពេលកើតហេតុ ឃើញមានសមត្ថកិច្ចមូលដ្ឋាននិងជំនាញខណ្ឌ បានចុះទៅកន្លែងកើតហេតុ រួចហើយបានទំនាក់ទំនងទៅខាងជំនាញចរាចរណ៍ក្រុង ឱ្យមកធ្វើកំណត់ហេតុប្រគល់សពជនរងគ្រោះ ទាំង បីនាក់ឱ្យទៅក្រុមគ្រួសារយកទៅធ្វើបុណ្យនៅស្រុកកំណើត ខេត្តកណ្តាល ។
ចំនែកម៉ូតូនិ ងរថយន្តបង្កត្រូវបាន សមត្ថកិច្ចយកទៅរក្សាទុក នៅការិយាល័យចរាចរណ៍ជើងគោក រាជធានីភ្នំពេញដើម្បីដោះស្រាយ ។ បើតាមក្រុមគ្រួសារជនរងគ្រោះ ដែលមកយំសោកឱប សពជនរងគ្រោះទាំង ៣នាក់បាន បង្ហើបឱ្យដឹងថា ក្រុមគ្រួសារជនរងគ្រោះទាំង ៤នាក់នេះមកពីស្រុកកំណើត ដើម្បីទៅបើកថ្នាំនៅមន្ទីរពេទ្យ ។
ពេលបើកថ្នាំរួចហើយ បានចូលលេងផ្ទះបងប្អូននៅភ្នំពេញ រហូតដល់ម៉ោងកើតហេតុ ទើបធ្វើដំណើរត្រឡប់ទៅស្រុកកំណើតវិញ ក៏ជួបគ្រោះថ្នាក់អកុសលបែបនេះតែម្តង ៕
