បទចម្រៀង «ពូកែគ្រលាស់» របស់តារាចម្រៀង រ៉ាប៊ី ដែលរងការវែកញែកកាលពីកន្លងមកនេះ ពេលនេះកំពុងតែល្បីល្បាញយ៉ាងខ្លាំងនៅឯប្រទេសថៃដោយមានតារាថៃ បវរកញ្ញា និងអ្នកនិយមលេងទិកតុកបានលេងបទចម្រៀងនេះ។ 
តារាសម្តែង Euro yotsawat ដែលចំណាំសម្តែងឱ្យស្ថានីយទូរទស្សន៍ថៃប៉ុស្តិ៍លេខ៧ បានលេងបទចម្រៀង «ពូកែគ្រលាស់» របស់ រ៉ាប៊ី បង្ហោះនៅលើបណ្តាញសង្គមទិកតុកផ្ទាល់ខ្លួនរបស់លោកស្របពេលជាមួយគ្នានេះតារាសម្តែងល្បីឈ្មោះ Mile phakphum ដែលធ្លាប់មកប្រទេសកម្ពុជាកន្លងមកក៏បានចូលក្នុងវីដេអូនេះផងដែរ។
លើសពីនេះទៅទៀតគេក៏បានឃើញបេក្ខភាពបវរកញ្ញាថៃ ប្រកួតក្នុងកម្មវិធី Miss Grand Thailand 2026 ក៏បានរាំលេងយ៉ាងសប្បាយរីករាយ ខណៈអ្នកលេងបណ្តាញសង្គមថៃជាច្រើនរូបនេះកំពុងតែឈ្លក់វង្វេងលេងបទចម្រៀងនេះយ៉ាងខ្លាំង។ 
បន្ទាប់ពីឃើញតារាសម្តែង Euro yotsawat លេងបទចម្រៀងរបស់ រ៉ាប៊ី នេះដែរអ្នកលេងបណ្តាញសង្គមបានចូលទៅបញ្ចេញមតិគួរឱ្យកត់សម្គាល់អ្នកខ្លះក៏ឱ្យធ្វើខ្លួនធម្មតាទោះបីជាផ្ទះលេខ២លេងបទចម្រៀងខ្មែរ ចំណែកអ្នកខ្លះទៀតឌឺដងវិញថា «លេងបានតែហាមលួច»។ មិនត្រឹមតែបទ «ពូកែគ្រលាស់» កំពុងតែមានភាពល្បីល្បាញនៅស្រុកថៃប៉ុណ្ណោះទេប៉ុន្តែបទ តម្រង់ជួរ របស់ រ៉ាប៊ី ដែលត្រៀមវាយលុកទីផ្សារពេលចូលឆ្នាំខ្មែរនេះក៏កំពុងទទួលបានការចាប់អារម្មណ៍ពីអ្នកគាំទ្រក្រៅស្រុកផងដែរ។
គួរបញ្ជាក់ផងដែរថា ដ្បិតតែ «ពូកែគ្រលាស់» រងនូវមតិវែកញែកកាលពីកន្លងមកនេះក្តី ប៉ុន្តែទស្សនិកជនមិនអាចបដិសេធបានទេថាបទនេះគឺកំពុងពេញនិយមសម្រាប់រាំលេងកម្សាន្ត ខណៈបទមួយៗរបស់ រ៉ាប៊ី សុទ្ធសឹងទទួលបានការគាំទ្រច្រើន៕
