សន្តិសុខកំពុងត្រូវបានរឹតបន្តឹងយ៉ាងខ្លាំងក្នុងប្រទេស កូរ៉េខាងត្បូង មុនពេលការបោះឆ្នោតប្រធានាធិបតីចូលមកដល់នៅថ្ងៃទី ៩ ខែ ឧសភានេះ ដំណាលពេលដែលបេក្ខភាពប្រធានាធិបតីទាំងឡាយ ខ្វែងគំនិតគ្នាចំពោះការដាក់ពង្រាយប្រព័ន្ធការពារមីស៊ីលរបស់ សហរដ្ឋអាមេរិក នៅលើទឹកដី កូរ៉េខាងត្បូង និងជាប្រធានបទសំខាន់ក្នុងការឃោសនាប្រកួតប្រជែងនៃបេក្ខភាពនីមួយៗ ។
ក្នុងចំណោមបេក្ខភាពប្រធានាធិបតី កូរ៉េខាងត្បូង មានសំឡេងនាំមុខគឺ លោក Moon Jae-in មកពីគណបក្សរំដោះ ជាអ្នករិះគន់យ៉ាងខ្លាំងទៅលើការដាក់ពង្រាយប្រព័ន្ធការពារមីស៊ីល ។ ចំណែកលោក Ahn Cheol-soo ជាអ្នកមានគោលនយោបាយផ្ដោតទៅលើសន្តិសុខជាតិ ហើយគាំទ្រវត្តមានប្រព័ន្ធការពារមីស៊ីល នៅលើទឹកដី កូរ៉េខាងត្បូង និងជាបេក្ខភាពទទួលបានការគាំទ្រច្រើនក្នុងចំណោមអ្នកអភិរក្សនិយម ដោយភាគច្រើននៃបេក្ខភាពអភិរក្សនិយមជាអ្នកគាំទ្រផែនការដំឡើងប្រព័ន្ធការពារមីស៊ីល ។ អ្នកស្រី Sim Sang-jung ជាបេក្ខភាពប្រឆាំងប្រព័ន្ធការពារមីស៊ីល ដោយអះអាងថា បញ្ហានេះបានធ្វើឲ្យសង្គម កូរ៉េខាងត្បូង មិនចុះសម្រុងគ្នា ។
ទោះយ៉ាងណា ក្នុងពេលដែលប្រព័ន្ធការពារមីស៊ីលកំពុងដំឡើង អ្នកជំនាញមិនប្រាកដថា តើប្រធានាធិបតីជាប់ឆ្នោតមានអំណាចលុបចោលផែនការនោះដែរឬយ៉ាងណា ។ ប្រធានក្រុមអ្នកស្រាវជ្រាវផ្នែកការពារ និងសន្តិសុខ កូរ៉េខាងត្បូង និយាយថា ការដំឡើងប្រព័ន្ធការពារមីស៊ីល មានសារសំខាន់សម្រាប់សម្ពន្ធភាព អាមេរិក-កូរ៉េ ដូច្នេះប្រសិនបើរដ្ឋាភិបាលក្រោយកែប្រែផែនការនេះ នឹងនាំឲ្យប៉ះទង្គិចដល់ទំនាក់ទំនងរវាងទីក្រុង វ៉ាស៊ីនតោន និងទីក្រុង សេអ៊ូល ។
ផ្ដល់សិទ្ធិដោយ ៖ Kqube