រ៉ាប៊ី ឆ្លើយតបបែបនេះក្រោយអ្នកគាំទ្រជំរុញឱ្យយកកូនស្របពេល Nick Taylor ត្រឡប់ទៅក្លិបបាល់ទាត់នៅថៃវិញ

ស្របពេលស្វាមីដែលជាកីឡាករបាល់ទាត់ Nick Taylor វិលត្រឡប់ទៅក្លិបនៅឯប្រទេសថៃវិញតារាចម្រៀង រ៉ាប៊ី ត្រូវបានអ្នកគាំទ្រជំរុញឱ្យរូបនាងឆាប់មានកូនដោយសារតែចង់ឃើញមុខកូនអ្នកទាំងពីរ។ ទោះយ៉ាងណា ម្ចាស់បទ«មាន់ស្រែ» បានឆ្លើយតបថានៅពេលស្វាមីនាងវិលត្រឡប់មករស់នៅជុំគ្នាវិញទើបនាងសម្រេចចិត្តគិតគូរពីព្រោះយកពេលនេះខ្លាចឯកា។

បន្ទាប់ពីរៀបការជាមួយគ្នាមក តារាចម្រៀង រ៉ាប៊ី និង Nick Taylor ត្រូវរស់នៅឆ្ងាយពីគ្នាដោយជារឿយៗ Nick ធ្វើដំណើរចុះឡើងមកលេងភរិយានៅខ្មែរ។ បន្ទាប់ពីបញ្ចប់រដូវកាលទី១ កីឡាករកូនកាត់ Nick Taylor បានបន្តនៅក្លិប PT Prachuap FC របស់ប្រទេសថៃមួយរដូវកាលទៀត។ ទោះបីជានៅបន្តនៅក្លិបនេះដដែលក្តី Nick មិនមានឈ្មោះសម្រាប់ការប្រកួតនោះទេដោយសារតែលោករងរបួសជង្គង់ដែលទាមទារឱ្យសម្រាកព្យាបាលទាំងស្រុងរហូតដល់ដើមឆ្នាំក្រោយទើបអាចចូលប្រកួតបាន។

ទោះបីជារស់នៅម្ខាងម្នាក់ប៉ុន្តែរាល់ពេលដែល រ៉ាប៊ី និង Nick Taylor ជួបគ្នាពួកគេតែងតែធ្វើឱ្យអ្នកគាំទ្រចាប់អារម្មណ៍ដោយសារតែភាពផ្អែមល្ហែមរបស់គូស្វាមីភរិយានេះ។ ជាមួយគ្នានេះដែរ នៅព្រឹកថ្ងៃទី២៤ ខែតុលា រ៉ាប៊ី បានបង្ហោះវីដេអូមួយដែលបង្ហាញពីភាពក្រៀមក្រំត្រូវបែកស្វាមីម្តងទៀតដោយ Nick វិលត្រឡប់ទៅកាន់ក្លិបនៅឯប្រទេសថៃវិញហើយ។

នៅក្នុងផ្នែកមតិយោបល់អ្នកគាំទ្រជាច្រើនបានបង្ហាញការចូលចិត្តទៅលើគូ រ៉ាប៊ី និង Nick ។ នៅក្នុងការបញ្ចេញមតិជាច្រើនអ្នកគាំទ្រមួយរូបបានជំរុញឱ្យតារាចម្រៀង រ៉ាប៊ី ឆាប់យកកូន។ គណនីមួយបានសរសេរថា «ឆាប់យកបេប៊ីទៅបងចង់ឃើញមុខកូនស្រីបង»។ មតិយោបល់នេះ រ៉ាប៊ី បានឆ្លើយតបថា «ចាំប្ដីមកវិញបានយកអូនយកពេលនេះខ្លាចឯកា»។

គួរឱ្យដឹងថាក្នុងពេល Nick ទៅលេងឱ្យក្លិបនៅឯប្រទេសថៃ រ៉ាប៊ី ធ្លាប់បានឆ្លើយតបទៅកាន់អ្នកគាំទ្រថាស្វាមីរបស់នាងទៅលេងដើម្បីយកបទពិសោធន៍នៅទីនោះ២ ៣ កន្លែងសិនទើបវិលត្រឡប់មកលេងនៅក្នុងស្រុកខ្មែរវិញ៕