វិបត្តិកំណើតធ្លាក់ចុះខ្លាំង! ប៊ូតានប្រកាសផ្តល់ប្រាក់ឧបត្ថម្ភប្រចាំខែដល់ពលរដ្ឋដែលមានកូនបន្ថែម

ថាប់ភីមភូ៖ រដ្ឋាភិបាលនៃប្រទេសប៊ូតាន (ស្ថិតនៅទ្វីបអាស៊ីខាងត្បូង) បានប្រកាសអនុវត្តគោលនយោបាយផ្តល់ប្រាក់ឧបត្ថម្ភប្រចាំខែ ដើម្បីលើកទឹកចិត្តឱ្យពលរដ្ឋមានកូនបន្ថែមទៀត បន្ទាប់ពីអត្រាកំណើតនៅក្នុងប្រទេសបានដាំក្បាលចុះយ៉ាងខ្លាំង។ គោលនយោបាយថ្មីនេះ តម្រូវឱ្យផ្តល់ប្រាក់ឧបត្ថម្ភប្រមាណ ១០៥ ដុល្លារក្នុងមួយខែ រហូតដល់កូននោះមានអាយុគ្រប់ ៣ ឆ្នាំ ចំពោះគ្រប់គ្រួសារណាដែលមានកូនទី៣ ឬកូនទី៤ ចាប់កំណើតចាប់ពីថ្ងៃទី៤ ខែមិថុនា ឆ្នាំ២០២៦ នេះតទៅ។

មូលហេតុចម្បងដែលនាំឱ្យរដ្ឋាភិបាលប៊ូតានដាច់ចិត្តដាក់ចេញគោលនយោបាយនេះ គឺដោយសារតែអត្រាកំណើតបានធ្លាក់ចុះយ៉ាងគំហុកក្នុងរយៈពេល ១ ទសវត្សរ៍ចុងក្រោយ។ កត្តានេះបណ្តាលមកពីពលរដ្ឋវ័យក្មេងបានសម្រេចចិត្តចាកចេញទៅរស់នៅ និងធ្វើការនៅបរទេសកាន់តែច្រើន ជាពិសេស គឺប្រទេសអូស្ត្រាលី រួមផ្សំនឹងកំណើននៃចំនួនមនុស្សចាស់ ដែលធ្វើឱ្យប្រទេសនេះប្រឈមនឹងការខ្វះខាតកម្លាំងពលកម្ម និងប៉ះពាល់ដល់ការអភិវឌ្ឍសេដ្ឋកិច្ចរយៈពេលវែង។

យោងតាមទិន្នន័យ ចំនួនទារកកើតថ្មីនៅទូទាំងប្រទេសប៊ូតាន បានធ្លាក់ចុះពី ១១,០០១ នាក់ កាលពីឆ្នាំ២០១៥ មកនៅត្រឹមតែ ៨,១៥៣ នាក់ប៉ុណ្ណោះនៅក្នុងឆ្នាំ២០២៤ ពោលគឺធ្លាក់ចុះរហូតដល់ទៅ ២៦%។ ការអនុវត្តគោលនយោបាយថ្មីនេះ បានឆ្លុះបញ្ចាំងពីការប្តេជ្ញាចិត្តខ្ពស់របស់រដ្ឋាភិបាលក្នុងការថែទាំសុខភាពមាតា កុមារ និងក្រុមគ្រួសារ ក៏ដូចជាធានាឱ្យបាននូវកំណើនប្រជាសាស្ត្រប្រកបដោយនិរន្តរភាព។

បច្ចុប្បន្ន ធនធានមនុស្សដែលមានជំនាញ និងយុវជនជំនាន់ក្រោយរបស់ប៊ូតាន បានហូរចេញទៅក្រៅប្រទេសជាបន្តបន្ទាប់ ដោយសារតែបញ្ហាប្រឈមផ្នែកសេដ្ឋកិច្ច និងការខ្វះខាតឱកាសការងារក្នុងស្រុក បើទោះបីជាពួកគេមានចំណេះដឹងខ្ពង់ខ្ពស់ផ្នែកបច្ចេកវិទ្យា និងជំនាញភាសាអង់គ្លេសក៏ដោយ។ ផ្អែកតាមរបាយការណ៍របស់ធនាគារពិភពលោក (World Bank) ពលរដ្ឋប៊ូតានភាគច្រើន រួមទាំងមន្ត្រីរាជការ គ្រូបង្រៀន និងគ្រូពេទ្យ ទទួលបានប្រាក់ខែជាមធ្យមត្រឹមតែ ៤២០ ដុល្លារប៉ុណ្ណោះក្នុងមួយខែ ដែលកម្រិតនេះមិនអាចឱ្យពួកគេសន្សំប្រាក់ទិញផ្ទះ ឬកសាងអនាគតបានឡើយ ខុសពីការងារនៅបរទេសដែលអាចរកចំណូលបានរហូតដល់ខ្ទង់ពាន់ដុល្លារ។

គួររំឭកផងដែរថា ប៊ូតាន គឺជាប្រទេសដែនដីគោកដែលមានព្រំប្រទល់ជាប់ប្រទេសចិន និងឥណ្ឌា ដោយមានប្រជាជនសរុបមិនដល់ ៨០០,០០០ នាក់ឡើយ គិតត្រឹមឆ្នាំ២០២៦។ ប្រទេសនេះល្បីល្បាញខ្លាំងលើឆាកអន្តរជាតិ តាមរយៈការវាស់វែងការអភិវឌ្ឍជាតិដោយប្រើប្រាស់សន្ទស្សន៍ «សុភមង្គលជាតិសរុប» (Gross National Happiness – GNH) ជំនួសឱ្យការផ្ដោតលើតែផលិតផលក្នុងស្រុកសរុប (GDP)។

ក្រៅពីប្រទេសប៊ូតាន បច្ចុប្បន្នមានប្រទេសជាច្រើនទៀតនៅលើពិភពលោក ក៏កំពុងប្រឈមមុខនឹងវិបត្តិអត្រាកំណើតធ្លាក់ចុះ និងសង្គមមនុស្សចាស់​ដែរ។ ដើម្បីដោះស្រាយបញ្ហានេះ រដ្ឋាភិបាលនៃប្រទេសទាំងនោះបានដាក់ចេញនូវគោលនយោបាយលើកទឹកចិត្តផ្សេងៗ ដូចជា ការផ្តល់ប្រាក់ឧបត្ថម្ភប្រចាំខែ ឬប្រាក់រង្វាន់ភ្លាមៗពេលសម្រាលកូនរួចជាដើម ដែលមានដូចជា ប្រទេសកូរ៉េខាងត្បូង សិង្ហបុរី ជប៉ុន ចិន និងវៀតណាម ។ល៕