ភ្នំពេញ ៖ យកធុងស្ពេត្រូ ដាក់ទឹកកកក្លាសេស្រាបៀរ រួចទុកចោលលើគ្រែ ជីដូនយកចៅប្រុស អាយុមួយខួបកន្លះ ទៅអង្គុយលេងលើគ្រែនោះ បានមួយភ្លែត ស្រាប់តែដាំក្បាល ចូលក្នុងធុងស្ពេត្រូស្លាប់ គួរឲ្យអណោចអធ័ម កាលពីវេលាម៉ោង ៦និង២០នាទីព្រលប់ ថ្ងៃទី៣១ ខែឧសភា ឆ្នាំ២០១៧ នៅផ្ទះរបស់ជនរងគ្រោះ ស្ថិតក្នុងភូមិស្ពានថ្ម សង្កាត់ស្ពានថ្ម ខណ្ឌដង្កោ ។
សពកុមាររងគ្រោះ មានឈ្មោះ ប៉េង ឧត្តម ភេទប្រុស អាយុមួយខួបកន្លះ ត្រូវជាកូនទី២ ក្នុងចំណោមបងប្អូន ៣នាក់ ស្រីមួយ ប្រុសមួយ និងម្នាក់ទៀតនៅក្នុងផ្ទៃ មានម្ដាយឈ្មោះធី ស្រៀង អាយុ២៥ ឆ្នាំមុខរបរកម្មកររោងចក្រ ឪពុកឈ្មោះ ពុត ណូញ អាយុ ៣១ឆ្នាំ មុខរបរ កម្មកររោងចក្រស្នាក់នៅ ភូមិស្ពានថ្ម សង្កាត់ស្ពានថ្ម ខណ្ឌដង្កោ ។
តាមសម្ដីឈ្មោះ ឡុង សៀក អាយុ៧៥ឆ្នាំ ត្រូវជាជីដូនបង្កើត និងជាអ្នកមើលថែចៅ បានអោយដឹងថា នៅមុនពេលកើតហេតុ មានអ្នកជិតខាងប្រុសៗប្រមាណ ៣ទៅបួននាក់ បានមកផឹកស៊ីនៅលើគ្រែផ្ទះគាត់ ដោយបានទិញស្រាបៀរ យកមកផឹក ហើយបានយកធុងស្ពេត្រូ យកមកក្លាសេស្រាបៀរ លុះដល់ពេលពួកគេ ផឹកស៊ីចប់ ក៏បាននាំគ្នាត្រលប់ទៅផ្ទះ រៀងៗខ្លួនអស់ទៅ ដោយមិនបាន យកធុងស្ពេត្រូ ដែលមានទឹកសំរាប់ក្លាសេស្រាបៀរនោះ ទៅចាក់ចោលទេ ។
ប្រភពដដែល បានបន្តទៀតថា នៅវេលាកើតហេតុ បន្ទាប់ពីក្រុមអ្នកផឹក បានចេញទៅផ្ទះអស់ រូបគាត់ជាជីដូន បានលើកចៅប្រុសរបស់គាត់ ដែលជាជនរងគ្រោះ មកដាក់អោយលេងលើគ្រែ ហើយរូបគាត់ ក៏មិនបានចាប់អារម្មណ៍ថា នៅក្នុងធុងស្ពេត្រូនិងមានទឹកទេ ។
ពេលដែលគាត់ដាក់ចៅ ឱ្យនៅលេងលើគ្រែហើយ រូបគាត់ត្រូវជាជីដូន ក៏ទៅងូតទឹក និងបោកខោអាវមួយភ្លែត លុះដល់ពេលរូបគាត់ បានងូតទឹក និងបោកខោអាវរួចហើយ រូបគាត់បានដើរមករកចៅ ក៍ស្រាប់តែឃើញចៅប្រុស របស់គាត់ដាំក្បាល ចូលទៅក្នុងធុងស្ពេត្រូ ដែលមានទឹកកន្លះធុង ។ ភ្លាមៗនោះដែរ រូបគាត់ជាជីដូន បានស្ទុះទៅលើកចៅ និងស្រែក អោយអ្នកជិតខាងជួយ គាប់ជួនពេលនោះ ឪពុកជនរងគ្រោះ បានមកពីធ្វើការ ឃើញហេតុការណ៍ដូច្នេះ ក៏បានរត់ទៅជួយសង្គ្រោះ និងធ្វើចលនា តែអកុសល ចៅប្រុសរបស់គាត់ បានដាច់ខ្យល់ស្លាប់បាត់ទៅហើយ ។
បន្តិចក្រោយមក ប្រជាពលរដ្ឋដែលបាន មកមើលហេតុការណ៍ រួចហើយក៏បានផ្តល់ដំណឹងទៅដល់សមត្ថកិច្ច មូលដ្ឋានអោយចុះមកមើល លុះសមត្ថកិច្ចមូលដ្ឋាន បានចុះទៅដល់កន្លែងកើតហេតុរួចហើយ បានទំនាក់ទំនងទៅខាង ជំនាញកោសល្យវិច័យ អោយមកពិនិត្យសពកុមារជនរងគ្រោះ ។
បើតាមសម្តីស្ត្រី ត្រូវជាម្តាយបង្កើត បាននិយាយថា រូបគាត់មានកូនចំនួន ៣នាក់ ប្រុសមួយស្រីមួយ និងម្នាក់ទៀត កំពុងពពោះចំនួន៨ខែហើយ នៅមុនពេលកើតហេតុ រូបគាត់ ២នាក់ប្តីប្រពន្ធបានចេញទៅធ្វើការ នៅរោងចក្រ អាមេរិកកាំង ស្ថិតនៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ លុះដល់ពេលចេញពីធ្វើការ នៅម៉ោង៦ល្ងាច ពួកគាត់បានត្រលប់ទៅផ្ទះវិញ ដោយមិនដឹងថា មានរឿងអ្វីនោះទេ លុះទៅដល់ផ្ទះ ក៏ស្រាប់តែអ្នកជិតខាងប្រាប់ថា កូនរបស់គាត់លង់ទឹកស្លាប់បាត់ទៅហើយ ។
ក្រោយពេលកើតហេតុ សពកុមារជនរងគ្រោះ ត្រូវបានសមត្ថកិច្ចជំនាញ ខាងកោសល្យវិច័យ មកពិនិត្យឃើញថា ជនរងគ្រោះពិតជាស្លាប់ ដោយសារតែលង់ទឹក ពិតប្រាកដមែន ហើយក៏មិនមានរឿងអ្វី ក្រៅពីនេះដែរ ព្រមទាំងបានធ្វើកំណត់ហេតុរួច បានប្រគល់សពទៅក្រុមគ្រួសារ រៀបចំធ្វើបុណ្យទៅតាមប្រពៃណី នៅផ្ទះរបស់ជនរងគ្រោះតែម្តង ៕
សហការី kbn-live.com