លោក ហ៊ុយ យ៉ាឡេង បានរិះគន់អ្នករៀបចំកម្មវិធីប្រគល់ពានរង្វាន់របស់រោងភាពយន្តលេជេនដែលភ្លេចគុណតម្លៃចាស់ព្រឹទ្ធាចារ្យឱ្យតារាសម្តែងវ័យក្មេងប្រកាសពានដល់តារាសម្តែងជើងចាស់លោកស្រី ឌី សារ៉េត។ ជាមួយនឹងបទពិសោធន៍របស់ខ្លួន២៦ឆ្នាំផលិតកររូបនេះឱ្យអ្នករៀបចំសិក្សារៀនសូត្រពីបរទេស ហើយយ៉ាងហោចណាស់តារាវ័យក្មេងអ្នករៀបចំគួរជ្រើសរើសអ្នកអង្គម្ចាស់ក្សត្រិយ៍ ចេណ្ណា។
នៅរាត្រីថ្ងៃទី ១១ ខែកក្កដា រោងកុនលេជេនបានរៀបចំព្រឹត្តិការណ៍សម្រាប់ឱកាសខួប១៥ឆ្នាំក៏ដូចជារៀបចំកម្មវិធីប្រគល់ពានរង្វាន់ទៅដល់ផលិតករ តារាសម្តែង នៅក្នុងវិស័យភាពយន្តដោយមានការចូលរួមពីសិល្បករ សិល្បការិនី ជាច្រើន។ ទន្ទឹមនឹងកម្មវិធីបានបញ្ចប់គេបានឃើញ លោក ហ៊ុយ យ៉ាឡេង បានបង្ហោះរិះគន់ជាសាធារណៈទៅកាន់អ្នករៀបចំកម្មវិធីនេះបន្ទាប់ពីឃើញតារាវ័យក្មេងឡើងប្រកាសពានរង្វាន់ដល់តារាសម្តែងជើងចាស់លោកស្រី ឌី សារ៉េត។.png)
នាល្ងាចថ្ងៃទី១២ ខែកក្កដា ផលិតករ «ដើម្បីកូន» បានបង្ហោះវីដេអូដោយភ្ជាប់មកជាមួយនឹងសំណេរថា «លទ្ធផលឱ្យជេនស៊ីរៀបចំកម្មវិធីភ្លេចគិតពីគុណតម្លៃជេនចាស់ព្រឹទ្ធាចារ្យ។ ខ្ញុំមិនសំដៅលើក្មេងៗឡើងប្រគល់ពានទេខ្ញុំសំដៅលើអ្នករៀបចំឬមួយគេគិតថាឱ្យក្មេងៗប្រកាសឱ្យពានដល់ព្រឹទ្ធាចារ្យដើម្បីដាស់តឿនឱ្យក្មេងដឹងគុណនិងគោរពមនុស្សចាស់បើដូចនេះយ៉ាងហោចណាស់ក៏ព្រះនាង ចេណ្ណា ទើបសមជាង»។
លោក ហ៊ុយ យ៉ាឡេង លើកឡើងទៀតថា ការឡើងប្រកាសត្រូវហាត់សមនិងរៀបចំមុនកម្មវិធីបរទេសជាច្រើនដែលយើងអាចរៀនសូត្របាន។ លោកបានបញ្ជាក់ថា នេះគឺការផ្តល់មតិយោបល់ក្នុងនាមជាជេនចាស់បទពិសោធន៍២៦ឆ្នាំដើម្បីកែលម្អនិងអភិវឌ្ឍន៍សង្គមជាតិយើង។
គួរឱ្យដឹងថាមកទល់ពេលនេះខាងអ្នករៀបចំកម្មវិធីមិនទាន់បានបញ្ចេញប្រតិកម្មឆ្លើយតបណាមួយឡើយបន្ទាប់ពីមានការរិះគន់ជាសាធារណៈបែបនេះពីលោកហ៊ុយ យ៉ាឡេង៕
