ជុំវិញភាពចម្រូងចម្រាសនៅលើបណ្តាញសង្គមនាពេលថ្មីៗនេះ ឌីជេ ក្តិប បានធ្វើឱ្យទស្សនិកជនមានការចាប់អារម្មណ៍យ៉ាងខ្លាំងបន្ទាប់ពីតារាចម្រៀងរូបនេះចេញមកបង្ហោះសារយ៉ាងក្តៅគគុក។ ទោះបីជាមិនដាក់ឈ្មោះចំៗប៉ុន្តែមនុស្សជាច្រើនជឿថាសំណេររបស់លោកហាក់ចង់សំដៅទៅកាន់តារាចម្រៀង មាស សុខសោភា និងតារាកំប្លែង ពាក់មី ។
នៅរសៀលថ្ងៃទី២៤ ខែមិថុនា ឌីជេ ក្តិប បានបង្ហោះសំណេរមួយថា «សង្គមនេះ!មនុស្សតាំងខ្លួនជាលោកឪនៅអាចយកប្រពន្ធគេបាន ចុះទម្រាំអាមនុស្សមានប្រពន្ធធ្វើសម្ដែងជួយសង្រ្គោះមនុស្សស្រី រឿងអីគេយកគ្នាមិនបាន (មិនចឹង) គ្រាន់តែគេយកគ្នាដោយក្រមវិជ្ជាជីវៈ»។
សំណេរយ៉ាងក្តៅគគុកនេះបានទាក់ទាញអ្នកលេងបណ្តាញសង្គមយ៉ាងឆាប់រហ័សនិងមានការបញ្ចេញមតិយោបល់យ៉ាងច្រើន។ អ្នកមួយចំនួនបានលើកឡើងថាសំណេររបស់ ឌីជេ ក្តិប គឺមុតស្រួយនិងមានអត្ថន័យចុកចាប់ណាស់។ ចំណែកមតិផ្សេងទៀតមិនចង់ឱ្យតារាចម្រៀងរូបនេះលូកដៃចូលទៅក្នុងរឿងចម្រូងចម្រាសទាំងនេះទេដើម្បីរក្សាតម្លៃខ្លួនឯងពីព្រោះគ្មានផលអ្វីដល់លោក។ ទាក់ទងនឹងការបញ្ចេញមតិផ្សេងៗ ឌីជេ ក្តិប បានបញ្ជាក់ថាខ្លួនចង់តែរអ៊ូបន្តិចប៉ុណ្ណោះ។
ការលើកឡើងរបស់ ឌីជេ ក្តិប មានមនុស្សជាច្រើនជឿថាលោកចង់សំដៅទៅកាន់រឿងចម្រូងចម្រាសរបស់តារាចម្រៀង មាស សុខសោភា និងគូស្នេហ៍ ចំណែកមួយឃ្លាទៀតចង់សំដៅទៅកាន់តារាកំប្លែង ពាក់មី។
ដូចទស្សនិកជ្រាបហើយមកថាតារាចម្រៀង មាស សុខសោភា បានហៅតាភ្នំត្បែងថាជាលោកឪៗ ប៉ុន្តែក្រោយមកអ្នកទាំងពីរមានទំនាក់ទំនងស្នេហានឹងគ្នាខណៈគូស្នេហ៍របស់តារាចម្រៀងល្បីឈ្មោះរូបនេះក៏រងនូវការចោទប្រកាន់ជារឿយៗមកថាដណ្តើមប្រពន្ធគេ។ នេះគឺជារឿងអាស្រូវដ៏ធ្ងន់របស់តារាចម្រៀង មាស សុខសោភា ចាប់តាំងពីអ្នកនាងប្រឡូកនៅក្នុងវិថីសិល្បៈ ហើយមកទល់ពេលនេះនៅតែមានអ្នកលេងបណ្តាញសង្គមបញ្ចេញមតិផ្លែផ្កាជារឿយៗ។
សម្រាប់ឃ្លា «មនុស្សមានប្រពន្ធធ្វើសម្ដែងជួយសង្រ្គោះមនុស្សស្រី រឿងអីគេយកគ្នាមិនបាន» របស់ ឌីជេ ក្តិប គឺមានការសង្ស័យថាចង់សំដៅទៅកាន់តារាកំប្លែងពាក់មី ដែលកំពុងមានមតិវែកញែកយ៉ាងក្តៅគគុក។ សកម្មភាពរបស់តារាកំប្លែងរូបនេះនិងនារីម្នាក់មានឈ្មោះថា លក្ខិណា នៅក្នុងការ Live នាពេលថ្មីៗនេះបានធ្វើឱ្យមានការរិះគន់យ៉ាងខ្លាំងដោយចាត់ទុកទង្វើនេះមិនសមរម្យ។ ជារឿយៗតារាកំប្លែង ពាក់មី បានលើកឡើងថាភាពស្និទ្ធស្នាលនេះគ្រាន់តែជាការសម្តែង ប៉ុន្តែមហាជនថានោះគ្រាន់តែជាការកុហក ធ្វើជាខែលការពារប៉ុណ្ណោះ៕
