សួស វីសា បង្ហាញការឈឺចាប់ជំនួសស្រ្តីៗពេលបាក់សម្រស់ប្តីចាប់ផ្តើមមានថ្មី

តារាចម្រៀង សួស វីសា និយាយទាំងអួលដើមកបង្ហាញការឈឺចាប់ជំនួសស្រ្តីដទៃទៀតដែលប្រឈមនឹងការក្បត់ចិត្តពីប្តីដែលលួចមានស្រីថ្មីនៅពេលប្រពន្ធបាក់សម្រស់ដោយសារតែការសម្រាលកូន។ ការឈឺចាប់ដែលស្រ្តីទទួលបាននេះ សួស វីសា បង្ហាញការយល់ចិត្តនិងបញ្ជាក់ថាមិនមែនជារឿងផ្ទាល់ខ្លួននាងនោះទេប៉ុន្តែដោយសារតែឃើញពីភាពអយុត្តិធម៌សម្រាប់មនុស្សស្រី។

ថ្មីៗនេះការលែងលះរបស់តារាចម្រៀង សួស វីសា និង ថមមី បានបង្កឱ្យមានការភ្ញាក់ផ្អើលយ៉ាងខ្លាំងពីមហាជននិងអ្នកនៅក្នុងចង្កោមសិល្បៈ។ អ្នកគាំទ្រទើបតែបង្ហាញការរីករាយនៅពេលឃើញតារាចម្រៀងរូបនេះវិលមកកាន់សិល្បៈវិញបន្ទាប់ពីផ្អាកសកម្មភាព២ឆ្នាំ ប៉ុន្តែក៏បានបង្ហាញការសោកស្តាយយ៉ាងខ្លាំងនិងសឹងតែមិននឹកស្មានដល់ចំពោះដំណឹងបែកបាក់របស់នាង។

តាមការចាក់ផ្សាយនៅក្នុងកម្មវិធីមួយនាពេលថ្មីៗនេះ តារាចម្រៀង សួស វីសា បានបកស្រាយបទចម្រៀងចំនួន៦បទហើយទឹកដមសំឡេងរបស់នាងនៅតែពីរោះរណ្តំមានការពេញចិត្តពីទស្សនិកជនដដែល។ យ៉ាងណាអ្នកលេងបណ្តាញសង្គមក៏បានចាប់អារម្មណ៍ទៅលើវីដេអូមួយដែលតារាចម្រៀង សួស វីសា លើកឡើងពីទុក្ខលំបាកនិងការឈឺចាប់របស់ស្រ្តីជាភរិយា។

ក្នុងវីដេអូនោះ សួស វីសា បាននិយាយថា ប្តីខ្លះនៅពេលប្រពន្ធពរពោះ ចាញ់កូន ប្រពន្ធលែងស្អាតប្តីមានស្រី។ និយាយទាំងអួលដើមក សួស វីសា ថានៅពេលនិយាយដល់រឿងនេះគឺឈឺចាប់ខ្លាំងណាស់។

ទោះយ៉ាងណា តារាចម្រៀងរូបនេះបញ្ជាក់យ៉ាងច្បាស់លាស់ថាមិនមែនជារឿងរបស់នាងនោះទេប៉ុន្តែកើតមកជាមនុស្សស្រីហេតុអ្វីក៏វេទនា ត្រូវមកធ្វើជាប្រពន្ធគេ រ៉ាប់រងគ្រួសារមើលថែប្តី កូន មើលថែគ្រប់មុខ ឆ្លងកាត់ការសម្រាលកូន តែមិនទទួលបានការគោរពស្រលាញ់នៅពេលលែងស្អាតប្តីក៏មានអ្នកក្រៅ ហើយនេះគឺពិតជាអយុត្តិធម៌សម្រាប់មនុស្សស្រីណាស់៕