ខ្សែភាពយន្តខ្លី Liu Xiaoxu មានអ្នកចូលមើលរហូតដល់៤៤ពាន់លានដង

Liu Xiaoxu ត្រូវបានគេចាត់ទុកថាជាតារាសម្តែងដ៏ពេញនិយមបំផុតម្នាក់នៅក្នុងឧស្សាហកម្មភាពយន្តខ្លីរបស់ប្រទេសចិននាពេលបច្ចុប្បន្ន។ ទោះបីជាកើតនៅឆ្នាំ១៩៩៨ ក៏ដោយតារាប្រុសរូបនេះមានរូបរាងចាស់ទុំ រូបរាងដូចជា CEO ហើយជារឿយៗត្រូវបានគេហៅលេងសើចថា «ពូ»។

ចាប់ផ្តើមអាជីពនៅឆ្នាំ ២០២៣ Liu Xiaoxu បានបង្កើតស្នាដៃរបស់ខ្លួនតាមរយៈតួនាទីជាច្រើន។ ទោះជាយ៉ាងណាក៏ដោយរហូតដល់ឆ្នាំ ២០២៥ ខ្សែភាពយន្តពេញនិយមដូចជា «Love Lost and Found» និង «Summer Rose» ជាដើមឈ្មោះរបស់ Liu Xiaoxu បានកើនឡើងយ៉ាងខ្លាំង។ ក្នុងចំណោមរឿងជាច្រើនក្នុងនោះ «Summer Rose» បានបង្កើតកំណត់ត្រាដោយឈានដល់ចំនួនអ្នកចូលមើល ១០ពាន់លានដងបន្ទាប់ពីចាក់ផ្សាយបានត្រឹមតែ ៤ ថ្ងៃប៉ុណ្ណោះ។ រហូតមកដល់បច្ចុប្បន្ន ខ្សែភាពយន្តនេះទទួលបានចំនួនអ្នកចូលមើលជាង ៤៤ ពាន់លានដង ដែលក្លាយជាខ្សែភាពយន្តខ្លីដែលមានចំនួនអ្នកចូលមើលសរុបខ្ពស់បំផុតនៅឆ្នាំ ២០២៥ នេះបើយោងតាមស្ថិតិពីវេទិកា Hongguo។

តួនាទីនៅក្នុងរឿង «Summer Rose» ក៏បានជួយ Liu Xiaoxu ឈ្នះពានរង្វាន់ តារាសម្តែងភាពយន្តខ្លីល្អបំផុតប្រចាំឆ្នាំ និង តារាសម្តែងឆ្នើម នៅក្នុងកម្មវិធីប្រគល់ពានរង្វាន់ Hongguo Awards ឆ្នាំ ២០២៥ ផងដែរ។ ក្រុមហ៊ុន Sina Entertainment រួមជាមួយប្រព័ន្ធផ្សព្វផ្សាយវប្បធម៌ និងកម្សាន្តផ្សេងទៀត ព្រមទាំងអ្នកជំនាញក្នុងឧស្សាហកម្ម បានតែងតាំង Liu Xiaoxu ជាមុខមាត់គួរឱ្យភ្ញាក់ផ្អើលប្រចាំឆ្នាំ ២០២៥។

Liu Xiaoxu កើតនៅឆ្នាំ១៩៩៨ នៅខេត្តសានតុង ប្រទេសចិន។ លោកបានបញ្ចប់ការសិក្សាពីនាយកដ្ឋានសិល្បៈសំដែងនៃសាកលវិទ្យាល័យទំនាក់ទំនងស៊ីឈួន។ យោងតាម Sina តាំងពីក្មេងមក Xiaoxu មើលទៅមានភាពចាស់ទុំជាងមិត្តភក្ដិរបស់ខ្លួន។ ដូច្នេះហើយ នៅពេលដែលលោកទៅរៀននៅសាកលវិទ្យាល័យ គេតែងតែយល់ច្រឡំថាលោកជាសាស្ត្រាចារ្យ ឬអ្នកគ្រប់គ្រងនិស្សិត។ លោកបានចូលប្រឡូកក្នុងទីផ្សារភាពយន្តខ្លីនៅឆ្នាំ ២០២៣ ដោយភាគច្រើនដើរតួជានាយកប្រតិបត្តិដែលមានភាពចាស់ទុំ។

ថ្លែងទៅកាន់ប្រព័ន្ធផ្សព្វផ្សាយ Liu Xiaoxu បានបញ្ជាក់ថា «ខ្ញុំមិនមានអារម្មណ៍ខ្មាស់អៀនក្នុងការធ្វើជាតារាសម្តែងក្នុងខ្សែភាពយន្តខ្លីៗទេ។ វាជាការងាររបស់ខ្ញុំ។ ខ្ញុំគ្រាន់តែជាតារាសម្តែងវ័យក្មេងម្នាក់។ មិនថាវាជាខ្សែភាពយន្តធំ ឬខ្សែភាពយន្តខ្លី មិនថាវាត្រូវបានថតបញ្ឈរ ឬផ្ដេកទេ វាមិនមានបញ្ហាអ្វីទេ។ អ្វីដែលសំខាន់គឺការគោរពចំពោះវិជ្ជាជីវៈ ចំពោះតួអង្គ ចំពោះសេចក្តីប្រាថ្នាដំបូងរបស់ខ្ញុំ និងចំពោះខ្លួនខ្ញុំផ្ទាល់»៕