ភ្នំពេញ៖ បន្ទាប់ពីមន្ត្រីជាន់ខ្ពស់របស់គណៈកម្មាធិការជាតិរៀបចំការបោះឆ្នោត មកពីកូតារបស់គណបក្សសង្គ្រោះជាតិ បានលាលែងពីតំណែងនោះមក សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងនៅក្នុងពិធីសំណេះសំណាលជាមួយកម្មករជា១ម៉ឺននាក់ នៅក្នុងខណ្ឌសែនសុខ រាជធានីភ្នំពេញ នាព្រឹក ថ្ងៃទី២២ ខែវិច្ឆិកានេះថា តួនាទីអនុប្រធានគជបថ្មី ដែលជំនួសលោក គួយ ប៊ុនរឿន នឹងត្រូវជ្រើសរើសចេញពីគណបក្សហ្វ៊ុនស៊ិនប៉ិច។
សម្ដេច ហ៊ុន សែន បានបន្ថែមថា មន្ត្រីគជបថ្មីទាំង៣រូបនេះ គឺមានសមាសភាពមកពីខាងគណបក្សហ្វ៊ុនស៊ិនប៉ិច គណបក្សសញ្ជាតិខ្មែរ និងខាងអង្គការសង្គមស៊ីវិល។ សមាជិកទាំងបីនេះ នឹងត្រូវជ្រើសរើសតាមសភាជាតិ។
ជាមួយគ្នានេះ សម្ដេចនាយករដ្ឋមន្រ្ដី ក៏បានស្នើទៅប្រធានគណៈកម្មាធិការជាតិរៀបចំការបោះឆ្នោត(គជប) លោក ស៊ិក ប៊ុនហុក កុំឲ្យទទួលយកមន្ត្រីគជប កូតាមកពីគណបក្សសង្គ្រោះជាតិ ទាំង៣នាក់ ដែលបានលាលែងពីតំណែងនោះ ត្រឡប់មកវិញ។
យោងតាមរយៈលិខិតរួមគ្នាមួយ ផ្ញើទៅជូនសម្តេច ហេង សំរិន ប្រធានរដ្ឋសភា ថ្នាក់ដឹកនាំជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប) ចំនួន៣នាក់ រួមមាន លោក គួយ ប៊ុនរឿន ជាអនុប្រធាន លោក រ៉ុង ឈុន និងលោកស្រី តែ ម៉ានីរ៉ុង បានដាក់ពាក្យសុំលាលែងតំណែងពីស្ថាប័នមួយនេះ កាលពីថ្ងៃទី២០ ខែវិច្ឆិកា ឆ្នាំ២០១៧។
លិខិតដដែលនោះ បានបញ្ជាក់ពីមូលហេតុ នៅក្នុងការដាក់ពាក្យស្នើសុំលាលែងពីតំណែងនោះថា ដោយសារលោកទាំង៣នាក់បើកផ្លូវឲ្យគជប អនុវត្តនូវការបែងចែកអាសនៈ នៃរដ្ឋសភាអាណត្តិទី៥ និងអាសនៈក្រុមប្រឹក្សាឃុំ-សង្កាត់អាណត្តិទី៤ ឡើងវិញ។ អាសនៈក្រុមប្រឹក្សាឃុំ-សង្កាត់របស់គណបក្សសង្គ្រោះជាតិទាំងនោះ ត្រូវបែងចែកទៅឲ្យគណបក្សនយោបាយផ្សេងៗ ដែលពលរដ្ឋមិនបានបោះឆ្នោតជូន។
នៅក្នុងលិខិតដដែលនោះ បានហៅការដាក់កំហិតឲ្យគជប បែងចែកអាសនៈឡើងវិញនេះថា ជាការជះឥទ្ធិពល ដោយផ្ទាល់ដល់ដំណើរការ នៃការរៀបចំការបោះឆ្នោតជ្រើសតាំងតំណាងរាស្ត្រ ឆ្នាំ២០១៨ ដោយមិនអាចធានាបាននូវការបោះឆ្នោតមួយ ប្រកបដោយលក្ខណៈសេរី ត្រឹមត្រូវ និងយុត្តិធម៌បានឡើយ។ រីឯលទ្ធផលនៃការបោះឆ្នោត ក៏មិនអាចទទួលស្គាល់ពីពលរដ្ឋជាម្ចាស់ឆ្នោត ក៏៏ដូចជាភាគីពាក់ព័ន្ធ និងសហគមន៍អន្តរជាតិបានដែរ។
នៅក្នុងពាក្យស្នើសុំលាលែងពីតំណែងធ្វើរួមគ្នាដដែលនោះ គឺមានទាំងស្នាមមេដៃរបស់លោកអនុប្រធានម្នាក់ និងសមាជិកគជប២រូបផ្សេងទៀត បានអះអាងថា ក្នុងនាមជាអាជ្ញាកណ្ដាល សម្រាប់ការរៀបចំការបោះឆ្នោត មិនអាចនៅបន្តធ្វើការងារ ក្នុងស្ថាប័នគជប បានតទៅទៀតឡើយ ពីព្រោះវាក្បត់ទៅនឹងឧត្តមគតិ និងមនសិការរបស់ខ្លួន និងក្បត់ឆន្ទៈពិតប្រាកដរបស់ប្រជាពលរដ្ឋជាម្ចាស់ឆ្នោត ហើយបញ្ហានេះនឹងនាំឲ្យជាប់ឈ្មោះអាក្រក់ នៅក្នុងប្រវត្តិសាស្ត្រទៀតផង៕
