Rick Kh លើកឡើងចំៗក្រោយអ្នកមួយចំនួនមានប្រាក់ខែតិចតែទិញកាត Pokémon មិនលួសថ្ងៃ

ស្របពេលមនុស្សមួយចំនួនកំពុងញៀ.ននឹងការបើកកាត Pokémon ដើម្បីផ្សងសំណាងអ្នកបង្កើតមាតិកា Rick Kh បានចេញវីដេអូមួយដាស់ស្មារតីទៅដល់អ្នកដែលមានប្រាក់ខែតិចប៉ុន្តែទិញកាត Pokémon មិនលួសថ្ងៃ។ ទោះយ៉ាងណាការដាស់តឿនរបស់ Rick Kh បែរជាត្រូវបានអ្នកគាំទ្រវ័យក្មេងជាច្រើនខឹងលោកទៅវិញ។

នៅល្ងាចថ្ងៃទី១៩ ខែសីហា ឆ្នាំ២០២៦ Rick Kh បានបង្ហោះវីដេអូមួយដោយភ្ជាប់មកជាមួយនឹងចំណងជើងថា «ទុកលុយហូបបាយ ចាក់សាំងខ្លះផង កាតអនុស្សាវរីយ៍តុក្កតាមិនមែនល្បែងទេ»។ អ្នកបង្កើតមាតិការូបនេះបាននិយាយថា ឈប់បើកកាត Pokémon ទៅគ្មានលុយចាក់សាំងប្រាក់ខែតែ២០០-៣០០ ទិញកាត Pokémon ២០-៣០ ដុល្លារតើបានលុយមកពីណា បញ្ចាំងម៉ូតូឬខ្ចីលុយម៉ែ?។ Rick Kh ថាសម្រាប់គេអ្នកមានឱ្យគេបើកទៅ វាជាក្រដាសវត្ថុអនុស្សាវរីយ៍ ទុកជា collection មិនមែនជាល្បែងនោះទេ កុំចង់បានមួយកញ្ចប់ផ្លាស់ប្តូរជីវិតក្លាយជាមហាសេដ្ឋី វាមិនអាចទៅរួចនោះទេ។

• អ្នកបង្កើតមាតិកាដ៏ល្បីឈ្មោះរូបនេះបន្តទៀតថា ឃើញលោកបើកកាតមួយសន្លឹកបាន១ម៉ឺនដុល្លារមិនអាចបើកបានដូចជាលោកនោះទេពីព្រោះកាតដែលអ្នកបើកគឺនៅក្នុងឆ្នាំ២០២៦ទិញតាមហាង ខណៈលោកទិញតាំងពីឆ្នាំ២០១៦ ហើយសំណាងក៏បានទៅ។ Rick Kh ថាអ្វីគ្រប់យ៉ាងមិនដូចអ្វីដែលយើងលោភលន់ចង់បាននោះទេស្តាយប្រាក់ខែដែលខំរកមក ឬអាចថាមានកម្មវិធីខួបកំណើតយូរៗម្តងទិញចែកមនុស្សជាទីស្រលាញ់ទុកជាអនុស្សាវរីយ៍ មិនមែនជាការបើករាល់ថ្ងៃទុកជាអាជីព ទុកជាមុខរបរនោះទេ គួរភ្ញាក់ខ្លួនឡើង។

• Rick Kh ថាចាប់ពេលនេះទៅលោកឈប់បើកកាត Pokémon ហើយប្រសិនជាចង់បានខ្លាំងអាចមកយកពីលោកបានមកអានសៀវភៅនៅបណ្ណាល័យរាល់ថ្ងៃ។

• បន្ទាប់ពីចេញវីដេអូ និង Live ជជែកពីបញ្ហានេះ Rick Kh បានបង្ហាញថាលោកបានបាត់បង់អ្នកគាំទ្រវ័យក្មេងជាច្រើន។ នៅព្រឹកថ្ងៃទី២០ ខែសីហា Rick Kh បានបង្ហោះសំណេរនៅលើបណ្តាញសង្គមថា «ថ្ងៃនេះខ្ញុំបាត់បង់ហ្វេនក្មេងៗជាច្រើន ព្រោះខ្ញុំព្យាយាមពន្យល់គាត់ ថាកាត Pokémon ជាវត្ថុអនុស្សាវរីយ៍រក្សាទុក មិនមែនជាកំណប់ដែលយើងត្រូវទិញរាល់ថ្ងៃទេ គ្មានអ្នកណាស្តាប់ខ្ញុំឡើយ មានតែខឹង ។ មិនជាបញ្ហា ពាក្យពិតវាមិនស្រួលស្តាប់សម្រាប់ក្មេង – នៅអឺរ៉ុបអាម៉េរិកគេទិញតែពេលណាគេរៀនពូកែ រឺក៏រដូវបុណ្យទាន ខួបជាដើម ដើម្បីលើកទឹកចិត្តកុមារ ទុកជា collection ពេលធំឡើង…»។

លោក បន្តទៀតថា «អរគុណដែលធ្លាប់ជាហ្វេន ខ្ញុំនឹងចែកទាំងអស់នៅបណ្ណាល័យ សិស្សមកអានរាល់ថ្ងៃក៏បាន ហើយសិស្សពូកែនិទ្ទេស A រើស Pikachu បានតាមចិត្ត មានស៊ុមរឹងឱ្យ (PSA 6-10). ត្រូវចាំថា ចំណេះដឹងនៅជាមួយយើងយូរអង្វែងជាងទ្រព្យមួយខ្យល់នេះទៀត – ខ្ញុំគ្មានភាពលោភលន់ចង់បាន ក្រៅពីផ្តល់ឱ្យនិងពន្យល់គ្រប់យ៉ាង »៕