អាមេរិកគ្រោងបញ្ចប់ការសាងសង់របងព្រំដែនជាប់ម៉ិកស៊ិកនៅត្រឹមចុងឆ្នាំ២០២៧

កាលពីថ្ងៃទី៩ ខែមិថុនា ឆ្នាំ២០២៦ ភ្នាក់ងារគយ និងការពារព្រំដែនសហរដ្ឋអាមេរិក (CBP) លោក Rodney Scott ឱ្យដឹងថា សហរដ្ឋអាមេរិកគ្រោងបញ្ចប់ការសាងសង់របងព្រំដែនជាប់ប្រទេសម៉ិកស៊ិកនៅត្រឹមចុងឆ្នាំ២០២៧ ដែលធ្វើឡើងតាមការសន្យាជាយូរមកហើយរបស់លោកប្រធានាធិបតី Donald Trump។ ការបង្កើនល្បឿនសាងសង់នេះ ដើម្បីទប់ស្កាត់លំហូរជនអន្តោប្រវេសន៍ខុសច្បាប់ និងការរត់ពន្ធគ្រឿងញៀ.នចូលក្នុងទឹកដីសហរដ្ឋអាមេរិក។

ការសាងសង់របងព្រំដែនដែកជួរទី១ នឹងលាតសន្ធឹងពីទីក្រុង San Diego រដ្ឋកាលីហ្វ័រញ៉ា រហូតដល់ឈូងសមុទ្រប្រទេសម៉ិកស៊ិក នឹងរួចរាល់ចាប់ពីចន្លោះខែមិថុនា ដល់ចុងខែធ្នូ ឆ្នាំ២០២៧ បន្ទាប់មក នឹងសាងសង់របងជួរទី២ បន្ថែមទៀត ដែលគ្រោងបញ្ចប់ទាំងស្រុងនាពាក់កណ្តាលឆ្នាំ២០២៨។ អាមេរិកមើលឃើញថា ការសាងសង់របងតែម្យ៉ាងមិនគ្រប់គ្រាន់ទេ សម្រាប់ទប់ស្កាត់បទល្មើសផ្សេងៗនៅតាមបណ្តោយព្រំដែន ទើបត្រូវបំពាក់ប្រព័ន្ធបច្ចេកវិទ្យា ឧបករណ៍អេឡិចត្រូនិក កាមេរ៉ា ដ្រូន និងជីកផ្លូវរូងក្រោមដី ដើម្បីតាមដានការធ្វើសកម្មភាពខុសច្បាប់។

ចំណែកតំបន់ដាច់ស្រយាលមួយចំនួនដែលមានរបាំងធម្មជាតិស្រាប់ ដូចជា តំបន់ច្រាំងថ្មចោទខ្ពស់ៗនៅឧទ្យានជាតិ Big Bend National Park នឹងគ្មានសាងសង់ឡើយ។ ដោយឡែក នៅតាមបណ្តោយទន្លេ Rio Grande ក្នុងរដ្ឋតិចសាស់ (ជាប់ព្រំដែនប្រទេសម៉ិកស៊ិក) ដែលមានប្រវែង១,៩០០គីឡូម៉ែត្រ នឹងត្រូវប្រើប្រាស់របាំងការពារទឹកជំនួសវិញ។

សូមរំឭកដែរថា សហរដ្ឋអាមេរិកបានចាប់ផ្តើមសាងសង់របងព្រំដែនទប់ស្កាត់អន្តោប្រវេសន៍ខុសច្បាប់ និងការជួញដូរគ្រឿងញៀន ក្នុងចន្លោះឆ្នាំ១៩៩៣ និង ១៩៩៤ ហើយការសាងសង់បានវិវត្តន៍ជាច្រើនដំណាក់កាល រហូតមកដល់អាណត្តិរបស់លោកប្រធានាធិបតី Trump ដោយលោកជំរុញឱ្យពង្រីក និងកែលម្អរបងចាស់ទ្រុឌទ្រោមទៅជាជញ្ជាំងដែកខ្ពស់ៗ។

ក្រៅពីសហរដ្ឋអាមេរិក នៅមានប្រទេសជាច្រើនទៀតក៏បានសាងសង់របងព្រំដែនដែរ ក្នុងគោលបំណងគ្រប់គ្រងព្រំដែន ឬការពារសន្តិសុខ ដូចជា ទប់ស្កាត់ការលួចចូលប្រទេសខុសច្បាប់ ការជួញដូរមនុស្ស និងជួញដូរគ្រឿងញៀនលួចលាក់។ ជាក់ស្តែង របងព្រំដែនរវាងចិន-វៀតណាម, ឥណ្ឌា-បង់ក្លាដែស, ឥណ្ឌា-មីយ៉ាន់ម៉ា, ប៉ាគីស្ថាន-អាហ្វហ្គានីស្ថាន, តូមិននីស្ថាន-អ៊ូសបេគីស្ថាន, ចិន-កូរ៉េខាងជើង, អ៊ីរ៉ង់-ប៉ាគីស្ថាន, ម៉ាឡេស៊ី-ថៃ,បូតស្វាណា-ហ្ស៊ីមបាវ៉េ, ម៉ារ៉ុក-អាល់ហ្សេរី និងព្រុយណេ-ម៉ាឡេស៊ី៕