ភ្នំពេញ៖ បុរសជាមេការសំណង់ម្នាក់ បានជិះម៉ូតូធន់ធំក្នុងល្បឿនលឿនមកដល់ចំណុចផ្លូវងងឹត បានជ្រុលទៅបុកនិងម៉ូតូសណ្តោងរ៉ឺម៉កដែលធ្វើដំណើរក្នងទិសដៅស្របគ្នា ចំពីក្រោយពេញទំហឹង បណ្តាលឱ្យអ្នកបើកម៉ូតូដួលបោកក្បាលផុងលលាដ៍ក្បាលស្លាប់នៅកន្លែង កើតហេតុ ចំនែកអ្នកបើកម៉ូតូសណ្តោងរ៉ឺម៉ក រងរបួសស្រាល ហេតុការណ៍នេះបានកើតឡើង នៅវេលាម៉ោង ៩យប់ ថ្ងៃទី១៨ ខែមករា ឆ្នាំ២០១៨ ចំនុចតំបន់វាលស្ងាត់ ផ្លូវ៦០ម៉ែត្រ ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ ។
សពជនរងគ្រោះមានឈ្មោះ ហ៊ុន តុលា ភេទប្រុស អាយុ ២៩ឆ្នាំ មុខរបរមេការសំនង់ ស្នាក់នៅផ្ទះជួល សង្កាត់ចាក់អង្រែក្រោម ខណ្ឌមានជ័យ មានស្រុកកំណើតនៅឃុំបារាយ ស្រុកបារាយ ខេត្តកំពង់ធំ ជិះម៉ូតូធន់ធំម៉ាក YAMAHA FZ ពណ៌ខ្មៅ ពាក់ស្លាកលេខ ភ្នំពេញ 1BV-2656 ។ ចំនែកម្ចាស់រ៉ឺម៉ក ក៏មិនទាន់ស្គាល់អត្តសញ្ញាណ ដោយសារស្រវឹងខ្លាំងពេក ។
តាមប្រភព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញ បុរសម្នាក់វ័យជាង ៤០ឆ្នាំ បានបើកម៉ូតូសណ្តោងរ៉ឺម៉ក អត់មានស្លាកលេខ និងគ្មានភ្លើងបំភ្លឺផ្លូវ បានធ្វើដំណើរតាមផ្លូវ ៦០ម៉ែត្រ ក្នុងទិសដៅពីត្បូងទៅជើង ។
ខណៈមកដល់ចំនុចកើតហេតុ ដែលជាផ្លូវស្ងាត់ ហើយងងឹតទៀតនោះ ក៏ស្រាប់តែមានបុរសម្នាក់វ័យ ៤០ឆ្នាំ មិនដឹងថាគោលបំណងទៅណានោះទេ គឺបានជិះម៉ូតូ ធន់ធំម៉ាក YAMAHA FZ ពណ៌ខ្មៅ ធ្វើដំណើរ ក្នងទិសដៅស្របគ្នា ក្នុងល្បឿនលឿនដូចហោះ ហើយណាមួយផ្លូវងងឹតផងនោះ បានជ្រុលទៅបុកនិងម៉ូតូសណ្តោងរ៉ឺម៉កពីក្រោយពេញទំហឹង បណ្តាលឱ្យអ្នកបើកម៉ូតូហោះផ្លោង បោកក្បាលផុងលលាដ៍ ស្លាប់នៅកន្លែងកើតហេតុ គួរឱ្យអណោចអធ័មបំផុត ។ ចំនែកម៉ូតូវិញ រងការខូចខាត ខ្ទេចផ្នែកខាងមុខស្ទើរតែទាំងស្រុង ។
ដោយឡែកអ្នកបើកម៉ូតូសណ្តោងរ៉ឺម៉ក វិញរងរបួស ក្រឡិត មុខមាត់តិចតួច មិនបានទៅមន្ទីរពេទ្យនោះទេ ពេលសមត្ថកិច្ចហៅសួរនាំ ស្រាប់តែបុរសជាអ្នកម៉ូតូសណ្តោងរ៉ឺម៉ក ធំក្លិនស្រាហួង ហើយនិយាយស្តីវង្វេងវង្វាន់ លែងដឹងអ្វីទាំងអស់ ក៏ត្រូវសមត្ថកិច្ចឃាត់ខ្លួនផងដែរ ។
ក្រោយពេលកើតហេតុ ឃើញមានសមត្ថកិច្ច ជំនាញបានចុះទៅកន្លែងកើតហេតុ រួចហើយបានទំនាក់ទំនងទៅខាងជំនាញចរាចរណ៍ក្រុងឱ្យ មកធ្វើលិខិតប្រគល់សពជនរងគ្រោះ ឱ្យក្រុមគ្រួសារសាច់ញាតិយកទៅធ្វើបុណ្យនៅស្រុកកំណើត ខេត្តកំពង់ធំ ។
ចំនែកម៉ូតូ និងរ៉ឺម៉ក ព្រមទាំងអ្នកបើករ៉ឺម៉កសណ្តោង ត្រូវសមត្ថកិច្ចវាស់វែងយកម៉ូតូ រក្សារទុកនៅការរិយាល័យចរាចរណ៍ជើងគោក រាជធានីភ្នំពេញដើម្បីរង់ចាំធ្វើការដោះស្រាយ ៕
