អ្នកចម្រៀងរ៉េបស្រីចំណូលថ្មី Cherri កំពុងទទួលបានការចាប់អារម្មណ៍ពីសាធារណជនជាពិសេសបន្ទាប់ពីចេញបទចម្រៀងជាមួយនឹងតារាចម្រៀង SK ក្នុងផលិតកម្ម GenMusix ។ មែនទែនទៅអ្នកចម្រៀងរ៉េបស្រីថ្មីរូបនេះគឺធ្លាប់បានចូលប្រកួតកម្មវិធីមួយតាំងពីអាយុ៦ឆ្នាំ។
កាលពីពេលថ្មីៗនេះ SK បានចេញបទថ្មីមានចំណងជើងថា «អផ្សុក» ហើយត្រូវបានអ្នកគាំទ្រមួយចំនួនសរសើរថាសំឡេងរបស់នាងហាក់ដូចជាតារាចម្រៀង Jisoo។ បទថ្មីនេះគេក៏បានឃើញ SK ដឹកដៃអ្នកចម្រៀងថ្មីពូកែរ៉េបម្នាក់ខណៈផ្នែកដែល Cherri រ៉េបគឺជាភាសាអង់គ្លេសសុទ្ធតែម្តង។ ការរ៉េបរបស់ Cherri ទទួលបានលទ្ធផលជាវិជ្ជមានដោយមានមតិសរសើរគួរឱ្យកត់សម្គាល់ ខណៈអ្នកខ្លះក៏ពុំសូវស្គាល់ពី Cherri ប៉ុន្មាននោះទេដោយសារតែនាងទើបតែប្រឡូកចូលវិស័យចម្រៀងនេះថ្មីថ្មោងនិងបានចូលច្រៀងនៅក្នុងផលិតកម្មតែម្តង។
ការរ៉េបរបស់ Cherri ទទួលបានមតិសរសើរពីទស្សនិកជនថា នាងរ៉េបឡូយណាស់ចំណែកឯ MV វិញមើលដំបូងស្មានតែ Kpop ខណៈអ្នកដែលធ្លាប់ស្គាល់ Cherri កាលពីមុនក៏សរសើរថានាងធំលឿន។ មែនទែនទៅ Cherri ត្រូវបានអ្នកមួយចំនួនកត់សម្គាល់ថានាងបានចូលរួមប្រកួតក្នុងកម្មវិធី «តូច ខ្លឹម ខ្លាំង» តាំងពីអាយុ៦ឆ្នាំ។ 
Cherri មានទេពកោសល្យខាងផ្នែកសិល្បៈតាំងពីតូចមកម្ល៉េះដោយនាងបានចូលរួមប្រកួតបង្ហាញទេពកោសល្យខាងបង្ហាញម៉ូត និងការប្រកួតចម្រៀងផងដែរ។ មុខមាត់របស់ Cherri ក៏ទទួលបានការសរសើរថានាងខ្យូតគួរឱ្យស្រលាញ់បង្ហាញម៉ូតបានយ៉ាងល្អទោះបីវ័យទើបតែ៦ឆ្នាំក៏ដោយចំណែកឯការបកស្រាយចម្រៀងទៀតគឺត្រូវទំនុកភ្លេងមិនខុសចង្វាក់ឡើយ៕
