ខេត្តព្រះសីហនុ៖ មេការជនជាតិចិនម្នាក់ ខឹងនឹងវិស្វករទៅទារលុយភាគហ៊ុន ក៏ផ្ទុះកំហឹងយ៉ាងក្រេវក្រោធ នាំបក្ខពួកវាយតប់គូទំនាស់ បណ្ដាលឲ្យរងរបួសធ្ងន់ កាលពីវេលាម៉ោង២ និង៣០នាទីរសៀល ថ្ងៃទី៧ ខែតុលា ឆ្នាំ២០១៧ ស្ថិតក្នុងក្រុមទី១៥ ភូមិ៤ សង្កាត់លេខ៤ ក្រុងព្រះសីហនុ។
មន្ត្រីការិយាល័យនគរបាលកម្រិតស្រាល នៃស្នងការដ្ឋាននគរបាលខេត្តព្រះសីហនុ បានឲ្យដឹងថា ជនសង្ស័យដែលសមត្ថកិច្ចឃាត់ខ្លួន ឈ្មោះ FANG JINHUA ភេទប្រុស អាយុ៣៩ឆ្នាំ ជនជាតិចិន កាន់លិខិតឆ្លងដែនលេខ G28945277 មុខរបរជាមេការសំណង់ ស្នាក់នៅផ្ទះជួល ក្រុម១៥ ភូមិ៥ សង្កាត់លេខ៤ ក្រុងព្រះសីហនុ (ជាមុខសញ្ញាចាស់មិនរាងចាល ធ្លាប់ជាប់ពន្ធនាគារ កាលពីថ្ងៃទី ១៧ ខែមិថុនា ឆ្នាំ២០១៦ ពីបទប៉ុនប៉ងឃាតកម្ម គឺរឿងមិនបើកលុយឲ្យកម្មករក្រោមឱវាទ ហើយដេញកាប់គេ រហូតចូលដល់ស្នងការដ្ឋាននគរបាលខេត្ត ក៏ត្រូវសមត្ថកិច្ចចាប់ខ្លួនបញ្ជូននទៅតុលាការតែម្ដងទៅ)។ ដោយឡែកបក្ខពួកចំនួន៥នាក់ទៀត មិនស្គាល់អត្តសញ្ញាណ ពីព្រោះពួកគេបានរត់គេចខ្លួនបាត់អស់។ រីឯជនរងគ្រោះ ឈ្មោះ LIN YONGFEI ភេទប្រុស អាយុ៣៩ឆ្នាំ ជនជាតិចិន កាន់លិខិតឆ្លងដែនលេខៈ G3I 368954 មុខរបរជាវិស្វករ ស្នាក់នៅផ្ទះជួល ភូមិ៥ សង្កាត់លេខ៤ ក្រុងព្រះសីហនុ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវអំពើហិង្សានោះ ជនរងគ្រោះបានទៅទារលុយភាគហ៊ុនសាងសង់ពីជនសង្ស័យ តែជនសង័្សយមិនព្រមឲ្យ ក៏បង្កឲ្យកើតទាស់ពាក្យសម្តីគ្នា រហូតឈានទៅដល់ការប្រើហិង្សាដាក់គ្នាទៅវិញទៅមក។ នៅពេលនោះ ជនសង័្សយ និងបក្ខពួកបានយកដៃ និងជើង វាយទាត់ធាក់ទៅលើជនរងគ្រោះ បណ្ដាលឲ្យរងរបួសជាទម្ងន់។
ក្រោយពេលកើតហេតុ សមត្ថកិច្ច្បានចុះទៅឃាត់ខ្លួនជនសង្ស័យ ឈ្មោះ FANG JINHUA ជាចារីមេខ្លោង និងស្រាវជ្រាវតាមស្វែងរកចាប់ខ្លួនបក្ខពួករបស់គេចំនួន៥នាក់ទៀត ដើម្បីនាំមកផ្តន្ទាទោសតាមច្បាប់។ ដោយឡែក ជនរងគ្រោះដែលរងរបួសក្បាល និងដងខ្លួនជាទម្ងន់ ត្រូវគេបញ្ជូនទៅសង្គ្រោះ នៅក្នុងគ្លឺនិកសេតេ៕