លីម តិចម៉េង រងការរិះគ.ន់ពីអ្នកគាំទ្រ BTS

ធ្លាប់រងភាពចម្រូងចម្រាសកាលពីអតីតកាលនិងសកម្មភាពចែករំលែកវីដេអូចម្រៀងមួយ តារាចម្រៀង លីម តិចម៉េង ត្រូវរងការរិះគន់យ៉ាងខ្លាំងម្តងទៀតពីសហគមន៍អ្នកគាំទ្រ BTS ។ បន្ទាប់ពីរងការវែកញែកយ៉ាងច្រើន លីម តិចម៉េង សម្រេចចិត្តលុបការចែករំលែករបស់ខ្លួនហើយ។

កាលពីថ្ងៃទី៧ ខែមីនា លីម តិចម៉េង បានចែករំលែកការបង្ហោះមួយទាក់ទងនឹងបទចម្រៀងមានចំណងជើងថា «ស្រលាញ់ BTS ពេញបេះដូង» ច្រៀងដោយ ម៉ានីតា និពន្ធដោយលោក ហ៊ាង ម៉េងហួរ។ ម្ចាស់ពានរូបនេះ បានចែករំលែកដោយភ្ជាប់មកជាមួយនឹងពាក្យថា «ប៊ូដាហេសស»។

សកម្មភាពរបស់ លីម តិចម៉េង បានធ្វើឱ្យអ្នកគាំទ្រក្រុមចម្រៀង BTS ប្រតិកម្មភ្លាមៗជាមួយនឹងពាក្យសម្តីរិះគន់ជាច្រើនដូចជាថាឱ្យតារាចម្រៀងរូបនេះមិនកែទម្លាប់ចរិតអន់របស់ខ្លួន។ អ្នកគាំទ្រ BTS ខ្លះថែមទាំងចោទប្រកាន់ តិចម៉េង ទៀតថាការធ្វើដូចនេះដោយសារតែលែងល្បីដូចមុន ទើបចង់ឱ្យគេចាប់អារម្មណ៍។ អ្នកគាំទ្រខ្លះទៀតថែមទាំងជីកកកាយពាក្យសម្តីរបស់ តិចម៉េង ធ្លាប់បានបង្ហោះដាក់ក្រុម BTS កាលពីឆ្នាំ២០២០ ទៀតផង។

គួរបញ្ជាក់ផងដែរ អំឡុងពេលប្រកួតកម្មវិធី Cambodian Idol រដូវកាលទី៤ កាលពីឆ្នាំ២០២២ លីម តិចម៉េង បានចេញសារសូមទោសជាសាធារណៈជាពិសេសចំពោះអ្នកគាំទ្រ BTS ដែលបានខឹងសម្បារនិងមិនពេញចិត្តកាលពីលោកបង្ហោះទាក់ទងនឹងក្រុម BTS អំឡុងឆ្នាំ២០២០។ លីម តិចម៉េង បានសរសេរថា «លើសហើយអាថ្មិលអត់សាសនាអើយ ដូនតាហែងជាប់សាច់ញាតិBTSហែងមិនឆាប់រើបង្វិចចេញពី ទឹកដីអញទៅ..»។

បន្ទាប់ពីរងការរិះគន់ម្តងទៀតពីសហគមន៍អ្នកគាំទ្រ BTS តារាចម្រៀង លីម តិចម៉េង បានសម្រេចចិត្តលុបការចែករំលែករបស់ខ្លួនផងដែរ៕