ទាហានពិសេសកាណាដា ដែលកំពុងធ្វើប្រតិបត្តិការណ៍ នៅប្រទេសអ៊ីរ៉ាក់ បានសម្លាប់សកម្មប្រយុទ្ធ ISIS ជាងបីគីឡូម៉ែត្រ ឡើងកាន់កំពូលតារាងកំពូលអ្នកបាញ់ Sniper ឆ្ងាយជាងគេក្នុងប្រវត្តិសាស្ត្រពិភពលោក។
ប្រភពកាសែត Globe and Mail ប្រចាំទីក្រុង Toronto និយាយថា អ្នកជំនាញកាន់កាំភ្លើងបាញ់ស៊ីបរូបនេះ មានប្រភពពីក្រុមទាហានពិសេស Joint Task Force 2 របស់កាណាដា ដោយសម្រេចស្នាដៃបាញ់ចេញ ពីកំពូលអាគារមួយ ត្រឹមតែមួយគ្រាប់ប៉ុណ្ណោះ ខណៈប្រតិបត្តិការនេះ អនុវត្តជាង៣០ថ្ងៃទើបបានសម្រេច។
ក្រោយទទួលបានការបញ្ជា និងការគាំទ្រពីជំនួយការម្នាក់ ទាហានរូបនេះបានឈរ ពីក្រោយសមរភូមិ លើអគារមួយ ខណៈកងទាហានអ៊ីរ៉ាក់ កំពុងប្រយុទ្ធយ៉ាងសាហាវនៅខាងមុខ។ ប្រភពខាងលើបាននិយាយទៀតថា៖”មេបញ្ជាការ ក្នុងប្រតិបត្តិការពិសេស មួយបានបញ្ជាក់ថា កងទាហាន Joint Task Force 2 ម្នាក់បានបាញ់ចំគោលដៅ ចម្ងាយ៣,៥៤០ម៉ែត្រ (ជាង៣គីឡូម៉ែត្រ) ហើយព័ត៌មានទាក់ទង នឹងបេសកកម្មនេះត្រូវរក្សាជាសម្ងាត់។
រយៈចម្ងាយនេះ៣,៥៤០ម៉ែត្រ មានន័យថា ទាហានពិសេសកាណាដា ឡើងឈរកំណត់ត្រាពិភពលោក ផ្នែកទាហានខាងបាញ់ចំគោលដៅ ឆ្ងាយជាងគេដោយប្រើកាំភ្លើង Sniper ទម្លាក់ទាហានពិសេសអង់គ្លេស SAS លោក Craig Harrison ដែលធ្លាប់ប្រើត្រឹមមួយគ្រាប់ បាញ់ចំក្បាលទាហានឧទ្ទាមតាលីបង់២នាក់ ក្នុងខែវិច្ឆិកាឆ្នាំ ២០០៩។
ទាហានជំនាញរូបនេះ បានប្រើកាំភ្លើងម៉ាក McMillan TAC-50 បាញ់ចេញពីតំបន់ខ្ពស់ អំឡុងពេលសហការជាមួយ ទាហានអ៊ីរ៉ាក់ ដោយលោកប្រើរយៈពេលត្រឹម១០វិនាទី ក្នុងការតម្រង់ក្បាលគោលដៅ៕
ផ្តល់សិទ្ធដោយ៖ kqube.net