ភ្នំពេញ៖ អតីតអ្នកអត្ថាធិប្បាយព័ត៌មាន ដ៏ល្បីម្នាក់របស់វិទ្យុអាស៊ីសេរី ជាប់ពាក់ព័ន្ធនឹងការដំឡើង វិទ្យុផ្សព្វផ្សាយព័ត៌មាន ចេញទៅក្រៅប្រទេស ដោយខុសច្បាប់ ក៏ត្រូវសមត្ថកិច្ចឃាត់ខ្លួន កាលពីវេលាម៉ោង ៨នាទីយប់ ថ្ងៃទី១៤ ខែវិច្ឆិកា នៅក្នុងសណ្ឋាគារម៉ារ៉ាឌី មានទីតាំងនៅជិត គល់ស្ពានអាកាសស្ទឹងមានជ័យ តាមមហាវិថីព្រះមុនីរ៉េត (ផ្លូវលេខ២១៧) ស្ថិតក្នុងភូមិ៥ សង្កាត់ស្ទឹងមានជ័យទី២ ខណ្ឌមានជ័យ។
មន្ត្រីនគរបាលខណ្ឌមានជ័យ បានឲ្យដឹងថា អតីតបុគ្គលិកវិទ្យុអាស៊ីសេរី (RFA) ដែលត្រូវបានអាជ្ញាធរ ឃាត់ខ្លួនជាប់ពាក់ព័ន្ធ នឹងការដំឡើងវិទ្យុផ្សព្វផ្សាយ ដោយខុសច្បាប់នោះ ឈ្មោះ អ៊ួង ឈិន ភេទប្រុស អាយុជាង៤០ឆ្នាំ មានលំនៅបច្ចុប្បន្ន ផ្ទះលេខ៩២ ផ្លូវលេខ១៨ ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ នៅក្នុងការឆែកឆេរបន្ទប់ជួល របស់ជនសង័្សយនោះ អាជ្ញាធររកឃើញ វត្ថុតាងមួយចំនួន រួមមាន ម៉ាស៊ីកុំព្យូទ័រ Dastop ៤គ្រឿង Laptop មួយគ្រឿង Mixer មួយគ្រឿង Speaker មួយគូ ទូរទស្សន៍២គ្រឿង Monitor Speaker មួយគូ Microphone ចំនួន៥ រួមទាំងសម្ភារ ពាក់ព័ន្ធនឹងការដំឡើង ស្ទីឌីយោវិទ្យុមួយចំនួនទៀត។
មន្ត្រីនគរបាលដដែល បានបន្តថា នៅក្នុងប្រតិបត្តិការនេះ ដឹកនាំកម្លាំងសមត្ថកិច្ចចម្រុះ ដោយលោក ពេជ្រ កែមុនី អភិបាលខណ្ឌមានជ័យ ក្រោមការសម្របសម្រួលពីលោក អ៊ុំ សុភ័ក្ត្រ ព្រះរាជអាជ្ញារងអមសាលាដំបូងរាជធានីភ្នំពេញ។
លោកឌី រ័ត្នខេមរុណ អភិបាលរងខណ្ឌមានជ័យ បានឱ្យដឹងថា ជនសង្ស័យបានមកជួលបន្ទប់លេខE04 ជាន់ទី៧ នៃសណ្ឋាគារខាងលើ ក្នុងតម្លៃ២០០ដុល្លារ ប៉ុន្តែដោយសារ អាជ្ញាធរមានការសង្ស័យ ពីករណីលួចលាក់ដំឡើង ឧបករណ៍ផ្សាយព័ត៌មានតាមវិទ្យុ ដោយខុសច្បាប់ ទើបអាជ្ញាធរបានដឹកនាំកម្លាំង សមត្ថកិច្ចចម្រុះចុះត្រួតពិនិត្យ និងឆែកឆេរ ក៏រកឃើញឧបករណ៍ ពាក់ព័ន្ធមួយចំនួន។
មន្ត្រីនគរបាលខណ្ឌមានជ័យ បានបន្តថា ចំពោះមុខអាជ្ញាធរ និងសមត្ថកិច្ចចម្រុះ លោក អ៊ួង ឈិន បានឆ្លើយថា លោកបានជួលបន្ទប់E04 ជាន់ទី៧ នៃសណ្ឋាគារនេះ គឺដើម្បីបើកជាស្ទីឌីយោច្រៀងខារ៉ាអូខេ និងថតវីដេអូ ក្នុងកម្មវិធីរៀបអាពាហ៍ពិពាហ៍ និងពិធីបុណ្យផ្សេងៗ សម្រាប់អាណិកជនជួលទៅតាមតម្រូវការជាក់ស្តែង និងគ្រោងរៀបចំថតចម្រៀង សម្រាប់លក់កម្សាន្តជាលក្ខណៈគ្រួសារតែប៉ុណ្ណោះ មិនមានបំណង ក្នុងគោលដៅអ្វីផ្សេងនោះឡើយ។
មន្ត្រីនគរបាលដដែល បានបន្តថា ក្រោយការសាកសួរជាបឋមរួចមក លោកអ៊ួង ឈិន ត្រូវអាជ្ញាធរនិងសមត្ថកិច្ចចម្រុះឃាត់ខ្លួន ក្រោមការឯកភាពពីលោកព្រះរាជអាជ្ញាររង រួចបញ្ជូនទៅកាន់ស្នងការដ្ឋាននគរបាលរាជធានីភ្នំពេញទាំងយប់ ដើម្បីសាកសួរព័ត៌មានបន្ថែម និងបន្តនីតិវិធី។ នៅវេលាព្រឹក ថ្ងៃទី១៥ ខែវិច្ឆិកា នេះ កម្លាំងសមត្ថកិច្ចចម្រុះខណ្ឌមានជ័យ រួមទាំងក្រសួង មន្ទីរពាក់ព័ន្ធ នឹងចុះទៅពិនិត្យបន្ទប់ជួលរបស់ជនសង្ស័យម្តងទៀត ដើម្បីពិនិត្យ និងស្វែងរកការពិត ថាតើករណីនេះ វាជាការពិតដូចអ្វីដែលអាជ្ញាធរសង្ស័យពីរឿងលួចលាក់ដំឡើងប្រព័ន្ធផ្សព្វផ្សាយព័ត៌មានដោយខុស
ច្បាប់ដែរឬយ៉ាងណា៕