តារាកំប្លែង ពាក់មី ឱ្យ នាយតឿ រកអ្វីដែលថ្លៃថ្នូរជាងនេះក្រោយយកសត្វសុនកបន្លំថាសត្វពពែ

ទោះបីជាមហាជនរិះគន់ដូចទឹកបាក់ទំនប់ ធ្លាប់វាស់កម្ពស់យ៉ាងណាក្តីប៉ុន្តែបុគ្គលម្នាក់ដែលគេនិយមហៅថា គ្រូតឿ នៅតែបំពានបន្តផលិតវីដេអូដែលធ្វើឱ្យប៉ះពាល់អារម្មណ៍មនុស្សជាច្រើន។ ជាពិសេសថ្មីៗនេះ នាយតឿ បានបង្ហោះវីដេអូមួយដោយមនុស្សជាច្រើនជឿថាក្រុមផលិតវីដេអូយកសត្វសុនកបានបន្លំថាជាសត្វពពែ។ មិនបង្អង់យូរ កំប្លែងពាក់មី ក៏បញ្ចេញប្រតិកម្មឡើងមក។

នៅលើបណ្តាញសង្គមហ្វេកប៊ុករបស់លោក ចែម ចាន់រ៉ា ហៅ នាយពាក់មី បានបង្ហោះរូបភាព Screenshot ពីវីដេអូរបស់ នាយតឿ ដោយភ្ជាប់មកជាមួយនឹងពាក្យពេចន៍ថា « គ្រូតឿ ! ! គួរកគំនិតធ្វើវីដេអូអីដែលថ្លៃថ្នូរជាងនេះតិចទៅ។ វីដេអូ ស្ងោឆ្កែ ហើយធ្វើចាប់ពពែ អ្នកមើលមិនល្ងង់ទេ ពពែឬឆ្កែនោះ »។ ការបង្ហោះនេះបានធ្វើឱ្យមានការចាប់អារម្មណ៍ភ្លាមៗនិងមានមតិរិះគន់យ៉ាងច្រើនមកកាន់ក្រុមផលិតនិង នាយតឿ។

អ្នកលេងបណ្តាញសង្គមបានបញ្ចេញមតិថា «ដើម្បីលុយ រឿងអីក៏ធ្វើទៅបានបាត់បង់មនសិការជាមនុស្ស, យើងកាន់តែជេវាវាកាន់តែល្បីទោះដឹងថាវាយកឆ្កែមកធ្វើជាម្ហូបច្រើនលើកច្រើនដងហើយនៅតែគេហៅវាទៅថតរឿង ថតវីដេអូកាន់តែច្រើនឡើងដដែល, អត់ពិបាកទេរឿងវាថត ឈប់មើលទៅ វាឈប់យកឆ្កែថតរកលុយហើយ»។ អ្នកផ្សេងទៀតបានបញ្ចេញមតិថា «ជាតិក្រោយតឿទៀត, កំហុសមកពីការគាំទ្រពេកធ្វើឱ្យក្រុមនេះឆ្កួត, បុគ្គលខ្លះល្បីដោយសារទង្វើថោកទាបចឹង , ធ្វើអ្វីមិនចេះគិតអត់ខួរ ឆ្ងល់អ្នកគាំទ្រនឹងចេះតែគាំទ្រទៀតបើដឹងថាក្រុមនឹងវាឆ្កួតហើយ»។

គួរបញ្ជាក់ផងដែរថា កាលពីឆ្នាំ២០២២ នាយតឿ ត្រូវបានសមត្ថកិច្ចធ្លាប់ហៅវាស់កម្ពស់ម្តងក្រោយពីផលិតវីដេអូបរិភោគលាមកគោ៕