ភ្នំពេញ៖ រថយន្តប្រភេទយីឌុបរបស់ក្រុមហ៊ុន នាគខៀវ មួយគ្រឿង បានបើកដាច់ហ្រ្វាំង បានជ្រុលទៅបុករះ ម៉ូតូ ២គ្រឿង ក្នុងនោះមានរ៉ឺម៉កម៉ូតូបីនាក់ មួយគ្រឿង បណ្តាលឱ្យមានអ្នក ស្លាប់ម្នាក់ និងរបួសធ្ងន់ស្រាល បីនាក់ ដែលហេតុការណ៍ដ៏រន្ធត់នេះ បានកើតឡើងនៅវេលាម៉ោង៣និង៣០នាទី រសៀលថ្ងៃទី៣ ខែធ្នូ ឆ្នាំ២០១៧ ទុលមុខនិង សាលារៀន មីគីវ៉េ ផ្លូវ២១៧ កែងនិងផ្លូវបេតុង បឹងតាម៉ាត ភូមិសំបួរ សង្កាត់ដង្កោ ខណ្ឌដង្កោ ។
សពជនរងគ្រោះមានឈ្មោះ ផឹង ដន ភេទប្រុស អាយុ ៦២ឆ្នាំ មុខរបររត់រ៉ឺម៉កម៉ូតូ ស្នាក់នៅ ភូមិព្រៃសលិច សង្កាត់ព្រៃស ខណ្ឌដង្កោ ជាអ្នកបើករ៉ឺម៉កម៉ូតូ មានកូន ៤នាក់ ប្រុស ២នាក់ស្រី ២នាក់ ។ ចំនែកអ្នករងរបួសធ្ងន់មានឈ្មោះ ស្តោ សំឆាយា ភេទប្រុស អាយុ ២៤ឆ្នាំ មុខរបរ កម្មកររោងចក្រ ស្នាក់នៅភូមិថ្មី សង្កាត់ដង្កោ ខណ្ឌដង្កោ ជាអ្នកបើកម៉ូតូហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ 1CX 7142 ។
ដោយឡែកអ្នកបើករថយន្តបង្ក មានឈ្មោះ អឿន លុច ភេទប្រុស អាយុ ២៤ឆ្នាំ មុខរបរបើកបររថយន្ត ស្នាក់ក្នុងឡាន មានស្រុកកំណើត ភូមិព្រៃថីយ ភូមិរការ ស្រុកស្អាង ខេត្តកណ្តាល ចំនែកជំនួយការរថយន្តវិញ មានឈ្មោះ ផាន ផាត ភេទប្រុស អាយុ ១៨ឆ្នាំ មុខរបរជំនួយការរថយន្ត ស្នាក់ក្នងឡាន មានស្រុកកំណើត ភូមិសូទិន ឃុំសូទិន ស្រុកជើងព្រៃ ខេត្តកំពង់ចាម ។
តាមប្រភព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញ បុរសដែលស្លាប់ បានបើករ៉ឺម៉កម៉ូតូដឹកក្មេងប្រុសស្រីចំនួន ២នាក់ បានធ្វើដំណើរតាមផ្លូវ បេតុង បឹងតាម៉ាត ក្នុងទិសដៅពីលិចទៅកើត ខណៈមកដល់ចំនុចកើតហេតុ ដែលជាផ្លូវកែងអក្សរតេ ក៏ស្រាប់តែមានរថយន្តប្រភេទយីឌុបរបស់ក្រុមហ៊ុន នាគខៀវ ពណ៌បៃតង ពាក់ស្លាកលេខ ភ្នំពេញ 3B- 5449 ជិះគ្នា ២នាក់ទាំងអ្នកបើកបរ បានធ្វើដំណើរតាមផ្លូវ ២១៧ ក្នុងទិសដៅពីត្បូងទៅជើង ក្នុងល្បឿនលឿន ។
លុះមកដល់ចំណុចកើតហេតុ មិនដឹងជាយ៉ាងមិចនោះទេ ស្រាប់តែឃើញ ជ្រុលទៅបុកម៉ូតូម៉ាកហុងដាឌ្រីម ស៊េរីឆ្នាំ២០១៥ ចំពីក្រោយពេញទំហឹង រួចហើយរថយន្តបានជ្រុលទៅបុកនិងរ៉ឺម៉កម៉ូតូដែលកំពុងតែឆ្លងផ្លូវ ចំពាក់កណ្តាលបន្ថែមទៀត បណ្តាលឱ្យធ្លាក់អ្នកបើកម៉ូតូចូលក្រោមរថយន្ត កិនចំក្បាលចេញឈាមស្លាប់ នៅកន្លែង ចំនែកក្មេងដែលរួមដំណើរក្នុងរ៉ឺម៉កម៉ូតូ ២នាក់ទៀត រងរបួសរលាត់ដៃរលាត់ជើងស្រាល ចំនែកបុរសដែលជិះម៉ូតូឌ្រីមសង់ម្នាក់ឯងវិញ ដួលចូលក្រោមរថយន្តដូចគ្នា តែរងរបួសជើងទាំងសងខាង ធ្ងន់ធ្ងរត្រូវបានរថយន្តសង្គ្រោះ ដឹកយកទៅសង្គ្រោះនៅគ្លិនិក សួគា៍ ។
ដោយឡែកខាងរថយន្តវិញ ពេលបង្កគ្រោះថ្នាក់ហើយ រងការខូចខាត ក្រពិតកាងខាងមុខចំហៀងខាងឆ្វេង ហើយបានបើកចេញពីកន្លែងកើតហេតុ ៥០ម៉ែត្រ ទើបឈប់ រួចហើយនាំគ្នារត់គេខ្លួន ក៏ត្រូវបានប្រជាពលរដ្ឋ ដែលឃើញហេតុការណ៍ បាននាំគ្នាជួយដេញចាប់បាន ទាំងពីរនាក់យកទៅប្រគល់ឱ្យសមត្ថកិច្ច យកទៅសាកសួរនៅអធិការដ្ឋានខណ្ឌដង្កោ ។
តាមសម្តីសារភាព របស់អ្នកបើកបររថយន្តបង្ក បានឱ្យដឹងថា មុនពេលកើតហេតុ ពួកគាត់ទាំងពីរនាក់ បានបើករថយន្តខាងលើយកទៅទំលាក់ទ្រុង ឱ្យជាងធ្វើនៅម្តុំ ផ្លូវបំបែកជាបួន ស្ពានព្រែកជ្រៃ ខណ្ឌដង្កោ លុះទំលាក់ទ្រុងហើយ ពួកគាត់បានបើករថយន្តគោលបំណងត្រឡប់ទៅការ៉ាសវិញ នៅក្រោយវត្តសំបួរ សង្កាត់ដង្កោ ខណ្ឌដង្កោ ។ លុះមកដល់ចំនុចកើតហេតុ ដោយសារតែ រថយន្តរបស់ពួកគាត់ ហ្រ្វាំងអត់ស៊ី ក៏ជ្រុលទៅរះម៉ូតូ២ គ្រឿង ។
បើតាមសម្តីបងបង្អូនរបស់សពជនរងគ្រោះបានឱ្យដឹងថា ជនរងគ្រោះទើបមកពីបុណ្យសពបងបងប្អូន នៅខេត្តកំពង់ចាម លុះធ្វើដំណើរមកដល់ភ្នំពេញ ឈាងចូលលេងផ្ទះបងប្អូន នៅម្តុំក្បាលថ្នល់ ពេលចេញពីផ្ទះបងប្អូននៅក្បាលថ្នល់ គោលបំណងត្រឡប់ទៅផ្ទះវិញនៅព្រៃស ក៏ជួបគ្រោះថ្នាក់បែបនេះទៅ ។ ក្នុងហេតុការណ៍នេះដែរ ឃើញមានបងប្អូនកូនចៅរបស់ជនរងគ្រោះ បានមកស្រែកទ្រហ៊ោ ស្រែកយំសោកបោកខ្លួន ឱបសពរបស់ឪពុក មើលទៅគួរសោកសង្រែងបំផុត ។
ក្រោយពេលកើតហេតុ សមត្ថកិច្ចមូលដ្ឋាន និងជំនាញ ព្រមទាំងកម្លាំងកងរាជអាវុធហត្ថខណ្ឌដង្កោ បានចុះទៅជួយសម្រួលចរាចរណ៍ កុំឱ្យកកស្ទះ រួចហើយបានទំនាក់ទំនងទៅខាងជំនាញចរាចរណ៍ក្រុង មកធ្វើលិខិតប្រគល់សព ជនរងគ្រោះឱ្យក្រុមគ្រួសារសាច់ញាតិ យកទៅធ្វើបុណ្យនៅផ្ទះ សង្កាត់ព្រៃស ខណ្ឌដង្កោ និងធ្វើការវាស់វែងយកម៉ូតូ ទាំងរថយន្ត ព្រមទាំងអ្នកបើកបរ ទៅរក្សារទុក នៅការរិយាល័យចរាចរណ៍ជើងគោក រាជធានីភ្នំពេញដើម្បីធ្វើការដោះស្រាយ ៕
