អ្នកគាំទ្របានបង្ហាញប្រតិកម្មយ៉ាងច្រើនបន្ទាប់ពីឃើញតារាខ្មែរដ៏ស្រស់សង្ហា ដេវិដ អ៊ឹងហាវ និងតារាសម្តែង Ayden Sng បានចូលរួមព្រឹត្តិការណ៍តែមួយនិងបានថតវីដេអូជាមួយគ្នា។ កន្លងមក Ayden Sng ធ្លាប់បានមកប្រទេសកម្ពុជានិងបានថ្លែងអំណរគុណអ្នកគាំទ្របន្ទាប់ពីរឿង BL របស់លោកទទួលបាននូវការចាប់អារម្មណ៍ច្រើន។
ដូចប្រិយមិត្តមួយចំនួនជ្រាបមកហើយថាសិល្បករ ដេវិដ អ៊ឹងហាវ បានចូលរួមកម្មវិធីប្រ៊េនៗជាច្រើនមានទាំងក្នុងស្រុកនិងក្រៅស្រុកដោយធ្លាប់បានជួបតារាល្បីៗជាច្រើនរូបក្នុងនាមលោកស្ថិតនៅក្រោមការគ្រប់គ្រងរបស់ទីភ្នាក់ងារសិង្ហបុរី។ នាពេលថ្មីៗនេះ ដេវិដ អ៊ឹងហាវ បានធ្វើឱ្យទស្សនិកជនបញ្ចេញប្រតិកម្មជាពិសេសបន្ទាប់ពីលោកចូលរួមកម្មវិធីមួយហើយប៉ះជាមួយនឹងតារាសម្តែង Ayden Sng។
តាមរយៈវីដេអូដែលចែករំលែកនៅយប់ថ្ងៃទី៨ ខែកក្កដា គេបានឃើញ ដេវិដ អ៊ឹងហាវ Ayden Sng និងសិល្បករផ្សេងទៀតបានថតវីដេអូនិងរូបភាពជាមួយគ្នាសម្រាប់ចូលរួមក្នុងព្រឹត្តិការណ៍មួយប្រកបដោយភាពស្និទ្ធស្នាលនិងចុះសម្រុង។ Ayden Sng បានធ្វើឱ្យអ្នកគាំទ្រកម្ពុជាមានការចាប់អារម្មណ៍ច្រើនទៅៗបន្ទាប់ពីលោកធ្លាប់មកចូលរួមព្រឹត្តិការណ៍ម៉ាកប្រណីតមួយនៅឯខេត្តសៀមរាប។ ក្តីស្រលាញ់បានកើនឡើងទ្វេដងដោយសាររឿងភាគ BL «Double Helix» ដែលមាន Ayden សម្តែងហើយលោកបាននិយាយអរគុណអ្នកគាំទ្រកម្ពុជានៅក្នុងការ Live របស់ខ្លួននាពេលកន្លងមកផងដែរ។
ក្រោយពីឃើញវីដេអូនេះរួចមានអ្នកគាំទ្រជាច្រើនបានបង្ហាញការរំភើបចិត្តខណៈថែមទាំងផ្តាំផ្ញើឱ្យ ដេវិដ អ៊ឹងហាវ បបួល Ayden មកលេងប្រទេសកម្ពុជាម្តងទៀតផងដែរ។
គួរឱ្យដឹងថា Ayden Sng និង ដេវិដ អ៊ឹងហាវ មិនមែនជួបគ្នាទើបតែលើកទី១នោះទេ កន្លងមកអ្នកទាំងពីរក៏ធ្លាប់បានជួបគ្នាតាមរយៈកម្មវិធីមួយក្នុងឆ្នាំ២០២៤។ ទោះយ៉ាងណា ការជួបគ្នាលើកនេះទស្សនិកជនមានការចាប់អារម្មណ៍ខ្លាំងដោយសារតែរឿង BL ដែល Ayden Sng សម្តែងបានក្រសោបនូវភាពល្បីល្បាញមានការពេញនិយមទស្សនាច្រើន៕
