បែកធ្លាយតម្លៃខ្លួនតារាចម្រៀង ណូលី ច្រៀងក្នុងពិធីមង្គលការកូនកំលោះកម្ពុជានិងកូនក្រមុំវៀតណាម

ថ្មីៗនេះនៅលើបណ្តាញសង្គមផ្ទុះការចាប់អារម្មណ៍ភ្លូកទឹកភ្លូកដីអំពីពិធីមង្គលការកូនអភិជនដែលមានកូនកំលោះជាជនជាតិខ្មែរនិងកូនក្រមុំជាជនជាតិវៀតណាម។ បន្ទាប់ពីរៀបចំតាមប្រពៃណីវៀតណាមរួច កូនក្រមុំកូនកំលោះក៏បានដឹកដៃគ្នាមករៀបចំពិធីមង្គលការតាមបែបប្រពៃណីខ្មែរយ៉ាងអធិកអធម។

កម្មវិធីដែលប្រព្រឹត្តទៅនៅថ្ងៃទី២៩ ខែមករា កូនកំលោះមានឈ្មោះថា អាន ឡុងហួរ និងកូនក្រមុំជាជនជាតិវៀតណាមមានឈ្មោះថា ង្វៀន ធីយៀន បានប្រមូលផ្តុំសិល្បករ សិល្បការិនីល្បីៗជាច្រើនចូលរួមដូចជា មាស សុខសោភា រ៉ាប៊ី សុភ័ក្រ កុសុម៉ា គី សាវីន វីឌីណែត រួមទាំងតារាចម្រៀង ណូលី និងសិល្បករផ្សេងទៀត។ ពិធីមង្គលការដ៏ល្បីល្បាញមានការចាប់អារម្មណ៍ពីសាធារណជននេះត្រូវបានតារាចម្រៀង ណូលី បានបង្ហើបថាលោកច្រៀងតែមួយបទទទួលបានរហូតដល់២០០០ដុល្លារ។

នៅរសៀលថ្ងៃទី៣០ ខែមករា តារាចម្រៀង ណូលី បានបង្ហោះវីដេអូមួយដែលលោកបានបកស្រាយជាមួយនឹងពាក្យពេចន៍ថា «ភាសាបេះដូង ជាបទចម្រៀងសម្រាប់គូស្នេហ៍មួយគូដែលមានជាតិសាសន៍ខុសគ្នា ពេលខ្លះពិបាកសន្ទនា តែពួកគេអាចស្រឡាញ់គ្នាបានដោយសារភាសាបេះដូង»។ ក្រៅពីបង្ហាញបទចម្រៀងដ៏មានអត្ថន័យពីគូជីវិតដែលមានជាតិសាសន៍ខុសគ្នានេះ ណូលី បានចែករំលែកទៀតថា «ឡើងច្រៀងម៉ាបទ 2k ចឹងសុំច្រៀង១០បទទៀតបានអត់? លើសហ្នឹងទៀតក៏អត់ហត់ដែរ…»។

តាមការចែករំលែកព័ត៌មានបន្តគ្នាបានឱ្យដឹងថាក្រុមគ្រួសាររបស់ អាន ឡុងហួរ គឺជាអ្នករកស៊ីខាងដំឡូងនិងស្វាយចន្នី ចំណែកឯគ្រួសារខាងកូនក្រមុំ ង្វៀន ធីយៀន វិញត្រូវបានគេនិយាយថាបើកលក់គ្រឿងអលង្ការនៅ ជាគ្រួសារអ្នកមាននៅវៀតណាម។ នៅពេលគួចដៃមិនថានៅស្រុកខ្មែរឬស្រុកវៀតណាមកូនកំលោះ កូនក្រមុំទទួលបានចំណងដៃយ៉ាងច្រើនសន្ធឹកសន្ធាប់មានដុល្លារទាំងដុំៗ៕