ទាហានម្នាក់លាតត្រដាងចរិតពិតរបស់ Jungkook ក្រោយពីមានមតិរិះគ.ន់លើអាកប្បកិរិយា

Jungkook សមាជិក BTS ត្រូវរងនូវមតិរិះគន់ពីសាធារណជនបន្ទាប់ពីតារាចម្រៀងរូបនេះបាន Live ទាំងស្រវឹងកាលពីកន្លងមកនេះ។ ជុំវិញភាពចម្រូងចម្រាសទាក់ទងនឹងអាកប្បកិរិយា ការបង្ហោះមួយបានធ្វើឱ្យមានការចាប់អារម្មណ៍យ៉ាងខ្លាំងដោយសារតែបានលាតត្រដាងពីអត្តចរិតរបស់តារាចម្រៀងល្បីឈ្មោះរូបនេះ។

យោងតាមការបង្ហោះនោះអ្នកបង្ហោះរូបនេះអះអាងថាជាទាហានម្នាក់ទៀតរបស់ Jungkook ក្នុងអំឡុងពេលបម្រើកងទ័ពរបស់ខ្លួន។ ការបង្ហោះនេះបានលេចចេញជាសាធារណៈក្នុងចំណោម រលកនៃការរិះគន់ជុំវិញអាកប្បកិរិយារបស់ Jungkook អំឡុងពេលផ្សាយផ្ទាល់ ដែលជំរុញឱ្យមានការចាប់អារម្មណ៍កាន់តែខ្លាំងឡើងចំពោះរឿងរ៉ាវនៃចរិតពិតរបស់សមាជិក BTS។

នៅក្នុងការបង្ហោះនោះបានពិពណ៌នាអំពី Jungkook ថាជាមនុស្សម្នាក់ដែលឱ្យតម្លៃសូម្បីតែទំនាក់ទំនងតូចតាចបំផុត។ បន្ទាប់ពីលោកត្រូវបានរំសាយចេញពីជួរកងទ័ព Jungkook នៅតែជួបជាមួយអតីតសមមិត្តរបស់លោកម្តងម្កាល អញ្ជើញពួកគេទៅញ៉ាំអាហារ និងរក្សាទំនាក់ទំនង។ ជាពិសេស ការបង្ហោះនោះក៏បានបញ្ជាក់ថា Jungkook ធ្លាប់បានប្រើថវិកាផ្ទាល់ខ្លួនរបស់លោកដើម្បីជំនួសឧបករណ៍ចម្អិនអាហារនៅក្នុងអង្គភាពដោយសង្ឃឹមថាទាហានអាចទទួលទានអាហារក្តៅៗ និងមានជីវជាតិ។

អ្នកបង្ហោះរូបនេះក៏បានជំរុញឱ្យអ្នកនិយមលេងអ៊ីនធឺណិតបញ្ឈប់ការរិះគន់ដែល «មិនចាំបាច់» ដោយអះអាងថា សមាជិក BTS រូបនេះមិនសមនឹងទទួលបានការវិនិច្ឆ័យតែសំបកក្រៅ ឬក្លាយជាគោលដៅនៃពាក្យសម្ដីអាក្រក់នោះទេ។ ការបង្ហោះនោះបានសង្កត់ធ្ងន់ថា «គាត់ពិតជាមនុស្សស្មោះត្រង់ និងសប្បុរសម្នាក់»។

រឿងនេះបានរីករាលដាលយ៉ាងឆាប់រហ័សក្នុងចំណោមអ្នកគាំទ្រ ដោយមនុស្សជាច្រើនបានសម្តែងការកោតសរសើរចំពោះចិត្តសប្បុរស និងភាពរាបសាររបស់តារារូបនេះ។ ទោះជាយ៉ាងណាក៏ដោយ អ្នកខ្លះក៏បានកត់សម្គាល់ផងដែរថា អត្តសញ្ញាណរបស់អ្នកបង្ហោះនេះមិនទាន់ត្រូវបានផ្ទៀងផ្ទាត់នៅឡើយទេ។

ពីមុន Jungkook សមាជិកក្រុម BTS បានទាក់ទាញចំណាប់អារម្មណ៍អំឡុងពេលផ្សាយផ្ទាល់មួយកាលពីចុងខែកុម្ភៈ។ តារារូបនេះបានសារភាពដោយត្រង់ៗថាបានផឹកស្រា និងជក់បារីច្រើនណាស់។ លោកក៏បានបង្ហាញពីបំណងប្រាថ្នាចង់បង្ហាញភាពស្មោះត្រង់ជាមួយអ្នកគាំទ្ររបស់ខ្លួនផងដែរ៕