ថ្មីៗនេះពេជ្រ វត្តីសារ៉ាវឌ្ឍី ប៊ី សុធារី បវរកញ្ញានិងសិល្បករ សិល្បការិនី ផ្សេងទៀតបានរួមរួមគ្នាស្លៀកពាក់បែបប្រពៃណីខ្មែរយ៉ាងស្រស់ស្អាតនិងបានបង្ហាញសកម្មភាពបំផុសគំនិតលេងល្បែងប្រជាប្រិយខ្មែរ។ អ្វីដែលកាន់តែពិសេសសកម្មភាពនេះអាចកើតឡើងបាន ពេជ្រ វត្តីសារ៉ាវឌ្ឍី បានចំណាយថវិកាខ្ទង់ពាន់ដុល្លារដើម្បីលើកស្ទួយអ្វីដែលខ្មែរពុំគួរបំភ្លេចចោល។
នៅថ្ងៃទី២៣ ខែមីនា ពេជ្រ វត្តីសារ៉ាវឌ្ឍី បានបង្ហោះវីដេអូមួយនៅលើបណ្តាញសង្គមដោយទម្លាយប្រាប់មហាជនថានាងបានចំណាយថវិកាជិត២ពាន់ដុល្លារ។ សម្រាប់សិល្បករ សិល្បការិនីផ្សេងៗទៀតដែលចូលរួមគម្រោងរបស់នាង ពេជ្រ វត្តីសារ៉ាវឌ្ឍី បានបញ្ជាក់ថាគឺគាត់មិនគិតកម្រៃនោះទេ និងមានការចូលរួមឧបត្ថម្ភផ្សេងៗទៀតដល់គម្រោងនេះ ប៉ុន្តែទោះជាយ៉ាងណា ការថតនេះនាងនៅតែចំណាយទឹកប្រាក់ខ្ទង់ពាន់ដុល្លារ។
នៅក្នុងវីដេអូនេះដែរ អ្នកសិល្បៈដែលចូលរួម មានម្ខាងស្រី និងម្ខាងទៀតជាប្រុស បានចូលរួមលេងល្បែងប្រជាប្រិយខ្មែរដែលមានដូចជា បោះអង្គញ់ ទាញព្រ័ត្រ លោតអន្ទាក់ ចោលឈូង លាក់កន្សែង ពង្រត់កូនក្រមុំ វាយក្អម ស្វាដណ្តើមស្លឹកឈើ។ ជាមួយគ្នានេះ ពេជ្រ វត្តីសារ៉ាវឌ្ឍី បានអំពាវនាវឱ្យប្រជាពលរដ្ឋខ្មែរចូលរួមលេងប្រជាប្រិយខ្មែរឱ្យបានច្រើនកុះករ។
ទឹកចិត្តមួយនេះបានធ្វើឱ្យអ្នកគាំទ្រជាច្រើនកោតសរសើរចំពោះ ពេជ្រ វត្តីសារ៉ាវឌ្ឍី ដែលខិតខំជួយផ្សព្វផ្សាយលើកតម្កើនថែរក្សាវប្បធម៌ប្រពៃណីទំនៀមទម្លាប់ខ្មែរ។
មិនត្រឹមតែសកម្មភាពនេះប៉ុណ្ណោះទេប៉ុន្តែបវរកញ្ញាល្បីឈ្មោះរូបនេះក៏បានបង្កើតគម្រោងផ្សព្វផ្សាយតំបន់ទេសចរណ៍ជុំវិញប្រទេសកម្ពុជាផងដែរ៕
