ប្រធានបទទាក់ទងនឹងវិស័យកសិកម្មនៅក្នុងការប្រកួតបវរកញ្ញាកម្រនឹងមានបេក្ខភាពយកមកតស៊ូមតិណាស់ប៉ុន្តែ ប៊ី សុធារី បានធ្វើឱ្យមានការចាប់អារម្មណ៍ចំពោះការជ្រើសរើសប្រធានបទមួយនេះ។
នៅក្នុងបទសម្ភាសន៍មួយដែល ប៊ី សុធារី ចូលរួមត្រូវបានអ្នកគាំទ្រចែករំលែកជាវីដេអូខ្លីៗ នៅលើបណ្តាញសង្គមទិកតុកដោយបេក្ខភាពដែលកំពុងប្រកួតនេះបាននិយាយថាវិស័យកសិកម្មគឺជាវិស័យមួយដែលគេមើលរំលង។ មិនត្រឹមតែប៉ុណ្ណោះ សុធារី និយាយថាពាក្យថា«បវរកញ្ញាកសិកម្ម»ធ្វើឱ្យអ្នកមួយចំនួនគិតថាមិនឡូយឆាយ ប៉ុន្តែសម្រាប់នាងមិនគិតដូច្នេះទេ។ ប៊ី សុធារី ពន្យល់ថាកសិកម្មគឺជាឬសគល់នៃខ្មែរយើងមានការដាំដុះតាំងពីសម័យដូនតាមកទើបធ្វើឱ្យមានអ្នកជំនាន់ក្រោយ ដូច្នេះនាងត្រូវតែចេញមុខជួយផ្សព្វផ្សាយ។
បេក្ខភាព ប៊ី សុធារី បានបន្ថែមទៀតថានាងមិនអាចជួយអ្វីបានច្រើននោះទេក្រៅពីការប្រើប្រាស់សំឡេងរបស់នាងក្នុងនាមជាបវរកញ្ញានិងចូលរួមផ្សព្វផ្សាយឱ្យពួកគាត់ប្រសិនជាមានតម្រូវការណាមួយ។
ការលើកឡើងរបស់ ប៊ី សុធារី ទាក់ទងនឹងវិស័យកសិកម្មបានធ្វើឱ្យមានការចាប់អារម្មណ៍ជាច្រើនពីអ្នកលេងបណ្តាញសង្គមជាពិសេសសរសើររូបនាងដែលជ្រើសយកប្រធានបទដែលគេពុំសូវអើពើកន្លងមកយកមកប្រកួតតស៊ូមតិក្នុងកម្មវិធីបវរកញ្ញា។
គួរបញ្ជាក់ផងដែរថា ប៊ី សុធារី បានឆ្លងកាត់ការប្រកួតជាច្រើនទាំងក្នុងស្រុកនិងក្រៅស្រុក ហើយការប្រកួតរបស់នាងចុងក្រោយនេះមានអ្នកគាំទ្រជាច្រើនរំពឹងថានាងអាចនឹងឈ្នះការប្រកួតហើយតំណាងកម្ពុជាម្តងទៀត។ យ៉ាងណាមិញការប្រកួតនេះ ប៊ី សុធារី ពុំមែនជាជើងខ្លាំងតែមួយរូបនោះទេប៉ុន្តែក៏មានបេក្ខភាពថ្មីៗនិង ប៉ូគឹមថេង សុតធីតា ចូលរួមប្រកួតដណ្តើមមកុដផងដែរ៕
