អូស្ត្រាលីរឹតបន្តឹងការយកថ្នាំហឺតថៃម៉ាកសត្វហង្សចូលប្រទេស បន្ទាប់ពីរកឃើញសារធាតុផ្សំខុសប្រក្រតី

ថ្នាំហឺត១ដប ក៏អាចធ្វើឱ្យអ្នកដំណើរខាតបង់ប្រាក់រាប់ពាន់ដុល្លារ ឬឈានដល់ការលុបចោលទិដ្ឋាការ (Visa) ចូលប្រទេសអូស្ត្រាលី! ថ្នាំហឺតថៃ ម៉ាកសត្វហង្ស (Hong Thai) សម្រាប់ជួយបំបាត់អាការៈវិលមុខ និងផ្តល់ភាពស្រស់ស្រាយនោះ ត្រូវបានអូស្ត្រាលីប្រកាសរឹតបន្តឹង និងតម្រូវឱ្យអ្នកដំណើរទាំងអស់ត្រូវតែរាយការណ៍ជាដាច់ខាត ប្រសិនបើយកជាប់ខ្លួន បន្ទាប់ពីអូស្ត្រាលីរកឃើញសារធាតុផ្សំពីរុក្ខជាតិខុសប្រក្រតីដែលបង្កហានិភ័យដល់បរិស្ថាន។

កាលពីថ្ងៃទី១៩ ខែមិថុនា ឆ្នាំ២០២៦ អាជ្ញាធរសុវត្ថិភាពជីវសាស្ត្រអូស្ត្រាលី (Australian Biosecurity) ស្ថិតក្រោមក្រសួងកសិកម្ម នេសាទ និងព្រៃឈើ បានចេញសេចក្តីព្រមានយ៉ាងតឹងរ៉ឹងដល់អ្នកដំណើរទាំងអស់ដែលយកថ្នាំហឺតថៃ ម៉ាកសត្វហង្ស ត្រូវជូនដំណឹងសិន មុនចូលប្រទេសអូស្ត្រាលី។ ការព្រមានធ្វើឡើងបន្ទាប់ពីមន្ត្រីនៅអាកាសយានដ្ឋាន Cairns (Cairns Airport) រកឃើញសារធាតុផ្សំខុសប្រក្រតីពីរុក្ខជាតិ ចំនួន ៦ប្រភេទ នៅក្នុងដបថ្នាំហឺតថៃប្រភេទនេះ ដែលស្ថិតក្នុងបញ្ជីតាមដាន និងបង្កហានិភ័យដល់បរិស្ថានអូស្ត្រាលី។

អូស្ត្រាលីបារម្ភថា ថ្នាំហឺតថៃ (Hong Thai) ដែលមានលក្ខណៈពិសេសជាដបពណ៌បៃតង ត្រូវបានផលិតឡើងពីគ្រឿងផ្សំធម្មជាតិ រួមមាន សំបករុក្ខជាតិ ឫសឈើ និងគ្រាប់រុក្ខជាតិស្ងួត គឺគ្រឿងផ្សំទាំងនេះអាចផ្ទុកសត្វល្អិត មេរោគ ឬសារធាតុបង្កគ្រោះថ្នាក់ដល់ប្រព័ន្ធអេកូឡូស៊ី និងផលដំណាំកសិកម្ម។

ហេតុនេះ ដើម្បីចៀសវាងការផាកពិន័យ អូស្ត្រាលីកំណត់ឱ្យអ្នកដំណើរទាំងអស់ត្រូវតែបញ្ជាក់នៅលើកាតចូលប្រទេសថា បានយក «ឱសបុរាណផ្សំពីរុក្ខជាតិ» បន្ទាប់មក មន្ត្រីអូស្ត្រាលីនឹងពិនិត្យមើលដបថ្នាំហឺតនោះជាក់ស្តែង ថាតើមានសុវត្ថិភាពឬក៏អត់ បើរកឃើញគ្រឿងផ្សំខុសច្បាប់ ពួកគេនឹងរឹបអូសយកទៅកំទេចចោល។

ប្រសិនបើអ្នកដំណើរបញ្ជាក់ដោយស្មោះត្រង់ថា បានយកថ្នាំហឺតនេះតាមខ្លួន គឺបើទោះជាត្រូវមន្ត្រីរឹបអូសក៏ដោយ ក៏អ្នកដំណើរមិនរងការផាកពិន័យជាប្រាក់ទេ។ ប៉ុន្តែបើលាក់បាំង ហើយមន្ត្រីស្កែនឃើញ អ្នកដំណើរនឹងរងការផាកពិន័យយ៉ាងធ្ងន់ធ្ងរ ឬឈានដល់ការលុបចោលទិដ្ឋាការ (Visa) ទៀតផង។

សូមបញ្ជាក់ដែរថា កាលពីចុងឆ្នាំ២០២៥ កន្លងទៅ រដ្ឋបាលចំណីអាហារ និងឱសថថៃ (Thai FDA) ក៏ធ្លាប់បានប្រមូលថ្នាំហឺតប្រភេទនេះមកវិញរហូតដល់ជិត ២០ម៉ឺនដប បន្ទាប់ពីរកឃើញការចម្លងមេរោគលើសកម្រិតស្តង់ដារ៕