Sky Train ឬ រថភ្លើងលើអាកាស នឹងលេចរូបរាងឆាប់ៗនៅរាជធានីភ្នំពេញ

ដំណឹងល្អសម្រាប់ពលរដ្ឋក្រុងភ្នំពេញ! ប្រព័ន្ធដឹកជញ្ជូនរថភ្លើងលើអាកាស (Sky Train) ត្រៀមលេចរូបរាងឡើងហើយ ក្រោយក្រុមហ៊ុនយក្សចិនបានស្នើសុំសិក្សាលទ្ធភាពផ្លូវការ ដើម្បីដោះស្រាយវិបត្តិគ្រោះកកស្ទះចរាចរណ៍ក្នុងរាជធានី។ គម្រោងនេះ នឹងផ្តល់ផលប្រយោជន៍មហាសាលដល់កម្ពុជា តាមរយៈការកាត់បន្ថយការកកស្ទះចរាចរណ៍ និងសន្សំសំចៃពេលវេលាធ្វើដំណើររបស់ប្រជាពលរដ្ឋក្នុងរាជធានីភ្នំពេញយ៉ាងមានប្រសិទ្ធភាព។

យោងតាមរបាយការណ៍បច្ចុប្បន្នភាពពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ ជំនួបសម្ដែងការគួរសម និងពិភាក្សាការងារជាមួយលោក វ៉ាង ហៃឈិន (WANG HAI CHEN) ទីប្រឹក្សាជាន់ខ្ពស់ និងជាតំណាងក្រុមហ៊ុន Beijing Urban Construction Group (BUCG) ត្រូវបានធ្វើឡើងយ៉ាងជោគជ័យ កាលពីព្រឹកថ្ងៃទី០៦ ខែមិថុនា ឆ្នាំ២០២៦ នៅសាលារាជធានីភ្នំពេញ។ នៅក្នុងជំនួបនោះ លោកអភិបាលក្រុងបានប្រកាសបើកភ្លើងខៀវ និងគាំទ្រយ៉ាងពេញទំហឹងឱ្យក្រុមហ៊ុនចិនចាប់ផ្តើមការសិក្សាភ្លាមៗ ព្រោះកំណើនប្រជាពលរដ្ឋ និងសេដ្ឋកិច្ចបានធ្វើឱ្យតម្រូវការផ្លាស់ប្តូរមកប្រើប្រាស់ប្រព័ន្ធធ្វើដំណើរទំនើប ក្លាយជាបញ្ហាចាំបាច់បំផុត។

នៅក្នុងជំនួបកំពូលផ្នែកហេដ្ឋារចនាសម្ព័ន្ធនេះ លោក ឃួង ស្រេង បានប្រកាសស្វាគមន៍ និងគាំទ្រយ៉ាងពេញទំហឹងចំពោះបំណងវិនិយោគរបស់ក្រុមហ៊ុនចិន។ លោកអភិបាលរាជធានីភ្នំពេញ បានគូសបញ្ជាក់ថា កំណើនសេដ្ឋកិច្ច និងលំហូរប្រជាពលរដ្ឋចូលមកមករស់នៅ និងបម្រើការងារក្នុងក្រុងកាន់តែច្រើន បានធ្វើឱ្យតម្រូវការប្រព័ន្ធដឹកជញ្ជូនសាធារណៈទំនើប ក្លាយជាបញ្ហាចាំបាច់បំផុត។ គម្រោងរថភ្លើងលើអាកាស (Sky Train) នេះ នឹងដើរតួជាសរសៃឈាមសេដ្ឋកិច្ចថ្មីមួយ ក្នុងការបំពេញបន្ថែមលើសេវាដឹកជញ្ជូនរថយន្តក្រុងសាធារណៈបច្ចុប្បន្ន ធ្វើយ៉ាងណាសម្រួលដល់ការធ្វើដំណើររបស់ប្រជាពលរដ្ឋឱ្យបានលឿន រហ័ស និងមានសុវត្ថិភាពខ្ពស់។

ជាការឆ្លើយតប តំណាងក្រុមហ៊ុន BUCG បានបង្ហាញពីការប្ដេជ្ញាចិត្តខ្ពស់ និងបានជម្រាបជូនរដ្ឋបាលរាជធានីភ្នំពេញថា ក្រុមហ៊ុននឹងប្រើប្រាស់បទពិសោធន៍ ព្រមទាំងបច្ចេកវិទ្យាចុងក្រោយបង្អស់របស់ប្រទេសចិន ដើម្បីធ្វើការសិក្សាស្រាវជ្រាវស្វែងរកគំរូ និងខ្សែផ្លូវរថភ្លើងអាកាសណាដែលមានប្រសិទ្ធភាពបំផុតសម្រាប់រាជធានីភ្នំពេញ។

គួរបញ្ជាក់ផងដែរថា គម្រោងថ្មីនេះ នឹងមកជួយពង្រឹងដល់ផែនការមេដឹកជញ្ជូនមហាជន ដែលកម្ពុជាកំពុងដំណើរការសាងសង់ ដូចជាគម្រោងរថភ្លើងក្រោមដី និងលើអាកាស (Phnom Penh Rail Transit) និងប្រព័ន្ធរថភ្លើងល្បឿនលឿនតភ្ជាប់ទៅកាន់អាកាសយានដ្ឋានអន្តរជាតិតេជោនាពេលខាងមុខផងដែរ។ លើសពីនេះ វានឹងជួយកាត់បន្ថយការចំណាយលើឥន្ធនៈ និងកម្រិតការភាយបំភាយឧស្ម័នពុលទៅក្នុងបរិយាកាស ព្រមទាំងចូលរួមលើកកម្ពស់សោភ័ណភាព និងទំនើបកម្មទីក្រុងឱ្យទៅជាទីក្រុងវៃឆ្លាត (Smart City) ដែលជាកត្តាគន្លឹះក្នុងការទាក់ទាញលំហូរវិនិយោគទុនបរទេស និងជម្រុញកំណើនសេដ្ឋកិច្ចជាតិប្រកបដោយចីរភាព៕