រាជធានីភ្នំពេញ៖ ស្របពេលដែល ប្រជាពលរដ្ឋខ្មែរជាច្រើននាក់ស ម្តែងនូវការកើតទុក្ខ និងសោកស្ដាយយ៉ាងខ្លាំង នូវការបាត់បង់វីរៈពិធីករជើងចាស់ ដ៏មានវោហារសាស្ត្រ យ៉ាងពូកែនោះ សម្ដេចនាយករដ្ឋមន្ត្រីកម្ពុជា ក៏បានបញ្ចេញសារខ្លី បង្ហាញនូវអារម្មណ៍ក្ដុកក្ដួល អួលដើមក ហើយប្រៀបបាននឹងការបាត់បង់ កូនប្រុសជាទីស្រឡាញ់ របស់សម្ដេចផងដែរ។
សារខ្លីអួលដើមរបស់ សម្ដេចតេជោ ដែលរៀបរាប់ពីការបាត់បង់លោក អ៊ិត សេដ្ឋា នោះអត្ថន័យយ៉ាងដូច្នេះ៖
“ក្មួយ អ៊ិត សេដ្ឋា ពេលនេះរូបកាយក្មួយបានបាត់ពីភពផែនដីនេះរួចទៅហើយបន្សល់ទុក តែការស្តាយ ស្រណោះពីមនុស្សជាច្រើនដែលបានរាប់អានក្មួយ។ ប្រមាណ២០ឆ្នាំកន្លងមកនេះ ទំនាក់ទំនងរវាងក្មួយជាមួយពូនិងមីងប្រៀបដូចឪពុក ម្តាយនិងកូន។
ពូនៅចាំបាននូវអ្វីៗដែលក្មួយបានរៀបរាប់តាមលិខិត តាមទូរស័ព្ទនិងការជួបក្មួយផ្ទាល់នៅផ្ទះពូនាឆ្នាំ២០១៥។ ពូនៅចាំបាននូវសំណូមពរដែលក្មួយបានសុំមកពូដើម្បីកសាងសាលារៀនដែលក្មួយធ្លាប់រៀន ម្ដាយក្មួយធ្លាប់បង្រៀន និងកសាងទីអារ៉ាមនៅភូមិកំណើតរបស់ក្មួយ។
ក្មួយប្រុស ពេលក្មួយកំពុងត្រូវការសង្គ្រោះ និងរហូតពេលក្មួយចែកឋានពូកំពុងស្ថិតក្នុងពេលវេលារវល់ បំផុត គឺចំថ្ងៃបោះឆ្នោត។ តែទោះយ៉ាងណាមីងបានធ្វើទំនាក់ទំនងជាប្រចាំជាមួយ លោក ហ៊ុយ វណ្ណៈ ដើម្បីបានដឹងពីស្ថានភាពរបស់ក្មួយ។
ការបាត់បង់ក្មួយប្រៀបដូចជាការបាត់បង់កូនប្រុសម្នាក់ដែលពុកនិងម៉ែនឹងរួមចំណែកជាមួយអ្នករាប់អានកូនជួយចិញ្ចឹមបីបាច់ចៅប្រុស ស្រីដែលនៅកំព្រានោះឡើយ។ លាគ្នាពីឋានខុសគ្នាដោយទឹកភ្នែកណាកូនប្រុសពុក”៕
ផ្តល់សិទ្ធដោយ៖ kqube.net