ខេត្តបន្ទាយមានជ័យ៖ យុវជនយុវតីមួយគូបានស្រឡាញ់គ្នាយ៉ាងប្ដូរផ្ដាច់ ក៏ត្រូវម្ដាយខាងស្រីតាមបំបែក ធ្វើឲ្យពួកគេទាំង២នាក់ឈឺចិត្ត ក៏គិតខ្លីចងកសម្លាប់ខ្លួន និងយុវជនជាសង្សារ ក៏លេបថ្នាំសម្លាប់ខ្លួនតាមក្រោយ បង្កឲ្យភ្ញាក់ផ្អើលឡើង កាលពីវេលាម៉ោង៧ និង៣០នាទីយប់ ថ្ងៃទី៨ ខែធ្នូ ឆ្នាំ២០១៧ នៅផ្ទះអ្នកជិតខាងមួយកន្លែងដែលគចាក់សោទុកចោល និងគ្មានមនុស្សរស់ ស្ថិតនៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ។។
មន្ត្រីនគរបាលក្រុងសិរីសោភ័ណ បានឲ្យដឹងថា គូស្នេហ៍រងគ្រោះខាងលើ គឺភាគីខាងស្រី ឈ្មោះ សែម សុធារ៉ា អាយុ១៣ឆ្នាំ មុខរបរជាសិស្សថ្នាក់ទី៧ (ស្លាប់) ។ រីឯសង្សាររបស់នាង ឈ្មោះ រឿន សីហា អាយុ២០ឆ្នាំ។ ពួកគេរស់នៅផ្ទះទល់មុខគ្នា ប៉ុន្តែក្មេងប្រុសជាកូនកំព្រាឳពុកម្តាយ ដោយរស់នៅជាមួយបងស្រី ស្ថិតនៅភូមិ-សង្កាត់កើតហេតុខាងលើ។
ប្រភពព័ត៌មានពីអ្នកភូមិ បានឲ្យដឹងថា ក្មេងប្រុសស្រីទាំង២នាក់ខាងលើនេះ បានទាក់ទងស្នេហានឹងគ្នាជាយូរមកហើយ ប៉ុន្តែក្រោយមកទៀត ម្ដាយរបស់នាងបានហាមឃាត់មិនឲ្យនាងទាក់ទងនឹងសង្សាររបស់នាង។ ជាងនេះ ទៅទៀតម្ដាយរបស់នាងក៏បានវាយនាង និងគំរាមមិនឲ្យទាក់ទងបន្ដទៀត។ ដោយសារក្ដីអស់សង្ឃឹមពីរឿងស្នេហា ទើបក្មេងស្រីរងគ្រោះ បានសម្រេចចិត្តចងកធ្វើអត្តឃាត ហើយសង្សាររបស់នាងក៏បានលេបថ្នាំសម្លាប់ខ្លួនតាមក្រោយ។ ប៉ុន្តែអ្នកភូមិឃើញយុវជនម្នាក់នេះបានរត់ចេញមកពីបន្ទប់ទឹក នៅផ្ទះជិតនោះ ទាំងអាការក្រហល់ក្រហាយត្រដរខ្យល់ ទើបបងស្រីរបស់គេដឹកទៅសង្គ្រោះ នៅក្នុងមន្ទីរពេទ្យបង្អែកក្រុងសិរីសោភ័ណ។
ប្រភពព័ត៌មានដដែល បានបន្តថា ភ្លាមៗនោះ អ្នកភូមិក៏បានចូលទៅមើលនៅក្នុងបន្ទប់ទឹកដែលយុវជនរងគ្រោះខាងលើរត់ចេញមកនោះ ស្រាប់តែឃើញក្មេងស្រី ឈ្មោះ សែម សុធារ៉ា បានចងកស្លាប់បាត់ទៅហើយ ដោយនាងយកអាវពណ៌សចងនឹងធ្នឹមបន្ទប់ទឹក ហើយក៏មិនដឹងថា ស្លាប់តាំងពីពេលណាដែរ។
មន្ត្រីនគរបាលដដែល បានបន្តថា បន្ទាប់ពីមានសេចក្ដីរាយការណ៍បែបនេះ សមត្ថកិច្ចមូលដ្ឋាន និងនគរបាលជំនាញ ក៏បានចុះទៅពិនិត្យដល់កន្លែងកើតហេតុ ឃើញមានថ្នាំនៅរាយប៉ាយ និងដបថ្នាំ១ដប រួមទាំងមានលុយមួយចំនួនទៀតផង។ បើតាមការស្រាវជ្រាវនិងការធ្វើកោសល្យវិច័យលើសាកសពរបស់សមត្ថកិច្ច អាចសន្និដ្ឋានបានថា ការស្លាប់របស់ក្មេងស្រីខាងលើ មិនជាប់ពាក់ព័ន្ធនឹងអំពើឃាតកម្មនោះឡើយ គឺពួកគេបានសម្រេចចិត្តធ្វើអត្តឃាតទាំង២នាក់។
បើតាមសម្ដីរបស់បងស្រីរបស់យុវតីរងគ្រោះ បានឲ្យដឹងថា មុនពេលកើតមាននូវរឿងអកុសលនោះ គាត់បានឮប្អូនស្រី(ជនរងគ្រោះ)គាត់ចុចទូរស័ព្ទទាក់ទងទៅសង្សាររបស់នាង ដើម្បីឲ្យយកថ្នាំមកឲ្យនាង។ តាមពិតទៅប្អូនស្រីរបស់គាត់ក៏បានរងការវាយដំពីម្ដាយផងដែរ ដើម្បីរារាំងកុំឱ្យនាងមានទំនាក់ទំនងស្នេហាជាមួយនឹងសង្សាររបស់នាងបន្តទៅទៀត។ ករណីនេះអាចបណ្ដាលមកពីពួកគេេរងនូវការឈឺចាប់ ហើយគិតខ្លី ទើបពួកគេសម្រេចចិត្តបញ្ចប់ជីវិតខ្លួនឯងបែបនេះ។
ក្រោយពេលពិនិត្យ និងធ្វើកោសល្យវិច័យរួច សមត្ថកិច្ចក៏បានប្រគល់សាកសពទៅឲ្យក្រុមគ្រួសារ រៀបចំធ្វើបុណ្យតាមប្រពៃណី៕