ខេត្តតាកែវ៖ បន្ទាប់ពីក្រសួងធម្មការ និងសាសនាចុះត្រួតពិនិត្យភាពមិនប្រក្រតីពាក់ព័ន្ធនឹងបុគ្គលម្នាក់ឈ្មោះ ធាន វុទ្ធី តាំងខ្លួនជាព្រះសិអារ្យមេត្រី នៅវត្តទួលព្រះរាជា ស្ថិតតក្នុងខេត្តកណ្តាល ហើយឲ្យបុគ្គលកំហូចនោះលែងធ្វើសកម្មភាពនោះមក ស្រាប់តែកាលពីពេលថ្មីៗនេះ ជនដដែលនោះ បានបង្ហាញមុខក្នុងការហែកឋិនមួយយ៉ាងគគ្រឹកគគ្រេង នៅក្នុងខេត្តតាកែវ ដោយតាំងខ្លួនឯងជាព្រះអរហន្ត ហើយត្រូវអ្នកលេងសង្គមហ្វេសប៊ុកចែករំលែកគ្នាពីមួយទៅមួយ។
នៅលើបណ្តាញសង្គមហ្វេសប៊ុកក បានង្ហាញនូវរូបភាពយ៉ាងច្រើនពីបុគ្គល ធាន វុទ្ធី ក្នុងពិធីបុណ្យកឋិនទានមួយ កាលពីថ្ងៃទី៥ ខែតុលា ឆ្នាំ២០១៧ នៅលើទឹកដីនៃឃុំចំប៉ា ស្រុកព្រៃកប្បាស ខេត្តតាកែវ ជាទីកន្លែងដែលលោក ធាន វុទ្ធី បានកសាងព្រះពុទ្ធបដិមាធំៗយ៉ាងច្រើន នៅលើផ្ទៃដីជាច្រើនហិកតារ ដែលមានអ្នកចូលរួមហែអង្គកឋិនទាន សុទ្ធតែស្លៀកស ពាក់ស មានចំនួនជិត១ពាន់នាក់ និងអ្នកចូលរួមបានប្រសិទ្ធនាមឱ្យលោក ធាន វទ្ធី ថា ជាព្រះអរហន្ត ដែលត្រាស់ដឹងនៅលើកទឹកដីខេត្តតាកែវ ថែមទៀត ។
បើតាមវចនានុក្រមរបស់សម្ដេចព្រះសង្ឃរាជ ជួន ណាត បានពន្យល់ថា អរហន្ត(ជាពាក្យក្លាយមកពីបាលី និងសំស្រ្កឹត) មានន័យថា អ្នកឆ្ងាយចាកកិលេស គឺអ្នកដែលបានសម្រេចលោកុត្តរធម៌ផុតថ្នាក់ : អរហន្ត គឺអ្នកដែលបានសម្រេចអរហត្ត ។ បើស្ត្រីជា អរហន្តី; ព. កា. ឬ ព. ទេ. ឯក. ជា អរហា, ពហុ. ជា អរហន្តា ឬ អរហន្តោ (ម. ព. អរហំ ផង)។ ប៉ុន្តែបើគេក្រឡេកមើលទៅលើបុគ្គល ធាន វុទ្ធី វិញ ទើបគាត់បានឆ្ងាយចាកកិលេស និងសម្រេចលោកុត្តរធម៌ហើយឬនៅ? បើនៅជាបុថុជ្ជន ពោរពេញទៅដោយកិលេស មានការលោភលន់ គ្រាន់តែកោរសក់ស្លៀកពាក់សនោះ គឺមិនអាចហៅថា ព្រះអរហន្តកើតទេ។ ដូច្នេះអ្នកកាន់ព្រះពុទ្ធសាសនា គួរតែយកទ្រឹស្ដីដ៏ល្អរបស់ព្រះពុទ្ធមកដាក់ក្នុងចិត្តផង ពីព្រោះព្រះពុទ្ធបានអប់រំ និងទូន្មានដល់មនុស្សលោក មុននឹងជឿ ឬមានសទ្ធា ត្រូវប្រើបញ្ញាត្រិះរិះឲ្យគ្រប់ជ្រុងជ្រោយ ទើបវានាំឲ្យយើងមានប្រយោជន៍ និងមិនខាតបង់។ ការដែលត្រឹមតែស្លៀកសពាក់ស កោរសក់បែបនេះ មិនមែនមានន័យថា ព្រះអរហន្តនោះឡើយ។
គួររម្លឹកថា កាលពីឆ្នាំ២០១៤ ក្រសួងបានអង្កេតស្រាវជ្រាវរកឃើញនូវកំហុសឆ្គងរបស់បុគ្គលនេះ ជាអ្នកដើរតួបោកប្រាស់ប្រជាពលរដ្ឋជាពុទ្ធសាសនិកជន និងបំផ្លិចបំផ្លាញកិត្យានុភាពព្រះពុទ្ធសាសនា នៅកម្ពុជា ដោយសារតែលោក ធាន វុទ្ធី តាំងខ្លួនឯងជាព្រះសិអារ្យមេត្រិយ៍ បានចូលខ្លួនមកសារភាពនៅសាលប្រជុំ នៃសាលាខេត្តកណ្តាលសាជាថ្មី នៅចំពោះមុខលោក មិន ឃិន អតីតរដ្ឋមន្ត្រីក្រសួងធម្មការ និងសាសនា។ ជុំវិញករណីបុគ្គលនេះ ដែលបានប្រព្រឹត្តខុសឆ្គង ក្នុងវិស័យព្រះពុទ្ធសាសនា ដោយបានតាំងខ្លួនជាព្រះសិអារ្យមេត្រិយ ហើយឈានដល់មានព្រះសង្ឃ និងប្រជាពលរដ្ឋក្រាបសំពះទៀតផង។ ជាធម្មតា ព្រះសង្ឃ គឺជាឧត្តមភេទ មិនមែនក្រាបសំពះគ្រហស្ថបែបនេះទេ សូម្បីតែសេ្ដចផែនដី ក៏ព្រះសង្ឃមិនលើកដៃសំពះឡើយ។
ស្របគ្នានោះ សម្ដេចនាយករដ្ឋមន្ត្រី ហ៊ុន សែន ប្រមុខរាជរដ្ឋាភិបាលកម្ពុជា ក៏ធ្លាប់បានប្រកាសឲ្យអាជ្ញាធរស្វែងរកតាមចាប់ខ្លួន និងវាយខ្នោះបុគ្គលឈ្មោះ ធាន វុទ្ធី កាលពីថ្ងៃទី០៤ ខែសីហា ឆ្នាំ២០១៤ កន្លងទៅ ហើយបុគ្គលនេះមិនត្រូវបានសមត្ថកិច្ចចាប់វាយខ្នោះ ដូចការលើកឡើងរបស់សម្ដេចនាយករដ្ឋមន្ត្រីឡើយ គឺបានត្រឹមបើកផ្លូវឲ្យចូលខ្លួនមកបំភ្លឺ និងសារភាពកំហុសឆ្គងរបស់ខ្លួន ដែលបានប្រព្រឹត្តគ្រប់យ៉ាង និងសុំទោសនៅចំពោះព្រះភ័ក្ត្រសម្តេចព្រះពោធិវង័្ស អំ លឹមហេង និងចំពោះមុខលោក ផៃ ប៊ុនឈឿន អភិបាលនៃគណៈអភិបាលខេត្តកណ្តាល នាថ្ងៃទី៦ សីហា ២០១៤ តែប៉ុណ្ណោះ ។
បុគ្គលធាន វុទ្ធី មិនមែនជាករណីតូចតាច ឬសាមញ្ញនោះឡើយ ភាពមិនប្រក្រតីជាច្រើនទាក់ទងនឹងការប្រតិបត្តិរបស់បុគ្គលដែលធ្លាប់តាំងខ្លួនជាតាបស ជាសម្តេចព្រះសង្ឃរាជ ជួន ណាត ចាប់ជាតិ ជាអ្នករកឃើញព្រះផុស អាចទំនាក់ទំនងជាមួយព្រះព្រហ្ម និងព្រះឥន្ទ្របាន រហូតដល់តាំងខ្លួនជាព្រះសិអារ្យមេត្រីយ៍ ធ្វើឲ្យព្រះសង្ឃមួយចំនួនថ្វាយបង្គំបុគ្គល ធាន វុទ្ធី បង្កឲ្យមានភាពក្រឡាប់ចាក់ រហូតដល់ នៅស្រុកកំណើតរបស់គាត់ ស្ថិតនៅភូមិចំប៉ា ស្រុកព្រៃកប្បាស ខេត្តតាកែវ ត្រូវបានគេប្រសិទ្ធនាមថា ជាព្រះអរហន្ត វិញម្តង ។
ទោះជាយ៉ាងណា ពុទ្ធសាសនិកដែលយល់ដឹងជ្រៅជ្រះពីព្រះពុទ្ធសាសនា បានអំពាវនាវដល់អាជ្ញាធរ និងសមត្ថកិច្ចពាក់ព័ន្ធ គួរគិតពិចារណា និងចាត់វិធានការពីករណីនេះផង៕