Justin Bieber រៀបចំកម្មវិធីសម្ដែងឥតគិតថ្លៃសម្រាប់អ្នកគ្មានផ្ទះសម្បែងក្នុងទីក្រុងឡូសអាន់ជេឡេស

Justin Bieber បានរៀបចំកម្មវិធីមួយនៅក្នុងឧទ្យានមួយដែលមានមនុស្សអនាថាជាច្រើននាក់ ដោយបានបរិច្ចាគសម្ភារៈចាំបាច់ដល់អ្នកដែលខ្វះខាត។ ការប្រគំតន្ត្រីដែលមិនបានរៀបចំទុកជាមុននៅ MacArthur Park ក្នុងទីក្រុង Los Angeles នារសៀលថ្ងៃទី ២២ ខែកញ្ញា Justin បានសម្តែងជាមួយតន្ត្រីករជាច្រើននាក់ដោយច្រៀងបទចម្រៀងដូចជា «Speed Demon» ,« All I Can Take» , និង «Yukon»។

ការសម្តែងនេះបានទាក់ទាញចំណាប់អារម្មណ៍យ៉ាងខ្លាំងយ៉ាងឆាប់រហ័ស ដោយត្រូវបានថតដោយអ្នកដំណើរឆ្លងកាត់ និងចែករំលែកនៅលើបណ្តាញសង្គម។ គណនីមួយចំនួនបានសម្តែងការភ្ញាក់ផ្អើលដែល Justin Bieber បានសម្រេចចិត្តធ្វើការប្រគំតន្ត្រីខ្នាតតូចនៅទីនេះ ដោយសារតែតំបន់នេះមិនសូវមានសន្តិសុខនិងពោរពេញដោយបញ្ហាសង្គម។

យោងតាមកាសែត The Guardian ឧទ្យានខាងលើនេះដែលមានទីតាំងនៅភាគខាងលិចនៃកណ្តាលទីក្រុងគឺជាមជ្ឈមណ្ឌលសម្រាប់សកម្មភាពក្រុមក្មេងទំនើង និងជាកន្លែងប្រមូលផ្តុំអ្នកញៀនថ្នាំយ៉ាងច្រើន។ ក្នុងរយៈពេលប៉ុន្មានឆ្នាំចុងក្រោយនេះ មនុស្សអនាថាតែងតែផ្លាស់មករស់នៅទីនេះដោយបោះតង់នៅជុំវិញឧទ្យាន។

យោងតាម TMZ តារាចម្រៀង Justin Bieber បានរៀបចំកម្មវិធីនេះឡើងដើម្បីជួយដល់ជនអនាថានៅក្នុងតំបន់។ សិល្បកររូបនេះត្រូវបានគេរាយការណ៍ថាបានចំណាយប្រាក់រាប់ពាន់ដុល្លារដើម្បីទិញរបស់ចាំបាច់ដូចជា កាតអំណោយ ស្រោមជើង ទឹក និងរបស់ចាំបាច់ផ្សេងទៀតសម្រាប់ពួកគេ។ ថ្លែងទៅកាន់ Page Six លោក Daniel Orea អ្នកគ្រប់គ្រងហាងនំប៉័ងមួយក្បែរកន្លែងដែល Justin បានសម្តែងបាននិយាយថាលោកបានឃើញតារាចម្រៀងរូបនេះ និងមិត្តភក្តិរបស់លោកកាន់ថង់ក្រដាសតូចៗដែលពេញទៅដោយរបស់របរ ដោយចែកជូនដល់ជនអនាថាជាច្រើន។ មិត្តភក្តិពីរនាក់របស់ Justin ថែមទាំងបានទិញនំដូណាត់ល្អៗទាំងអស់នៅក្នុងហាងដើម្បីចែកជូនដល់ទស្សនិកជនទៀតផង។

ការប្រគំតន្ត្រីរបស់ Justin Bieber ទទួលបានការឆ្លើយតបជាវិជ្ជមានពីអាជ្ញាធរមូលដ្ឋាន។ នៅលើ X ព្រះរាជអាជ្ញាស្រុក Los Angeles បានពិពណ៌នាអំពីការសម្តែងនេះថាជា ភ័ស្តុតាងនៃវឌ្ឍនភាពក្នុងការទាមទារយកឧទ្យាននេះមកវិញពីអ្នកជួញដូរគ្រឿងញៀន ដោយប្រែក្លាយវាទៅជាកន្លែងដែលសមស្របសម្រាប់គ្រួសារ។

នេះមិនមែនជាលើកទីមួយទេដែល Justin Bieber បានជួយសហគមន៍អនាថានៅ Los Angeles។ កាលពីខែកុម្ភៈ ឆ្នាំ២០២០ លោកបានសហការជាមួយអង្គការសប្បុរសធម៌ដើម្បីបង្កើត មូលនិធិ Intentions ដើម្បីជួយស្ត្រី និងកុមារអនាថាឱ្យស្វែងរកជីវិតស្ថិរភាព៕