ខេត្តកណ្ដាល៖ បុរសម្នាក់បានយកឧបករណ៍កែច្នៃចុះទៅឆក់ត្រី ក៏ជួបនឹងគ្រោះអកុសល ឆក់ខ្លួនឯងស្លាប់នៅក្នុងទឹក យ៉ាងអាណោចអាធ័ម ហើយសាកសពត្រូវគេប្រទេះឃើញ បង្កឲ្យភ្ញាក់ផ្អើលឡើង កាលពីកាលពីថ្ងៃទី២២ ខែមិថុនា ឆ្នាំ២០១៧ នៅក្នុងភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្ដាល ។
ប្រភពព័ត៌មានពីអ្នកភូមិ បានឲ្យដឹងថា មុនពេលកើតមាននូវគ្រោះអកុសលនោះ ជនរងគ្រោះបានកាន់ឧបករណ៍ឆក់ត្រី ទៅឆក់ត្រីនៅចំណុចខាងលើ ហើយក៏បាត់ជនរងគ្រោះមិនឃើញត្រឡប់មកផ្ទះវិញ។ រីឯសាច់ញាតិ ក៏ចេះតែដើរតាមរក ស្រាប់តែប្រទះឃើញជនរងគ្រោះ ដេកស្លាប់យ៉ាងអាណោចអាធ័ម នៅក្នុងទឹក ទើបរាយការណ៍ទៅសមត្ថកិច្ច ឲ្យចុះមកពិនិត្យ។
មន្ត្រីប៉ុស្ដិ៍នគរបាលរដ្ឋបាលសំបួរមាស បានឲ្យដឹងថា ជនរងគ្រោះ ឈ្មោះ ណូត សុផល ហៅសេះ អាយុ៣០ឆ្នាំ មុខរបរជាកសិករ រស់នៅភូមិ-ឃុំកើតហេតុ។ មុនពេលចុះទៅពិនិត្យនោះ សមត្ថកិច្ចបានទទួលព័ត៌មានមកថា មានករណីអ្នកឆក់ត្រី ភ្លាត់ស្នៀតឆក់ខ្លួនឯងស្លាប់ នៅចំណុចខាងលើ។
មន្ត្រីនគរបាលដដែលបានបន្តថា បន្ទាប់ពីទទួលបានព័ត៌មានបែបនេះភ្លាម មន្ត្រីជំនាញបានសហការជាមួយកម្លាំងប៉ុស្ដិ៍ អាជ្ញាធមូលដ្ឋាន និងគ្រូពេទ្យឃុំ ដើម្បីពិនិត្យសាកសព ដោយរកឃើញថា នៅលើខ្លួនសាកសព មានស្នាមខ្លោចស្បែក នៅលើពោះ ប្រវែង២០សង់ទីម៉ែត្រ នៅលើចង្កេះខាងស្ដាំ មានស្នាមខ្លោចស្បែក ប្រវែង១២សង់ទីម៉ែត្រ និងមានស្នាមខ្លោច នៅលើកចង្កាផងដែរ។ រីឯនៅកន្លែងកើតហេតុ សមត្ថកិច្ចរកឃើញវត្ថុតាងជាច្រើន រួមមាន ដងឆក់២ដើម(ធ្វើពីឫស្សី) ដែកសរសៃ អាគុយម៉ាកតូក្យូ ៤០អំពែរ១ អាំងវ៉ាត់ទរ័កម្លាំង១គ្រឿង។
ដូច្នេះសមត្ថកិច្ចជំនាញ បានសន្និដ្ឋានជាជំហានដំបូងថា ជនរងគ្រោះពិតជាស្លាប់ ដោយសារឆក់នឹងឧបករណ៍ឆក់ត្រី ដោយខ្លួនឯងប្រាកដមែន។ ក្រោយពេលពិនិត្យ និងធ្វើកោសល្យវិច័យរួច សមត្ថកិច្ចបានប្រគល់សាកសពរបស់ជនរងគ្រោះ ទៅឲ្យក្រុមគ្រួសារ ដឹកទៅកាន់លំនៅឋាន ដើម្បីរៀបចំធ្វើបុណ្យ តាមប្រពៃណី៕ សហការី KBN-LIVE.com
