ខេត្តពោធិ៍សាត់៖ ក្មេងស្រីអាយុ១៣ឆ្នាំម្នាក់ ចេញពីសាលារៀនដើរទៅផ្ទះ ក៏ត្រូវយុវជនទំនើងស្ទាក់ផ្លូវ ប៉ុនប៉ងចាប់រំលោភ ធ្វើឲ្យនាងភ័យខំប្រឹងរើបម្រះ ហើយក៏ត្រូវជននេះចាក់សម្លាប់ បង្កឲ្យមានការភ្ញាក់ផ្អើលដល់មិត្តភក្ដិ២នាក់ រត់មកជួយ និងត្រូវជនល្មើសចាក់ប្រហារ បណ្ដាលឲ្យរងរបួសធ្ងន់ កាលពីវេលាម៉ោង៧យប់ ថ្ងៃទី១៨ ខែមករា ឆ្នាំ២០១៨ នៅក្នុងឃុំសន្ទ្រែ ស្រុកភ្នំក្រវាញ ។
មន្ត្រីការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តពោធិ៍សាត់ថា ជនសង្ស័យដែលសមត្ថកិច្ចឃាត់ខ្លួន ឈ្មោះ ង៉ុយ អ៊ី ភេទប្រុស អាយុ២២ឆ្នាំ រស់នៅក្នុងភូមិក្សេត្របុរី ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់។
រីឯក្មេងស្រីរងគ្រោះ ឈ្មោះ យឿន យ៉ា ភេទស្រី អាយុ១៣ឆ្នាំ (ស្លាប់) មុខរបរជាសិស្សថ្នាក់ទី៤ រស់នៅភូមិក្សេត្របុរី ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់។ រីឯមិត្តភក្ដិដែលមកជួយជនរងគ្រោះឲ្យគេចផុតពីការចាប់រំលោភរបស់ជនសង្ស័យនោះ ទី១-ឈ្មោះ យី ប៉េស ភេទប្រុស អាយុ២៣ឆ្នាំ ទី២-ឈ្មោះ បូន ភិន ភេទប្រុស និងទី៣-ឈ្មោះ ឌឿន ដា ភេទប្រុស រស់នៅក្នុងភូមិកើតហេតុ។
ប្រភពព័ត៌មាន បានឲ្យដឹងថា មុនពេលកើតមានករណីចាប់រំលោភនោះ ក្មេងស្រីរងគ្រោះទើបនឹងចេញពីសាលារៀនដើរតាមផ្លូវរទេះត្រឡប់ទៅផ្ទះរបស់នាង។ លុះពេលនាងធ្វើដំណើរមកដល់ចំណុចកើតហេតុដែលជាកន្លែងស្ងាត់ ស្រាប់តែលេចមុខជនសង្ស័យចាំស្ទាក់ផ្លូវ ស្ទុះមកចាប់ដៃនាងអូសចូលទៅក្នុងព្រៃ ព្យាយាមប៉ុនប៉ងរំលោភសេពសន្ថវៈ។ ប៉ុន្តែពេលនោះ ក្មេងស្រីរងគ្រោះបានព្យាយាមខំប្រឹងរើបម្រះ ក៏ធ្វើឲ្យមានការប្រតាយប្រតប់គ្នា ហើយជនសង្ស័យក៏បានចាក់ប្រហារទៅលើក្មេងស្រីរងគ្រោះ បណ្ដាលឲ្យស្លាប់យ៉ាងអណោចអធ័មរំពេច។ នៅពេលឮសម្រែកជនរងគ្រោះស្រែកឲ្យជួយបែបនេះ មិត្តភក្ដិរបស់នាង ៣នាក់ក៏បានរត់មកជួយអន្តរាគមន៍ ជួយសង្គ្រោះជនរងគ្រោះ ក៏ត្រូវជនល្មើសចាប់ប្រហារមកលើ បណ្ដាលឲ្យរងរបួសធ្ងន់ ហើយជនល្មើសរងរបួសស្រាល។
ប្រភពព័ត៌មានផ្សេងទៀត បានបន្តថា មុនពេលកើតហេតុ ក្មេងស្រីរងគ្រោះចេញពីសាលារៀន ហើយដើរតាមផ្លូុវរទេះ លុះពេលនាងដើរមកដល់កន្លែងស្ងាត់ ស្រាប់តែជនសង័្សយបានស្ទុះមកចាប់រំលោភជនរងគ្រោះ ទើបនាងស្រែកហៅគេជួយ។ ស្របពេលនោះ មានយុវជនរងគ្រោះ៣នាក់កំពុងតែដើររកក្របីបាត់ ហើយឮសំឡេងមនុស្សស្រែក ក៏ស្ទុះមកជួយ តែត្រូវជនសង្ស័យឈ្មោះ ង៉ុយ អ៊ី ចាក់មួយកាំបិតចំពោះ បណ្តាលឲ្យរងរបួសធ្ងន់ម្នាក់។ ឃើញហេតុដូច្នេះមិត្តភក្តិយកអ្នករបួសរត់ចេញ ហើយត្រូវជនសង្ស័យដេញតាម តែតាមមិនទាន់ ទើបជនសង្ស័យបែរទិសដៅ ត្រឡប់មកចាក់នារីរងគ្រោះឈ្មោះ យឿន យាំ បណ្តាលឲ្យប្រកាច់ស្លាប់ភ្លាមៗមួយរំពេច រួចហើយគេបានរត់គេចខ្លួនបាត់។
បើតាមការបំភ្លឺរបស់សាក្សីម្នាក់ទៀត បានបញ្ជាក់ឲ្យដឹងថា ជនសង្ស័យ ង៉ុយ អ៊ី បានគេចពីកន្លែងកើតហេតុសំដៅទៅផ្ទះគូដណ្តឹងរបស់ខ្លួន។ លុះមកដល់វេលាម៉ោង៧ និង៣៥នាទីយប់ ថ្ងៃដដែល ជនសង្ស័យបានយកដែលកាំបិតចាក់ទៅលើក្មេងស្រីរងគ្រោះមួយកាំបិតចំដើមដោះខាងឆ្វេង មកចាក់ខ្លួនឯងចំពោះ បណ្ដាលឲ្យរងរបួស រួចគ្រាគូដណ្តឹងសំដៅមកផ្ទះរបស់ខ្លួន ហើយមានការភ្ញាក់ផ្អើលពីក្រុមគ្រួសាររបស់ជនរងគ្រោះជាគូដណ្តឹង ទើបសមត្ថកិច្ចចុះទៅឡោមព័ទ្ធចាប់ជនសង្ស័យតែម្តង។
ក្រោយពេលកើតហេតុ សមត្ថកិច្ចបានចុះទៅឃាត់ខ្លួនជនសង្ស័យ បញ្ជូនទៅព្យាបាលមុខរបួស នៅក្នុងមន្ទីរពេទ្យបង្អែកខេត្តពោធិ៍សាត់ ក្រោមការយាមកាមពីសមត្ថកិច្ច មុននឹងនាំទៅចាត់ការតាមច្បាប់។ ចំណែកជនរងគ្រោះម្នាក់ទៀត ដែលរងរបួសធ្ងន់ ខណៈទៅជួយក្មេងស្រីរងគ្រោះ ត្រូវសាច់ញាតិបញ្ជូនទៅសង្រ្គោះ នៅមន្ទីរពេទ្យ នៅឯរាជធានីភ្នំពេញ៕
